Números 24 - Bible in Tzeltal de Oxchuc y Tenejapa

¹ Ja'uc me to, c'ot ta yo'tan Balaam te ja' ya sc'an yo'tan Cajwaltic te ya yac'bey bendición ta stojol te lum Israel. Ja' yu'un ma ba la sle señailetic ta stojol Cajwaltic, jich bit'il ay la spasix, ja' nax la sut sit ta stojol te muc'ul jochol taquin q'uinale.

² C'alal la yil Balaam spisil Israel ta bay scampamento ta chajbalchajp sts'umbale, te espíritu yu'un Dios wentainot yu'un te Balaam.

³ Jich yu'un la yal loq'uel sc'op j'alwanej: —Ja' te c'op yich'oj tel Balaam te snich'an Beor, ja' te winic te wiq'uil sit ta leque,

⁴ te yac ta yaiyel te bila ya x'albot yu'un Dios. Yalemix ta lum pero mero chican ta lec ya yil, jich ay bila ya xchicnaj ta sit ya yaiy yu'un te Dios te Spisil ya xju' yu'une.

⁵ ¡Jacob, t'ujbil te nailpaq'uetic awu'une! ¡T'ujbil te campamento yu'un Israel!

⁶ Mero najt'ic xcholoj sbaic jichuc palmaetic yilel, jich bit'il ts'unbil nichimaltic ta ti'ja' yilel, ja' te ts'unbil áloetic yu'un Cajwaltic, ja' te cedroetic ta ti'ja' yilel.

⁷ Te Israel c'ax bayal ja' yu'un ta swenta uch'el soc smalel ta ja' te yawal-sts'unube. C'ax jich ya xmandalaj te muc' ajwalil yu'unic a te bit'il Agag; te yip ta muc' ajwalil c'ax muc' stuquel.

⁸ Ja' te Dios te loq'uesotic tel yu'un ta Egipto, jich c'oem yu'unic te bit'il yip xulub ja'mal toro. Te Israel ya sbic' c'oem te nacionetique, ja' te scontroique. Ya sc'asbey sbaquelic, ya yejch'entes ta yat'ejibal st'imic.

⁹ C'alal ya smejts'an sba ta xcuxel yo'tanic, jich yilel te bit'il león-choj: ma'yuc mach'a ya xjelaw ta stijel. Jelawen yutsil te mach'a ya sc'anbat bendición, ya me yich' castigo te mach'a ya sc'anbat castigo —xi' te Balaam.

Sc'op j'alwanej la yal Balaam

¹⁰ Te c'alal la yaiy stojol Balac, bayal ilin ta stojol Balaam. La spac'ulay sc'ab yu'un, jich la yal: —Jo'on la quic'at tel yu'un ya ac'anbey castigo yu'un Dios.

¹¹ ¡Ja' me lec te ya xbaatix ta ana jiche! La calbat ta jamal te bayal ya cac'at ta ich'el ta muq'ue; ja'uc me to, te Awajwal ma la yac'at a —la yut.

¹² Te Balaam la sjac': —Jich la cac'bey sna' te mach'atic la aticun bael:

¹³ “Manchuc me ya awac'bon te jich yipal oro soc plata te ya xnoj a te amuc'ul nae, te jo'one ma xju' ya jch'aybey smandal te Cajwal, te ya jpas te bila lec ta jc'op o te bila ma lecuc ta swenta sc'anjel co'tan, te melel ja' nax ya cal te bila ya yac'bon cal te Cajwale”, la cut.

¹⁴ Lec ay, ya sujt'onix bael ta jlumal; ja'uc me to, ya to calbat xan jilel te bila ya spas bael ta yan c'aal te lum Israel ta stojol te alumale —xi'.

¹⁵ Te Balaam la yal loq'uel sc'op j'alwanej: —Te c'op yich'oj tel Balaam te snich'an Beor, ja' te winic te ya yil ta jamal,

¹⁶ yu'un yaiyoj stojol te bila ya yal te Diose, yiloj te bi yilel te mach'a toyol aye, melel ay bila ya x'ac'bot yil yu'un te Dios te Spisil ya xju' yu'une.

¹⁷ Ay bila yacon ta yilel te ya xc'ot bael ta pasel, ay bila ya quil ya caiy te c'ubul aye: Ja' jun ec' te ya xloc' tel ta Jacob, ya xjajch' loq'uel tel jtul muc' ajwalil ta yolil Israel. Ja' ya swuybey sjol te sts'umbal Moab, ya swuy spisil sts'umbal Set.

¹⁸ Ya me stsal Edom, ya me x'och ta sc'ab te Seir, ja' te scontroe. Te Israel muc' bitic ya spas.

¹⁹ Ay jtul jtsalwanej ya xloc' ta sts'umbal Jacob, ya me sjin te mach'atic ya xjilic ta lumetic —xi' te Balaam.

²⁰ Ta patil te Balaam yac ta yilel la yaiy te sts'umbal Amalec, la yalbey sc'oplal te bila ya xc'ot ta pasel ta stojol: —Te Amalec ja' te jchajp lum te muc' sc'oplale, ja'uc me to jc'axel ya xlaj ta jinel ta spisil —xi'.

^21-22 Soc yac ta yilel la yaiy te quenitaetic, jich la yalbey sc'oplal te bila ya xc'ot ta pasele: —Ja'ex te sts'umbalex Caín: manchuc me tulan ayex ta anjibaletic, manchuc me apasoj apechech ta yolil te tulanil tontiquile, te apechech jc'axel me ya xjin ta c'ajc' te c'alal ya xchuquex bael te Asiria —xi'.

²³ Ta patil la yal: —¡Ay! ¿Mach'a cuxul to a te c'alal jich ya spas te Diose?

²⁴ Ya xtalic barcoetic ta sti'il mar ta Chipre te ya slajin jilel ta wuyel te Asiria soc te Heber, melel nix a, ya me yich' jinel te Heber —xi'.

²⁵ Ta patil jajch' te Balaam, sujt' bael ta sna. Te Balac jich nix jajch' bael ta beel uuc.