Números 14 - Bible in Tzeltal de Oxchuc y Tenejapa

Israeletic la stoy sbaic ta stojol Cajwaltic

¹ Jich yu'un te israeletic jajch'ic ta aw, ta sjunal ajc'ubal c'ax yu'unic ta oq'uel.

² Spisilic jajch'ic ta bol c'op ta stojol te Moisés soc te Aarón, jich la yalic: —¡Ja' lec te lajucotic ta Egipto, o ta jochol taquin q'uinal!

³ ¿Bi yu'un la yic'otic tel Cajwaltic li' ta lumq'uinal to? ¿Swenta bal yu'un ya xlajotic ta guerra? Te quinamtic soc te jnich'nabtic ya x'ochic ta sc'ab te jcontrotique. Ja' lec xan te ya sujt'otic bael ta Egipto —xiic.

⁴ Soc jajch' yalbey sbaic: —Ac'a jletic jtuluc jtsobwanej cu'untic, jich ya sujt'otic bael ta Egipto —xiic.

⁵ Te Moisés soc te Aarón la stinan sba coel c'alal ta lum ta sit spisil Israel.

⁶ Te Josué soc Caleb te ja'ic xc'otuc yilic tel te q'uinale, la xch'i' sc'u'ic ta seña xc'uxul mel-o'tan.

⁷ Jich la yalbey spisilic te israeletique: —Te q'uinal te xc'otuc quiltic, mero c'ax t'ujbil ta jyalel.

⁸ Teme bin nax yo'tan cu'untic te Cajwaltic, ya me yic'otic ochel tey a, soc ya me yac'botic cu'unintic, ja' te lumq'uinal ta bay ya x'oquin leche soc chab c'oem.

⁹ Ja'uc me to, ma me xatoy abaic ta stojol te Cajwaltic, soc ma me xiwex yu'un te yajwal q'uinale, melel te jo'otic ya me jlajintic jich bit'il ya jlajintic te jwe'eltique. Ma me ayuc mach'a ya xc'opoj yu'un stuquelic, yan te jo'otic ay ta coliltic te Cajwaltique. Ma me ayuc xiwel ta awo'tanic —xiic.

¹⁰ Te c'alal jich yacal ta yalel a, te lum ya c'an xch'ojic ta ton. Jich yu'un te yutsil xojobil te Cajwaltic chicnaj ta sitic ta spisilic te israeletic ta Nailpac' te bay ya yich' c'oponele.

¹¹ Te Cajwaltic jich la yalbey te Moisés: —¿Jayeb to c'aal ma lecucon ta yo'tanic te lume? ¿Jayeb to me c'aal ya xc'opoj yo'tanic cu'un te bit'il cac'ojbey yilic cu'el ta yolilique?

¹² Ya me jticunbey chamel swenta lajel. Jich me ma xc'ot ta swentaic yich'el te q'uinale. Yan te ja'ate muc'ul lum ya xc'oat cu'un, soc mero tulan me ya xc'oat atuquel —xi' te Cajwaltique.

¹³ Te Moisés la sjac'bey sc'op te Cajwaltique: —Te ja'at Cajwal, soc awu'el la aloq'ues tel ta Egipto te lume. Teme ya yaiy stojol egipcioetic te bila ya apase,

¹⁴ ya me xba yalbey yaiyic te yajwal te sq'uinal Canaán. Melel yaiyojic te ay ta alel te ja'at Cajwal, te ayat ta yolilic, te awac'oj aba ta ilel ta stojolic, te axintesbilic ta tocal awu'une. Ta c'aaleltic ya xneelajat bael yu'unic ta balal tocal, soc ta ajc'ubal ya xneelajat bael yu'unic ta balal c'ajc'.

¹⁵ Teme jc'axel ya amil te lume, te nacionetic te yaiyojic stojol ac'oplal, ya me yalic:

¹⁶ “Te Yajwalique, ma ju' yu'un te ya yac' ochel bael ta q'uinal te yalojbey ta jamal te ya yac'beye. Ja' swentail te la smil jilel ta jochol taquin q'uinal”, xiic me.

¹⁷ Ja' yu'un, Cajwal, ac'a ta ilel te smuc'ul awu'el, jich nix te bit'il awaloje.

¹⁸ Awaloj te ma orauc nax ya x'ilinat, te mero muc' ta jyalel te xc'uxul awo'tan, soc te ya apasbey perdón yu'un smulic soc te stoybailique. Ya jna' te ma xch'ay castigo ta stojol te mach'a ay smul, te ya awac'bey castigo soc snich'nab smamatac c'alal ta xchancajal.

¹⁹ Melel te xc'uxul awo'tane, mero muc' ta jyalel, jich yu'un pasbeya perdón yu'un smulic, melel ats'icojbey c'alal ta Egipto ja' to c'alal ta bay q'uinal to —xi' te Moisese.

Cajwaltic la yac'bey castigo israeletic

²⁰ Te Cajwaltic la sjac': —Lec ay, ya jpasbey perdón, jich te bit'il la ac'anbone.

²¹ Ja'uc me to, te jo'on ya cal ta jamal, soc ya me xc'ot ta pasel te bila ya cale. Ja' prueba yu'un ta atojolic te cuxulon ya awilic, soc te nojel ta q'uinal te yutsilal jxojobile.

