Números 28 - Bible in Tzeltal de Oxchuc y Tenejapa

Majt'anil ta jujun c'aal

¹ Te Cajwaltic la sc'opon te Moisés, jich la yalbey:

² —Pasa ta mandal te israeletique: “Ma me scom sbaic ta yaq'uel ta mero yorail te we'elil soc te milbil majt'aniletic, te ya yich' chiq'uel ta jujun q'uin, ja' te majt'aniletic te bujts'an yic' ta jtojole.

³ “Albeya te ja'ic me majt'aniletic te ya yich' chiq'uel ta jtojol swenta quich'jibal ta muc': Jujun c'aal ma me spas falta cha'cojt' chijetic te jun ya'wilal te ma'yuc bila boloben ta sbaq'uetal.

⁴ Jcojt' me ya yich' milel ta sab, soc jcojt' ta mal c'aal.

⁵ Te majt'anil harina cheb me kilo te mero leque, wots'bil me soc jun litro yaceiteil oliva.

⁶ (Ja' te milbil majt'anil te scojt'ol la yich' chiq'uel spisil ora ta wits Sinaí, ja' te majt'anil te bujts'an yic' ta stojol te Cajwaltique.)

⁷ Te majt'anil vino jun me litro ya xtuun ta juju-jcojt' chij. Te vino ya me yich' malel ta ch'ul awilal ta jtojol yu'un quich'jibal ta muc'.

⁸ Te xchebal chije ya me yich' milel ta mal c'aal, soc ya me x'ac'bot sjoin harina soc vino, ja' pajal soc te majt'anil ta sabe. Ja' me te majt'anil te bujts'an yiq'ue, te ya xc'ajc' ta jtojol jo'on te Ajwalilone.

Majt'anil yu'un sc'aalelal cux-o'tanil

⁹ “Ta spisil bael te sc'aalelal cux-o'tanile, ya me sc'an ya awac'bonic jmajt'anin cha'cojt' chij te jun ya'wilal te ma'yuc bila boloben ta sbaq'uetal, soc chaneb kilo te mero lequil harina, wots'bil me soc aceite, ja' me te majt'anil harina, soc me te majt'anil vino.

¹⁰ Ja' me te chambalam ya yich' aq'uel swenta majt'anil te scojt'ol ya yich' chiq'uel te sc'aalelal cux-o'tanil soc me te vino yu'une, parte me a te ya yich' chiq'uel scojt'ol jujun c'aale.

Majt'anil ta jujun u

¹¹ “Ta sba c'aalil ta jujun u ya me awac'bonic milbil jmajt'an te scojt'ol ya yich' chiq'uel: cha'cojt' toro, jcojt' tat chij soc juqueb ta jcojt' alal tat chijetic te jun ya'wilalic, te ma'yuc bila boloben ta sbaq'uetal.

¹² Ta juju-jcojt' toro ya me awac'beyic sjoin waqueb kilo te mero lequil harina, wots'bil me ta aceite. Te jcojt' tat chije, ya me awac'beyic sjoin chaneb kilo te mero lequil harina, wots'bil me ta aceite.

¹³ Soc ta juju-jcojt' alal tat chij, ya me awac'beyic sjoin cheb kilo harina, wots'bil me ta aceite. Ja' me te majt'anil te bujts'an yic' te scojt'ol ya yich' chiq'uel swenta quich'el ta muc' jo'on te Ajwalilone.

¹⁴ Te majt'anil vino pajal ya awaq'uic, ja' me cheb litro ta swenta juju-jcojt' toro, jun litro soc olil te juju-jcojt' tat chij, soc jujun litro ta swenta te juju-jcojt' alal tat chije. Ja'ic te scojt'ol ya yich'ic chiq'uel te ya sc'an ya awaq'uic ta jujun u ta sjunal te ja'wile.

¹⁵ Parte me te ya yich'ulay chiq'uel scojt'ol jujun c'aal. Soc ya me awac'bonic jo'on te Ajwalilon, jcojt' tentsun te milbil majt'anil yu'un mulil, soc me te majt'anil vino.

Majt'aniletic ta q'uin Pascua

¹⁶ “Ta xchanlajunebal c'aal xjajch'el te sbabial u yu'un te ja'wile, ya me apas te q'uin Pascua ta swenta quich'el ta muc' jo'on te Ajwalilone.

¹⁷ Ta yo'lajunebal c'aal ja' me sc'aalelal q'uin abi. Juqueb me c'aal ya awe'ic te waj te ma ba yich'oj levadura.

¹⁸ Te sbabial c'aal yu'un te q'uine ya me yich' pasel te ch'ul tsobleje. Ja' me te c'aal te ma'yuc at'el ya apasic a.

¹⁹ Te majt'anil te scojt'ol ya yich' chiq'uele, ya me awac'bonic cha'cojt' toro, jcojt' tat chij soc juqueb alal tat chijetic te jun ya'wilalic, te ma'yuc bila boloben ta sbaq'uetal.

²⁰ Te milbil majt'aniletic jun nax me ya awac' soc te majt'anil harina, wots'bil me ta aceite. Ja' jich bit'il to: waqueb kilo harina ta swenta juju-jcojt' toro, chaneb kilo ta swenta te jcojt' tat chij,

²¹ soc cheb kilo ta swenta juju-jcojt' alal tat chij.

²² Ya me awaq'uic xan jcojt' tentsun, ja' me te milbil majt'anil te ya yich' tael perdón yu'un a te amulique.

²³ Spisil ya me yich' aq'uel soc te chambalam te scojt'ol ya yich' chiq'uel, te ya yich' aq'uel ta spisil c'aal ta swenta jujun sab.

²⁴ Jich me ya apasic bael jujun c'aal te juqueb c'aal yu'un te q'uine, ja' me te majt'anil te bujts'an yic' te ya yich' chiq'uel ta jtojol jo'on te Ajwalilone. Ja' me pajal ta aq'uel soc te majt'anil vino yu'une. Parte me a te ya yich' chiq'uel jujun c'aale.

²⁵ Ta sjuquebal c'aal ja' nix me jich ay ch'ul tsoblej awu'unic, ja' te c'aal te ma'yuc at'el ya apasic a.

Majt'anil sbabial sit awalts'unubil

²⁶ “Te q'uin yu'un te sbabial sit awalts'unubil, c'alal ya awac'bonic te sbabial sit ya yich' set'el awu'unique, ja' me te q'uin yu'un te Semanaetique. Ay me ch'ul tsoblej awu'unic a, ma me ayuc at'el ya apasic.

²⁷ Ya me awac'bonic jmajt'anin chambalametic te scojt'ol ya yich' chiq'uel te bujts'an yiq'ue: cha'cojt' toroetic, jcojt' tat chij soc juqueb alal tat chijetic te jun ya'wilale.

²⁸ Sjoinej me te majt'anil harina te wots'bil ta aceite. Ay me waqueb kilo ya sjoin te juju-jcojt' toro, chaneb me kilo ya sjoin te jcojt' tat chij,

²⁹ soc cheb kilo ta swenta juju-jcojt' alal tat chij.

³⁰ Soc ya me awaq'uic jcojt' tentsun, ja' me milbil majt'anil te ya yich' tael perdón yu'un a te amulique.

³¹ Te majt'anil te scojt'ol ya yich' chiq'uel soc te sjoy te harina soc te vino, ya me awac'bonic jmajt'anin. Parte me ya awaq'uic te chic'bil scojt'ol chambalam swenta te jujun c'aale, te ma'yuc bila boloben xujt'uc ta sbaq'uetal te chambalametique.