Números 16 - Bible in Tzeltal de Oxchuc y Tenejapa

Ac'bot castigo yu'un stoybail Coré

¹ Jtul levita, sts'umbal Coat, Coré sbiil, snich'an Izhar, soc oxtul sts'umbal Rubén, ja' te Datán, Abiram snich'nab Eliab, soc On snich'an Pelet

² la stoy sbaic ta stojol Moisés. La sjoin sbaic xan soc lajuneb yoxlajunwinic (250) israeletic, ja'ic winiquetic te ay yat'elic yu'un te lume, ja'ic te ya xmandalajic ta stojol te lume soc te mero na'bil sbaique.

³ Spisilic la stsob sbaic, la situyic ta c'op te Moisés soc te Aarón, jich la yalbeyic: —Tiq'uexix a te muc' ac'oplalic te ja'exe, melel spisil lum ch'ultesbil yu'un te Diose. Te Cajwaltic ayix ta coliltic ta jpisiltic. ¿Bi yu'un te c'ax muc' ya awac' abaic soc awat'elic ta stojol te lum yu'un te Cajwaltique? —xiic.

⁴ La yaiy stojol Moisés, la stinan sba coel c'alal ta lum te sti'bae,

⁵ jich la yalbey te Coré soc te mach'atic sjoinej: —Pajel ta sab te Cajwaltic ya me yac' ta na'el te mach'a ay ta swenta soc mach'a ch'ultesbil yu'un te ya xju' ya xchic'bey te majt'aniletique. Ja' nax me ya xju' ya xchic'bey majt'anil te mach'a ya stsa stuquele.

⁶ Jich yu'un ya me awich' tel te xchic'jibal pom awu'un ja'at Coré soc te ajo'taque.

⁷ Ac'beyaic yac'alel c'ajc', ac'beyaic spomil, ac'aic pajel ta stojol te Cajwaltique. Te winic ya stsa te Cajwaltic, ja' me tsabil yu'un stuquel. ¡Tiq'uix a, levitaetic! —xi' te Moisese.

⁸ Te Moisés la yalbey xan te Coré: —Aiybon awaiyic stojol jc'op, levitaetic:

⁹ ¿Yu'un bal ma tic'uc ya awaiy te la stsaex te Dios yu'un spisil te israeletic, te ja' nopol ayex ta sts'eel te ja' ya awat'elinic spasel at'el ta ch'ul awilal yu'un Cajwaltic, soc te ya apasbeyic te at'el ta stojol te lume?

¹⁰ Te Cajwaltic sc'anoj yo'tan te ja'at soc te yantic te pajal sts'umbalex Leví, te nopol ayex ta stojol atuquelic. ¿Bit'il ay a ta ora yo'tic te ya abic'tal-o'tantaybey yat'el te sacerdoteetique?

¹¹ Ma ja'uc nax ya abolc'optayic te Aarón, melel ma'yuc sc'oplal stuquel, ja' yacalex ta scontroinel te Cajwaltic te ja'at soc te ajo'taque, te bit'il atoyoj abaic ta stojole —xi'.

¹² Te Moisés ora la sticun ta iq'uel te Datán soc te Abiram te snich'nab Eliab; ja'uc me to, la sjaq'uic: —Ma jc'antic xbootic.

¹³ ¿Jteb nax bal sc'oplal ta awo'tan te la awic'otic loq'uel ta lumq'uinal ta bay ya x'oquin leche soc chab c'oem, swenta yu'un tal awac'otic ta lajel ta jochol taquin q'uinal? ¿Soc ja' bal ya ac'an te ja' mero muc' awat'el ta jtojoltique?

¹⁴ Te ja'ate ma'yuc bay awic'ojotiquix bael ta q'uinal ta bay ya x'oquin leche soc chab c'oem, ni ma'yuc bay awac'ojbotiquix jq'uinaltic soc jts'usubiltic. Ja' xanix ya ac'an te ya jch'uuntic iq'uel bael awu'un jichuc ma'sitetic. Ma xju', ma jc'antic ya xbootic ta atojol —xiic.

¹⁵ Jich yu'un te Moisés bayal ilin, jich la yalbey te Cajwaltique: —¡Ma me x'atsacbey te majt'anil yu'unique! Ma'yuc bay jpojojbey ni jcojt'uc sburro, ni ma'yuc bila amen jpasojbey jtuluc —xi'.

