Números 26 - Bible in Tzeltal de Oxchuc y Tenejapa

Yach'il censo yu'un Israel

¹ Ta patil te bit'il c'axix bael te tulan chamel te la yac' lajele, te Cajwaltic jich la yalbey te Moisés soc te Eleazar, te snich'an anima sacerdote Aarón:

² —Ac'aic ta censo spisil ta chajbalchajp te israeletic te ayic ta jtab ya'wilalic baele, te ya sna'iquix guerra —xi' te Cajwaltique.

³ Te Moisés soc Eleazar la spasic ta mandal te israeletic ta spamlej q'uinal yu'un Moab ta sts'eel te muc'ja' Jordán, ta mero jejch' ja' ay soc te lum Jericó,

⁴ te ya x'ochic ta censo spisilic te ay jtab ja'wil baele, jich bit'il yalojbey mandal Cajwaltic te Moisese. Ja'ic te israeletic loq'uic tel ta Egipto:

⁵ Te sts'umbal Rubén, te sba snich'an Israel, ja'ic ta chajbalchajp te mach'atic yu'un Enoc, Falú,

⁶ Hezrón soc Carmi.

⁷ Te loc' yajtalul ta censo sts'umbal Rubén, ay oxeb yoxwinic ta jmil soc lajuneb sjuclajunwinic xcha'bajc' (43,730).

⁸ Te Falú ja' snich'an te Eliab,

⁹ te Eliab ja' snich'nab te Nemuel, Datán soc Abiram. Te Datán soc Abiram ja'ic sjo'tac te mach'atic ich'bilic ta muc' te la spasic toybajel soc Coré ta stojol te Cajwaltic soc ta stojol Moisés soc Aarón.

¹⁰ Ja'uc me to, la sjam sba te lumq'uinale, la sbic' coel xchebalic soc Coré, soc lajic spisil te jtsojp yac'oj sbaique, melel lajuneb yoxlajunwinic (250) winiquetic te lajic ta c'ajq'ue. Ja' me tuun ta swenta sp'ijtesel te yantique.

¹¹ Ja'uc me to, te snich'nab Coré ma ba laj stuquelic.

¹² Te sts'umbal Simeón ta chajbalchajp, ja'ic te mach'atic yu'un Nemuel, Jamín, Jaquín,

¹³ Zera soc Saúl.

¹⁴ Te loc' yajtalul ta censo te sts'umbal Simeón, ay cheb xcha'winic ta jmil soc lajunwinic (22,200).

¹⁵ Te sts'umbal Gad ta chajbalchajp, ja'ic te mach'atic yu'un Zefón, Hagui, Suni,

¹⁶ Ozni, Eri,

¹⁷ Arod soc Areli.

¹⁸ Te loc' yajtalul ta censo te sts'umbal Gad, ay cha'winic ta jmil soc jo'winic xcha'bajc' (40,500).

¹⁹ Te snich'nab Judá, lajic te Er soc Onán ta bay lumq'uinal yu'un Canaán.

²⁰ Ja' yu'un te sts'umbal Judá ta chajbalchajp, ja' te Sela, Fares soc Zara.

²¹ Te sts'umbal Fares ta chajbalchajp, ja'ic te mach'atic yu'un Hezrón soc Hamul.

²² Te yajtalul loc' ta censo sts'umbal Judá ay waclajuneb xchanwinic ta jmil soc jo'winic xcha'bajc' (76,500).

²³ Te sts'umbal Isacar ta chajbalchajp, ja' te mach'atic yu'un Tola, Fúa,

²⁴ Jasub soc Simrón.

²⁵ Te yajtalul loc' ta censo sts'umbal Isacar, ay chaneb xchanwinic ta jmil soc jo'lajunwinic (64,300).

²⁶ Te sts'umbal Zabulón ta chajbalchajp, ja' te mach'atic yu'un Sered, Elón soc Jahleel.

²⁷ Te loc' yajtalul ta censo sts'umbal Zabulón, ay oxwinic ta jmil soc jo'winic xcha'bajc' (60,500).

²⁸ Te sts'umbal José ta xcha'chajbal, ja' te mach'atic yu'un Manasés soc te mach'atic yu'un Efraín.

²⁹ Te sts'umbal Manasés, ja' te mach'atic yu'un Maquir. Te sts'umbal Maquir, ja' te mach'atic yu'un Galaad.

³⁰ Te sts'umbal Galaad, ja' te mach'atic yu'un te Jezer, Helec,

³¹ Asriel, Siquem,

³² Semida soc Hefer.

³³ Te Zelofehad ja' stat te Hefer, ma'yuc queremetic, ja' nax ay yantsil-nich'nab, ja'ic te Maala, Noa, Hogla, Milca soc Tirsa.

³⁴ Te yajtalul loc' ta censo te sts'umbal Manasés, ay lajchayeb yoxwinic ta jmil soc jo'lajunwinic xcha'bajc' (52,700).

³⁵ Te sts'umbal Efraín ta chajbalchajp, ja'ic te mach'atic yu'un Sutela, Bequer soc Tahán.

³⁶ Te sts'umbal Sutela, ja'ic te mach'atic yu'un Erán.

