Números 22 - Bible in Tzeltal de Oxchuc y Tenejapa

Balac la sticun ta iq'uel Balaam

¹ Te israeletic cha'beenic xan, c'o spas scampamentoic ta spamlejetic yu'un Moab, ta sloq'uib c'aal yu'un te muc'ja' Jordán, ta jejch' ja' yu'un te lum Jericó.

² Te Balac snich'an Zipor, la yil te israeletic te bila la spasbeyic te amorreoetique.

³ Ja' nix jich spisil te yajwal Moab och bayal xiwel ta yo'tanic te la yilic te israeletic te mero bayalic ta jyalele.

⁴ Jich yu'un te yajwal Moab la yalbey yaiyic te mamaletic ich'bilic ta muc' yu'un Madián: —Spisilic te ants-winiquetic ya me slajinbotic jq'uinaltic jich nix bit'il wacaxetic te ora nax ya slajin te aquile —xi'. Ja' yorail a te ay ta muc' ajwalil yu'un Moab te Balac.

⁵ La sticun ta iq'uel te Balaam snich'an Beor, ja' te mach'a ay ta lum Petor ta sts'eel te muc'ja' Eufrates, ta sq'uinal Amav. Te Balac la yalbey mandal te abatetic yu'une: —Baan albeyaic te Balaam: “Ta Egipto ay loq'uem tel jchajp lum te pujq'uemiquix bael ta spamal te q'uinale. Ora yo'tic ayiquix ta jtojoltic.

⁶ La', c'anbon castigo ta stojol, yu'un c'ax xan tulanic a te bit'ilotique. Jich wan ya xju' cu'un stsalel a te jichuque, te ya jnutstic loq'uel ta jlumaltic. Ya jna' teme bendición ya ac'anbey, o teme castigo ya ac'anbey, ya nix c'ot ta pasel a”, utaic me —xi'.

⁷ Te mamaletic ich'bilic ta muc' yu'un Moab soc Madián bajt'ic. Yich'ojic bael taq'uin, swenta yu'un ya stojic a te sc'anel castigo ta stojol Israel. C'alal c'otic ta stojol Balaam, la yalbeyic te sc'op yaloj bael te Balac.

⁸ Te Balaam la yalbey: —Ma me xbaex in ajc'ubal to, yu'un ya me calbat te bila mandal ya yalbon te Cajwaltique —xi'. Te mamaletic yu'un Moab la scom sbaic.

⁹ Ja'uc me to, te Diose tal sc'opon Balaam, la sjojc'obey: —¿Mach'atic a te winiquetic ajoineje? —xi'.

¹⁰ Te Balaam la sjac': —Ja' yu'un te Balac snich'an Zipor, te muc' ajwalil yu'un Moab, la sticun tel yalbelonic

¹¹ te ay jchajp lum loc' tel ta Egipto, te pujq'uemiquix bael ta spamal q'uinal. Te Balac ya sc'an te ya xboon ta sc'anel castigo te jich ya xju' yu'un stsalel, soc jich ya xju' yu'un snutsel loq'uel ta sq'uinal —xi'.

¹² Jich yu'un te Dios la yalbey te Balaam: —Ma me xbaat, ma me x'ac'anbon te ya cac'bey castigo te lume, melel jo'on cac'ojbey bendición —xi' te Diose.

¹³ Ta yan c'aal jajch' te Balaam, jich la yalbey te jtsobwanejetic te sticunej tel te Balac: —Sujt'anic bael ta alumalic, melel te Cajwaltic ma xyac'on bael ta atojolic —la yut.

¹⁴ Te jtsobwanejetic yu'un Moab sujt'ic bael ta bay te Balac, jich la yalbeyic: —Te Balaam ma la sc'an sjoinotic tel —xiic c'oel.

¹⁵ Ja'uc me to, te Balac la yalbey xan tulan sc'oplal. La xcha'ticun xan bael yan jtsobwanejetic, te cajal xan yajtalul soc cajal xan sc'oplalic yu'un a te yantic ta neelale.

¹⁶ Ja'ic bajt'ic xan ta sc'oponel te Balaam, jich la yalbeyic: —Te Balac snich'an Zipor la yalbat tel: “Wocoluc, ma xacombotic aba.

¹⁷ Jo'on ya cac'at ta buen ich'el ta muc'. Ya me jpas ta spisil te bila ya ac'anbone. La' me, wocoluc ya me xtal ac'anbon castigo ta stojol te lume”, xi' tel sc'op —xiic.

¹⁸ Ja'uc me to, te Balaam la sjac': —Manchuc me spisil ya yac'bon oro soc plata te Balac te jich yipal ya xnoj a te smuc'ul nae, ma'yuc bila ya xju' cu'un spasel, ni muc' ni tsail, ta scontroinel smandal te Cajwaltic te Dios cu'une.

¹⁹ Ja'uc me to, ma me xbaex in ajc'ubal to. Ya quil te bila ya yalbon Cajwaltic ta yan buelta —xi' te Balaam.