¹⁶ Te Moisés la yalbey ta patil te Coré: —Tejc'ana aba pajel te ja'at soc te ajo'tac ta stojol te Cajwaltique. Ja' nix jich te Aarón, tey me ya xc'o stejc'an sba uuc.

¹⁷ Juju-jtul ac'a yich' bael te xchic'jibal spom, soc ac'a yac'bey spomil. Te ja'at soc te Aarón ya me awich'ic bael te xchic'jibal apomique. Pajal me ya awaq'uic soc te yantic lajuneb yoxlajunwinic (250) ta stojol te Cajwaltique —xi'.

¹⁸ Jich yu'un juju-jtul la stsaquic te xchic'jibal spomique, la yac'beyic ac'al soc pom, pajal la yaq'uic soc Moisés soc Aarón ta stojol te Nailpac' te bay ya yich' c'oponel te Cajwaltique.

¹⁹ Te Coré stsoboj spisil te lum ta stojol te Nailpac' ta scontroinel te Moisés soc te Aarón. Te yutsil xojobil te Cajwaltic chicnaj ta stojol spisil te lume.

²⁰ Te Cajwaltic la yalbey te Moisés soc te Aarón:

²¹ —Q'ueja abaic loq'uel ta yolil te lume, ta ora nax me ya jlajin —xi'.

²² Ja'uc me to, la spajc'an sbaic, la stinan sba coel c'alal ta lum, jich la yalic: —Ja'at Diosat, te ya awac'bey xcuxlejal spisil ants-winiquetic, ¿tic' bal ya awilintay spisil lum a ta scaj nax smul te jtul winique? —xiic.

²³ Te Cajwaltic la sjac'bey sc'op te Moisés:

²⁴ —Albeya spisil te israeletic: Ac'a sq'uej sbaic bael ta stojol te snailpaq'uic te Coré, Datán soc Abiram —xi'.

²⁵ Jajch' te Moisés, sjoinej bael te mamaletic ich'bilic ta muc', bajt'ic ta bay Datán soc Abiram.

²⁶ Jich la yalbey te lume: —Loc'anic ta bay snailpaq'uic te bol winiquetic, soc ma me xapicbeyic te bila ay yu'unique, teme repente ya xlajat bael yu'un uuc te smulique —xi'.

²⁷ Te lum loq'uic bael ta bay Coré, Datán soc Abiram. Te Datán soc Abiram tey ayic ta bay yochibal te snailpaq'uic soc te yinamic snich'nabic.

²⁸ Te Moisés la yal xan: —Ta ora to ya jpasbeyex prueba awilic te ja' te Cajwaltic la sticunon tel ta spasel spisil te bitic ya jpase, te ma me ja'uc ya jpas te sc'anjel co'tane.

²⁹ Teme jich ya xbajt'ic ta lajel te winiquetic te bit'il stalel ya xlajic bael te ants-winiquetique, yu'un ma ja'uc la sticunon te Cajwaltic abi.

³⁰ Teme yan yilel bit'il ya xbajt'ic ta lajel yu'un Cajwaltic, teme ya sjam sba te lumq'uinal te ya sbic' coel soc spisil te bitic ay yu'unique, teme cuxul ya xch'ayic coel ta yutil te lumq'uinale, jich me ya ana'ic stojol te ja' la scontroinic te Cajwaltique —xi' te Moisese.

³¹ Te c'alal nax a laj yo'tan ta c'op te Moisés, te lumq'uinal la sjam sba ta bay tejc'ajtic.

³² La sbic' coel spisil te winiquetic te jun yac'oj sba soc te Coré. Tey ch'ayic bael a te mach'atic ay yu'unic soc spisil te bitic ay yu'unique.

³³ Cuxulic ch'ay coel ta yet'al te lumq'uinal soc spisil te sbiluquic, ora nax la smac sba te lumq'uinale. Jich loq'uesotic bael ta yolilic te israeletique.

³⁴ C'alal chicnaj yawic, spisil te israeletic te ayic ta sjoyobal, loq'uic ta animal, soc jich la yalic bael: —¡Ma me sbic'otic bael te lumq'uinale! —xiic.

