Números 12 - Bible in Tzeltal de Oxchuc y Tenejapa

María soc Aarón la slabanic Moisés

¹ Te María soc Aarón jajch' slabanic Moisés, yu'un nujbinem soc etiope-ants.

² Soc la yalic xan: —Te Cajwaltic ma ja'uc nax c'opojem soc Moisés, sc'oponejotic uuc te jo'otique —xiic. Ta spisil la yaiy stojol te Cajwaltique.

³ Ta mero melel te Moisés peq'uel yac'oj sba, c'ax jich te bit'il spisil a te yantic te ayic ta q'uinale.

⁴ Jich yu'un te Cajwaltic la yalbey te Moisés, Aarón soc te María: —Baanic awoxebalic ta Nailpac' te bay ya quich' c'oponel —xi' te Cajwaltique. Jich bajt'ic yoxebalic.

⁵ Te Cajwaltic coj tel ta pimil tocal, tey la yac' sba ta yochibal te Nailpaq'ue. Ta ora la yic' te Aarón soc te María. Jich la stejc'an sbaic ta stojol

⁶ te Cajwaltic, soc jich albotic yu'un: —Aiya awaiyic stojol te bila ya calbeyex: Te c'alal ay jtul j'alwanej cu'un ta awolilic ja'ex, ya jc'opon ta swenta bitic ya cac'bey yil, soc ya jc'opon ta swaich.

⁷ Yan te cabat Moisés ma jichuc ya jpasbey stuquel. Jun yo'tan ta jtojol, c'ax jich a te bit'il spisil te yantic abatetic cu'une,

⁸ melel ya join jba ta c'op soc, chican ta lec te jc'op soque, ma ta señailuc nax. Jich yu'un te bit'il ya yilbon jsit, ¿bistuc ya atoy abaic ta slabanel? —xi' te Cajwaltique.

⁹ Te Cajwaltic ilin bayal ta stojolic, jich bajt'.

¹⁰ Te c'alal nax la sq'uej sba bael te tocal ta bay te Nailpac', te María tsacot jilel ta c'a'el-chamel, mero sac a bajt' te snujc'ulele. C'alal la sujt'es sba Aarón ta yilel te María, la yil te tsacbil ta c'a'el-chamel te snujc'ulele.

¹¹ La yalbey te Moisés: —Wocoluc, cajwal, ma xawac'botic castigo yu'un jmultic te la jpastic yu'un jboliltique.

¹² Ma xawac' te mero lajem ya xc'ot, jich bit'il alal te c'alal ma to x'ayin a te ya xloc' snujc'ulel te c'a'emix ya xc'ot ta loq'uel —xi' te Aarón.

¹³ Jich yu'un te Moisés la yalbey wocol te Cajwaltic: —Wocoluc, Dios cu'un, ya calbat wocol, ya me alamantesbey te xchamele —xi' te Moisese.

¹⁴ Te Cajwaltic la sjac': —Teme ya stubtaybey yelaw te state, ya me xq'uexaw juquebuc c'aal. Jich me c'oem. Ac'a yich' loq'uesel ta campamento juqueb c'aal, ta patil ac'a sujt'uc tel —xi' te Cajwaltique.

¹⁵ Jich yu'un te María la yich' loq'uesel bael ta campamento juqueb c'aal. Te lume ma'yuc bay beenic xan bael.

¹⁶ Te c'alal och xan ta campamento te María, jajch'ic loq'uel ta beel c'alal ta Hazerot. Tey la spas scampamentoic ta jochol taquin q'uinal Parán.