Números 17 - Bible in Tzeltal de Oxchuc y Tenejapa

Pulin sbastón Aarón

¹ Te Cajwaltic la sc'opon te Moisés, jich la yalbey:

² —Albeya mandal te israeletic, te juju-jtul jtsobwanej yu'unic ta juju-jchajp, ac'a yich'ic tel sbastonic, lajchayeb bastonil ta spisil. Te ja'at ya me ats'ibubey sbiilic ta sbastonic juju-jtul.

³ Te bastonil te ay ta swenta sts'umbal Leví, ya me ats'ibubey sbiil tey a te Aarón. Jich ya sc'an te ay juju-jch'ix sbastonil yu'un te jtsobwanej ta swenta te juju-jchajbe.

⁴ Ya me awac' spisil sbastonic ta Nailpac' te bay ya quich' c'oponel ta stojol te scajonil trato te tey ya ataonic ae.

⁵ Ya me cac' te ya xpulin sbastón te mach'a tsabil cu'une, jich me ma xbol-c'opojiquix te israeletic ta atojolic ta jwenta —xi' te Cajwaltique.

⁶ Te Moisés jich nix la yalbey te israeletic, te juju-jtul jtsobwanej yu'un juju-jchajp la yac'bey sbastonic, jich la stsob sba lajchaych'ix te bastoniletique. Ja' tey ay a te sbastón Aarón.

⁷ Te Moisés la yac' jilel te bastonil ta stojol Cajwaltic ta Nailpac' yu'un trato.

⁸ Ta yan c'aal, c'alal bajt' ta Nailpac', la yil te sbastón te Aarón te ay ta swenta te sts'umbal Leví, pulinemix, yac'ojix snich soc sit te c'anubenix, ja' te almendra sbiile.

⁹ Jich yu'un te Moisés la stsac loq'uel ta stojol Cajwaltic spisil te bastonetic, ba yac'bey yil te israeletique. C'alal laj yo'tanic ta yilel, juju-jtul la stsaquic te sbastonique.

¹⁰ Jich yu'un te Cajwaltic la yalbey te Moisés: —Baan ac'a xan te sbastón Aarón ta stojol te scajonil trato, q'ueja tey a swenta sjultesibal stsa te jtoyba lume. Jich me ya xcomic ta bol c'op ta jtojol a, soc jich ma xlajic —xi' te Cajwaltique.

¹¹ Te Moisés jich la spas spisil bit'il nix la yal mandal te Cajwaltic,

¹² ja'uc me to te israeletic jich la yalbeyic te Moisés: —¡Ch'ayemotiquix ta jyalel! ¡Jpisiltic ya xlajotic!

¹³ Spisilic te mach'atic ya xnoptsajic ta ch'ul awilal yu'un Cajwaltic ya xlajic. ¿Yu'un bal jc'axel ya xlajotic jpisiltic jiche? —xiic.