³⁵ Te Cajwaltic la to sticun tel c'ajc' ta smilel te lajuneb yoxlajunwinic (250) te la yaq'uic te pome.

³⁶ Te Cajwaltic la sc'opon te Moisés, jich la yalbey:

³⁷ —Pasa ta mandal te Eleazar te snich'an Aarón: Ac'a sloq'ues te xchic'jibal pometic ta yolil te bitic lajix ta c'ajq'uele. Q'uejel to me ya stujq'uiyic bael te yac'alel c'ajc' te ay ta yolilique.

³⁸ Te xchic'jibal pometic yu'un te winiquetic lajemiquix te la sta smulique, ch'ultesbilic me cu'un, melel la yich'ic tuuntesel ta yaq'uel pom ta jtojol. Ja' yu'un c'atp'unaic ta pasel ta lejch'el taq'uin, swenta yu'un ya yich' paq'uel a te scajtijib ta chiq'uel jmajt'ane, soc swenta yu'un ya me xtuun ta sjultesibal stsa te israeletic —xi' te Cajwaltique.

³⁹ Te sacerdote Eleazar la stsac te jayeb xchic'jibal pom pasbil ta bronce yu'un te winiquetic te lajic ta c'ajq'ue. La yal mandal ta pasel ta lejch'el taq'uin yu'un ya yich' paq'uel a te scajtijib ta chiq'uel majt'anile.

⁴⁰ Ja' me sjultesibal stsa c'ot te israeletic te ma me ayuc mach'a ya xju' ya xnoptsaj ta scajtijib majt'anil ta yaq'uel pom ta stojol Cajwaltic, teme ma ja'uc sts'umbal Aarón, jich me ya xc'ot ta swenta te bila c'ot ta swenta Coré soc te sjo'taque. Spisil la yich' pasel jich bit'il yalojbey mandal Cajwaltic ta stojol Eleazar ta swenta Moisés.

⁴¹ Ta yan c'aal spisil te lum Israel jajch'ic ta scontroinel ta c'op te Moisés soc te Aarón, jich la yalbey: —Te ja'exe yacalex ta smilel te lum yu'un Cajwaltic —xiic.

⁴² Ta spisilic xch'inlajanic ta sjoytayel te Moisés soc te Aarón, ja'uc me to la stojlinic bael ta ilel te Nailpac' te bay ya yich' c'oponel te Cajwaltique. Ta ora nax tal ta axintesel ta tocal soc chicnaj tey a te yutsil xojobil te Cajwaltique.

⁴³ Jich yu'un te Moisés soc te Aarón bajt'ic ta stojol te Nailpaq'ue.

⁴⁴ Te Cajwaltic la yalbey te Moisés:

⁴⁵ —Loc'anic bael ta stojol te lume, ora nax me ya jlajin —xi' te Diose. Te Moisés soc Aarón la spajc'an sbaic, la stinan sbaic coel c'alal ta lume,

⁴⁶ te Moisés, jich la yalbey Aarón: —Ich'a tel te xchic'jibal apom, ac'beya ac'al yu'un te scajtijib majt'anile, ac'beya ochel pom. Baan me ta bay te lum, soc c'anbeya perdón Dios ta stojolic, melel tilemix te yilimba Cajwaltic soc jajch'emix te tulan chamel ya yac' lajel —xi'.

⁴⁷ Te Aarón la spas te bila albot yu'un Moisés. Bajt' ta animal ta bay stsoboj sbaic te lume. Te tulan chamel te ticunbilix tel yu'un te Diose, yaquix ta yaq'uel lajel ta stojol te lume. Jich yu'un te Aarón la yac' ochel pom, soc la sc'anbey perdón Dios ta stojol te lume.

⁴⁸ Tey ba yac' sba ta yolil te mach'atic lajemiquix soc te mach'atic cuxulic toe. Jich la scom sba te tulan chamel te ya yac' lajele.

⁴⁹ Ja'uc me to lajemiquix chanlajun jmil soc jo'lajunwinic xcha'bajc' (14,700) ta jtul. Ma ba la yich' ajtayel stuquel te mach'atic neel lajic te bi ora la stoy sba te Coré.

⁵⁰ C'alal quejch'aj te tulan chamel, te Aarón sujt' bael ta stsobel sba soc Moisés ta stojol Nailpac' te bay ya yich' c'oponel te Cajwaltique.