³⁷ Te yajtalul loc' ta censo te sts'umbal Efraín, ay lajchayeb xcha'winic ta jmil soc jo'winic xcha'bajc' (32,500). Ja'ic te sts'umbal José te ay tel ta chajbalchajp te sbiilique.

³⁸ Te sts'umbal Benjamín ta chajbalchajp, ja'ic te mach'atic yu'un Bela, Asbel, Ahiram,

³⁹ Sefufam soc Hufam.

⁴⁰ Te sts'umbal Bela ta chajbalchajp, ja'ic te mach'atic yu'un Ard soc Naamán te snich'nab Bela.

⁴¹ Te yajtalul loc' ta censo sts'umbal Benjamín, ay jo'eb yoxwinic ta jmil soc lajunwinic xcha'bajc' (45,600).

⁴² Jchajp nax te sts'umbal Dan, ja'ic te mach'atic yu'un Súham.

⁴³ Te yajtalul loc' sts'umbal Súham, ay chaneb xchanwinic ta jmil soc jbajc' (64,400).

⁴⁴ Te sts'umbal Aser ta chajbalchajp, ja'ic te mach'atic yu'un Imna, Isúi soc Bería.

⁴⁵ Te sts'umbal Bería, ja'ic te mach'atic yu'un Heber soc Malquiel.

⁴⁶ Te Aser ayin jtul yantsil-nich'an, Sera sbiil c'ot yu'un.

⁴⁷ Te yajtalul loc' ta censo te sts'umbal Aser, ay oxlajuneb yoxwinic ta jmil soc jbajc' (53,400).

⁴⁸ Te sts'umbal Neftalí ta chajbalchajp, ja'ic te mach'atic yu'un Jahzeel, Guni,

⁴⁹ Jezer soc Silem.

⁵⁰ Te yajtalul loc' ta censo te sts'umbal Neftalí, ay jo'eb yoxwinic ta jmil soc jbajc' (45,400).

⁵¹ Ta spisil te israeletic la yich'ic ajtayel ta censo, ay lajunwinic xcha'bajc' ta jmil soc jmil xan, soc lajuneb sjuclajunwinic xcha'bajc' ta spisilic (601,730).

Te bit'il ay ta puquel q'uinal

⁵² Te Cajwaltic la sc'opon te Moisés, jich la yalbey:

⁵³ —Ja' me ya yich'ic puquel q'uinal te winiquetic, jich nix me te bit'il yajtalul ochic ta censo.

⁵⁴ Ta bay jchajp te mero bayalique, muc' me ya yich'ic stuquelic. Yan te bay peq'uel yajtalul, jich nix me peq'uel ya yich'ic. Ta juju-jchajp ya me yich' sq'uinalic jich bit'il yajtalul ta censo.

⁵⁵ Te ya yich' puquel te q'uinale, ya me yich' pasel snumeroil ta na'el, juju-jtul ya yich' sq'uinal chican te bit'il ay sts'umbal te state.

⁵⁶ Soc me snumeroil ta na'el te ya yich' puquel q'uinal, ta bay jchajp te bayal yajtalule, soc te bay peq'uel yajtalule —xi' te Cajwaltique.

Censo yu'un levitaetic

⁵⁷ Te sts'umbal Leví te la yich'ic aq'uel ta censo ta chajbalchajp, ja'ic te mach'atic yu'un Gersón, Coat soc Merari.

⁵⁸ Te libnaetic, hebronetic, mahletic, musetic, soc coreetic, ja' sts'umbal Leví ta chajbalchajp. Te Coat ja' stat te Amram.

⁵⁹ Te Amram nujbin soc jtul yantsil-nich'an Leví, Jocabed te sbiile, ayin c'alal ay ta Egipto a te Leví. Te Amram soc Jocabed ja'ic te sme'-stat Aarón, Moisés soc María.

⁶⁰ Te snich'nab Aarón ja'ic te Nadab, Abiú, Eleazar soc Itamar.

⁶¹ Te Nadab soc Abiú lajic te c'alal la yac'beyic ta stojol Cajwaltic te c'ajc' ma smandaluque.

⁶² Ta spisil te queremetic sts'umbal Leví te ay jun nax u baele, ay oxeb xcha'winic ta jmil (23,000). Ma la yich'ic aq'uel ta censo soc te yan israeletic, melel ma'yuc q'uinal ac'bot yu'unin stuquelic.

⁶³ Jich c'ot ta loq'uel te censo yu'un te israeletic te la spas te Moisés soc te sacerdote Eleazar ta bay spamlej q'uinal yu'un Moab, ta sts'eel muc'ja' Jordán te ay ta jejch' ja' te lum Jericó.

⁶⁴ Ta spisilic ma'yuquix tey a ni jtuluc te mach'atic la yich'ic aq'uel ta censo yu'un Moisés soc Aarón ta jochol taquin q'uinal Sinaí,

⁶⁵ melel te Cajwaltic la yalbey sc'oplal te ya xlajic jilel ta jochol taquin q'uinal. Ja' nax Caleb, te snich'an Jefone, soc Josué te snich'an Nun, te cuxul jilique, ma'yuc bay jtuluc jil te yantique.