Números 19 - Bible in Tzeltal de Oxchuc y Tenejapa

Te bit'il ya xlecub mach'a ma ba lec sc'oplal

¹ Te Cajwaltic la sc'opon te Moisés soc Aarón, jich la yalbey:

² —Jo'on Ajwalilon, ya cal mandal. Albeya te israeletic, ac'a yiq'uic tel jcojt'uc me' wacax te tsaj stsotsil te ma'yuc bay cajanbil yugo-te' ta snuq'ue.

³ Te ja'ex ya me awac'beyic ta sc'ab te sacerdote Eleazar, yu'un ja' me ya sloq'ues bael ta spat campamento, ya me yal mandal ta milel ta stojol.

⁴ Te sacerdote Eleazar ya me smul jtebuc ta sbic'tal sc'ab te xch'ich'el, ya me stsijts'an juqueb buelta ta stojol bael te Nailpac' te bay ya quich' c'oponele.

⁵ Ta patil chic'aic te me' wacax ta stojol te sacerdote, chic'aic te snujc'ulel, sbaq'uetal, xch'ich'el soc stsa'.

⁶ Te sacerdote ya me stsac tel cedro soc ch'in sc'ab hisopo soc tsajal pac', ta spisil ya me xch'oj ochel ta c'ajc' ta bay ya xc'ajc' te me' wacaxe.

⁷ Ta patil ya me sac' te sc'u'-spac' soc ya me spoc sba ta ja'. Ta patil ya me xju' ya x'och bael ta campamento, pero ma lecuc sc'oplal ya xjil c'alal ta yijc'ubel q'uinal.

⁸ Te winic ya xchic' te me' wacax, ya me sac' te sc'u'-spac' soc ya me spoc sba ta ja', ma ba lec sc'oplal ya xjil uuc c'alal ta yijc'ubel q'uinal.

⁹ Ay me yan winic te lec sc'oplal, ya me stsobbey bael stanul te me' wacaxe. Tey me ya yac' ta awilal te lec sc'oplal ta spat campamento. Te stanul me' wacax, ja' me ya xtuun yu'un te lum Israel swenta yu'un ya xchajbanic a te ja' yu'un lecubtesel sc'oplal. Spisil in to ja' me milbil majt'anil yu'un te mulile.

¹⁰ Te mach'a ya stsob bael te stanul wacax, ya me sac' te sc'u'-spac', ma ba lec sc'oplal ya xjil c'alal ta yijc'ubel q'uinal. Ja' mandalil cu'un sbajt'el q'uinal. Te bit'il ay yip sc'oplal ta atojolic te ja'ex israelex, jich nix me ay yip sc'oplal ta stojol te jyanlumetic te nainem ta awolilique.

¹¹ “Te mach'a ya spicbey sbaq'uetal anima, ma ba lec sc'oplal ya xjil juqueb c'aal.

¹² Ta yoxebal c'aal soc ta sjuquebal c'aal ya me slecubtes sba ta ja' yu'un lecubtesel, jich me lec sc'oplal ya xc'ot.

¹³ Melel teme ay mach'a ya spicbey sbaq'uetal anima, te ma ba ya slecubtes sba sc'oplal, ya sboltesbey sc'oplal te ch'ul awilal yu'un te Cajwaltique. Ja' yu'un ya me yich' ch'ayel loq'uel ta yolil Israel. Te bit'il ma ba tsijts'anbil ta ja' swenta lecubtesel, ja' swentail te ma lecuc sc'oplale.

¹⁴ “Te mandaliletic yu'un te ay mach'a ya xlaj ta snailpac', ja'ic me: Spisil mach'atic ayic ta yutil snailpaq'uic soc spisil mach'atic ya x'ochic bael, juqueb me c'aal te ma lecuc sc'oplalic.

¹⁵ Spisil te yawil biluquetic te jamal sti'ic soc te ma mero macaluc ta lec, ma lecuc sc'oplalic.

¹⁶ “Teme ay mach'a ya xlaj ta yol q'uinal, spisil te mach'a ya spicbey sbaq'uetal te mach'a milbile o teme jich nax a laje, o teme sbaquel animaetic, o muquenal la spic, ma lecuc sc'oplal ya xjil juqueb c'aal abi.

¹⁷ “Teme ay jich ma lecuc sc'oplalic ya xc'ot, ya me stsaquic jtebuc stanul te me' wacax te milbil ta swenta mulil, ya me yich' aq'uel ta oxom, ya me xtal ya'lel sloq'uibja' ta sba.

¹⁸ Jtul winic te lec sc'oplal ya me stsacbey sc'ab hisopo, ya me smul ta ya'lel te oxome, ya me stsijts'an ta Nailpac', te yawil biluquetic, soc te mach'atic tey ayic a, soc nix te mach'atic la spic te baquetic, teme anima te milbil, teme jich nax a laj, o teme muquenale.

¹⁹ Te mach'a lec sc'oplal, ta yoxebal c'aal ya me stsijts'anbey ja' swenta lecubtesel te mach'a ma lecuc sc'oplal, soc ta sjuquebal c'aal. Ta sjuquebal c'aal lecub meix sc'oplal. Jich yu'un te mach'a ma lecuc sc'oplal ya me sac' te sc'u'-spac' soc ya me spoc sba ta ja', pero ma lecuc sc'oplal ya xjil c'alal ta yijc'ubel q'uinal.

²⁰ Teme ay mach'a ma lecuc sc'oplal te ma ba slecubtesej sba, ya me yich' ch'ayel loq'uel ta yolil lum, melel ya sboltesbey sc'oplal te ch'ul awilal yu'un te Cajwaltique. Te bit'il ma ba tsijts'anbil ta ja' swenta lecubtesel, ja' swentail te ma lecuc sc'oplale.

²¹ Ja' me mandalil cu'un sbajt'el q'uinal. Te mach'a ya yaiy tsijts'anwanej ta ja' yu'un lecubtesel, ya me sac' uuc te sc'u'-spaq'ue. Te mach'a ya spic te ja' yu'un lecubtesel, ma me lecuc sc'oplal ya xjil ja' to c'alal ta yijc'ubel q'uinal.

²² Spisil te bila ya spic te mach'a ma lecuc sc'oplal, ma me ba lec sc'oplal ya xc'ot uuc. Teme ay mach'a ya spic te mach'a ma lecuc sc'oplal, ya me xbolob sc'oplal c'alal ta yijc'ubel q'uinal —xi' te Cajwaltique.