²² Jich yu'un te jo'on ya cal te ma jtuluc te mach'atic yilojbonic yutsilal jxojobil, soc te jchajp señailetic la jpas ta Egipto soc ta jochol taquin q'uinal, te ja' nax la spason ta prueba yilic bayal buelta ta jochol taquin q'uinal, te yu'un ma sc'an xch'uunbonic te jmandale,

²³ ma me ayuc jtuluc ya yilic te q'uinal te la calbey yaiy sc'oplal te antiguo sme'-state. Ma me ayuc jtuluc ya yil te mach'atic ma lecucon ta yo'tanique.

²⁴ Ja' nax me stuquel te cabat Caleb te yan yilel yutsil yo'tan stuquel, te jun yo'tan xch'uunejbon te jmandale. Ja' nax stuquel ya cac' ochel ta q'uinal te xc'otuc yilixe, soc te sts'umbal ja'ic me ya xnajc'ajic tey stuquelic a.

²⁵ (Te sts'umbal Amalec soc te cananeoetic, ja' nainemic ta muc'ul spamlej q'uinal.) Te ja'ex pajel me ya awaq'uic buelta, loc'anic bael ta sbelal te muc'ul jochol taquin q'uinal, t'unaic bael sbelal te Mar Rojo —xi'.

²⁶ Te Cajwaltic la sc'opon te Moisés soc Aarón, jich la yalbey:

²⁷ —¿Jayeb to xan buelta ya jts'icbey sbol-c'opic te israeletic te amen yo'tanique? La caiybeyix stojol te sbol-c'opic cu'une.

²⁸ Baan albeya yaiyic ta jwenta: “Jo'on Ajwalilon te cuxulone, ya cal ta jamal: Te bila la caiy stojol te yacalex ta yalele, jich nix ya cac' c'otuc ta pasel.

²⁹ Spisilic te mach'a muq'uic te ay jtab ya'wilal te ochemic ta censo te la sbolc'optayone, ya me xlajic. Te sbaq'uetalique ya xjilic ta jochol taquin q'uinal.

³⁰ Ja' nax cuxul ya xjil stuquel te Caleb soc te Josué, ni jtuluc te ja'ex ya x'ochex ta q'uinal te c'an ba aq'uinalinic te jichuque.

³¹ Te anich'nabic te la awalic te ya yu'uninbeyex te acontroic, ya quic' bael stuquelic ta q'uinal te ma ba lec la awilic te ja'exe. Ja'ic me ya xba yaiybeyic te yutsilale.

³² Te abaq'uetalic ya me xjilic ta jochol taquin q'uinal.

³³ Te anich'nabic melmonel ya xbeenic ta jochol taquin q'uinal cha'winic (40) ja'wil. Jich ya stojbat te ma junuc awo'tanic te ja'exe, ja' to chican ya xlajex jilel li' ta jochol taquin q'uinal to.

³⁴ Ja'ex cha'winic (40) c'aal jalajex ta stsajtayel te q'uinale, jich nix me ya awich'ic castigo cha'winic (40) ja'wil, jujun ja'wil me ya xc'ot te jujun c'aale. Jich me ay ta na'el a te ma lecuc te mach'a ya scontroinone”, uta me.

³⁵ Jo'on Ajwalilon, ya cal te jich ya jpasbey te lum te c'ax ma lecuc yo'tanic, te jun yac'oj sbaic ta scontroinbelonique. Li' ta jochol taquin q'uinal ya me xc'ot slajibal c'aal yu'unic, ya me xlajic jilel”, uta me —xi' te Cajwaltique.

Lajic lajuntul jtsajtaywanejetic te amenic

^36-37 Te winiquetic te la sticun bael Moisés ta stsajtayel te q'uinale, soc te ma lecuc jul yalbeyic sc'oplal, te jich la yac' jajch'uc ta c'op te lume, te Cajwaltic la yac' lajuc ta tulan chamel.

³⁸ Spisilic lajic, ja' nax cuxulic jilel te Josué soc te Caleb.

Israeletic la yich'ic tsalel ta Horma

³⁹ C'alal Moisés la yalbey te israeletic te bila la yal te Cajwaltic, spisilic bayal la smel yo'tanic yu'un.

⁴⁰ Ta yan c'aal jajch'ic ta buen sab, moic ta bay toyol witstiquil, jich la yalic: —Li' ayotiquix to. Ya xbootiquix ta bay q'uinal te yalojbotic te Cajwaltique. Ta mero melel jtaojtic nix jmultic a —xiic.

⁴¹ Ja'uc me to, te Moisés la yalbey: —¿Bi yu'un ya ac'axintaybeyic smandal te Cajwaltique? Te bit'il jich ay awo'tanic, ma ba lec ya xc'oex ta loq'uel soc.

⁴² Ma me xbaex xan, melel ma ba ya sjoinex bael te Cajwaltique. Te acontro ya me stsalex.

⁴³ Ya me smaliyex te sts'umbal Amalec soc te cananeoetic, ya me yac'beyex guerra soc ya me smilex. Ja' yu'un te la awijq'uitay ta awo'tanic te Cajwaltic, jich ma ba sjoinejexix —xi' te Moisese.

⁴⁴ Ja'uc me to, jelawic bael stuquelic, moic bael ta bay toyol te witstiquile, pero te scajonil trato yu'un Cajwaltic soc te Moisés ma la stij sbaic jajch'el ta campamento.

⁴⁵ Jich yu'un loq'uic tel te sts'umbal Amalec soc te cananeoetic te nainemic tey a. La snutsic te israeletic ja' to c'alal ta lum Horma. Jc'axel la yich'ic tsalel.