²⁰ Ta ajc'ubal chicnaj Dios ta stojol te Balaam, jich la yalbey: —Ja' te winiquetic teme talem yu'un ya yic'at baele, jajch'an, baan soc. Pero ja' nax me ya apas te bila ya calbate —xi' sc'oplal yu'un.

Balaam la sta ta be ch'ul abat yu'un Cajwaltic

²¹ Te Balaam jajch' ta yan c'aalil, la smojt'esbey smontura te sburra, bajt' soc te jtsobwanejetic yu'un te moabetique.

²² Cajal bael ta sburra, soc joinot bael yu'un te cheb abatetic yu'une. Ja'uc me to, te Diose ilin ta stojol, ja' yu'un te bajt'e. Te ch'ul abat yu'un te Cajwaltic, ba smac ta be, swenta yu'un ma xyac' c'axel.

²³ Te burra la yil te ch'ul abat yu'un Cajwaltic te ay ta yolil be, ay puñal ta sc'ab. Te burra la sq'uej sba bael ta be yu'un, och bael ta aquiltic. Ja'uc me to, te Balaam la smaj, swenta yu'un ya sujt'es tel ta be.

²⁴ Te ch'ul abat yu'un Cajwaltic ba stejc'an sba ta bay mero tsail te bee, ta bay ts'usubiletic te pasbil sts'ajc'ul ton ta xcha'mejch'el.

²⁵ Te burra c'alal la yil te ch'ul abat yu'un Cajwaltic la sts'ean sba ta jejch' ts'ajc', tey la snet'bey yacan a te Balaam. Jich yu'un te Balaam la xcha'maj xan yu'un.

²⁶ Ja'uc me to, te ch'ul abat yu'un Cajwaltic neelaj bael yu'unic, tey ba stejc'an sba ta bay mero tsail ta jyalel te bee, ta bay ma xju'ix ta joyel ta xcha'mejch'el.

²⁷ Te burra c'alal la yil te ch'ul abat yu'un te Cajwaltique, la spajc'an sba ta lum. Jich yu'un te Balaam ilin yu'un, la smaj ta te'.

²⁸ Te Cajwaltic ora la yac' c'opojuc te burra, jich la yalbey te Balaam: —¿Bi la jpasbat? Ja' yoxebalix buelta te la amajone —xi'.

²⁹ La sjac' te Balaame: —Ya alabanon. Te ayuc ta jc'ab te jpuñale, la jmilatix te jichuque —xi'.

³⁰ Te burra la sjac': —Jo'on me te burraon te ya acajtibinon spisil ora, soc ya me ana' te ma'yuc bay jich jpasojbate —xi'. —Melel nix a —xi' te Balaam.

³¹ Jich yu'un te Cajwaltic la yac'bey ju'uc yu'un yilel te ch'ul abat te ay ta yolil be te stsacoj ta sc'ab te spuñale. Te Balaam la spajc'an sba coel, la yac'bey sta lum te sti'bae.

³² Ja'uc me to, te ch'ul abat yu'un te Cajwaltic jich la yal: —¿Bistuc la amaj oxeb buelta te aburrae? Jo'on te tal jmacat ta be, melel te yacat ta baele, ma jmulan.

³³ Te aburra la yilon, la xujq'uin sba ta jtojol oxeb buelta. Te manchuc lajuc xujq'uin sbae, lajatix cu'un te jichuque, ja' cuxul jilel cu'un stuquel —la yut.

³⁴ Te Balaam la sjac'bey sc'op te ch'ul abat yu'un te Cajwaltique: —Jtaoj jmul. Ma la jna' teme ja'at amacojbon te jbee. Teme ma lecuc ya awaiy te ya xboone, ya me sujt'on bael —xi'.

³⁵ Te ch'ul abat yu'un Cajwaltic la sjac': —Ya xju' xbaat soc te winiquetique. Ja'uc me to, ja' nax me ya awal te bila ya calbate —xi' te ch'ul abate. Te Balaam bajt' soc te jtsobwanejetic te sticunej tel te Balac.

Balac la yic' ta stojol Balaam

³⁶ C'alal la yaiy stojol Balac te julix te Balaam, la yic' ta stojol ta jpam lum yu'un Moab te ay ta bay muc'ja' Arnón, ta sti'il te sq'uinale,

³⁷ jich la yalbey: —La jticunat ta iq'uel ta puersa. ¿Bi yu'un te wocol talate? ¿Yu'un bal la awal ta awo'tan te ma xju' cu'un te bayal ya cac'at ta ich'el ta muc'? —xi' te Balac.

³⁸ Te Balaam la sjac': —Pero li' ayonix to, tal cula'tayatix. Ja'uc me to, ma me ayuc cu'el ta c'op jtuquel, ja' nax me ya cal te bila ya yalbon te Diose —xi' te Balaam.

³⁹ Te Balaam bajt' soc Balac ta bay Quiriat-huzot.

⁴⁰ Tey la yal mandal Balac ta milel wacaxetic soc chijetic. La sticunbey Balaam soc te jtsobwanejetic te sjoinejique.

⁴¹ Te Balac, ta sab ba sle te Balaam. La yic' moel ta Bamot-baal, ja' to bay c'alal ya xchicnaj ta spisil scampamento te israeletique.