Números 10 - Bible in Tzeltal de Oxchuc y Tenejapa

Oq'uesetic pasbil ta plata

¹ Te Cajwaltic la sc'opon te Moisés, jich la yalbey:

² —Pasa cheb oq'uesetic ta plata, ya me apas ta martillo. Ja' ya xtuunic ta tsobel a te lume, soc ja' ya awac'bey seña a te bit'il ya xjajch'ic ta beele.

³ C'alal ya yich' oq'uesinel xchebal te oq'ues, spisil lum ya me stsob sbaic tel ta atojol ta yochibal te Nailpac' te bay ya quich' c'oponele.

⁴ Yan teme jun nax ya yich' oq'uesinel, yu'un ja' nax me ya stsob sbaic te mamaletic te jtsobwanejetic yu'un te chajbalchajp te lume.

⁵ Te c'alal ya yich' oq'uesinel te oq'uesetic te ya sjoin sba soc tulan awetic, yu'un me ja' ya xjajch'ic ta beel te mach'atic spasoj scampamentoic ta stojol sloq'uib c'aal.

⁶ Ta xchebal buelta oq'uesinel, ja' me ya xjajch'ic ta beel te mach'atic spasoj scampamentoic ta stojol sur. Te ya x'oq'uesinot oq'uesetic te ya sjoin sba soc awetic, ja' me señail te jajch'el ta beele.

⁷ Teme stuquel nax ya yich' oq'uesinel te oq'uesetic, ja' me seña te yu'un ya stsob sbaic te lume.

⁸ Te mach'atic ay ta swentaic yoq'uesinel te oq'uesetic, ja'ic me te sacerdoteetic te sts'umbal Aarón. Ja' me mandalil ta atojolic ta sbajt'el q'uinal.

⁹ “C'alal ya yac'beyex guerra te acontroic ta aq'uinalic, ya me xloq'uex ta yac'beyel guerra; oq'uesinaic te oq'uesetic, awunanic ta lec. Jich yu'un te Ajwalilon te Dioson awu'unic ya me jna'ex soc ya jcoltayex ta sc'ab te acontroique.

¹⁰ Soc oq'uesinaic oq'uesetic ta sc'aalelal sbujts' q'uinal ya awaiyic ta q'uin, o ja' te yach'il u, c'alal ya awaq'uic chic'bil majt'anil soc te majt'anil swenta seña te lamal-o'tanile. Jich te jo'on ya me jna'ex. Jo'on Ajwalilon te Dioson awu'unique —xi' te Cajwaltique.

Te israeletic la yijq'uitayic Sinaí

¹¹ Te jtab c'aal yajtalul a te xchebal u yu'un te xchebal ja'wil, jajch' loq'uel te tocal ta sba te Nailpac' yu'un te tratoe.

¹² Te israeletic jajch'ic ta beel, la yijq'uitayic jilel te jochol taquin q'uinal ta Sinaí, bajt'ic ta yan jochol taquin q'uinal Parán.

¹³ Jich te bit'il yaloj mandal Cajwaltic ta swenta Moisés,

¹⁴ ja' neel ayic ta beel te soldadoetic te yacalic ta beel soc te bandera yu'un Judá, te ja' jtsobwanej yu'unic te Naasón te snich'an Aminadab.

¹⁵ Ta stojol te soldadoetic yu'un te sts'umbal Isacar, tey been a te Natanael te snich'an Zuar.

¹⁶ Ta stojol te soldadoetic yu'un te sts'umbal Zabulón, tey been a te Eliab snich'an Helón.

¹⁷ Jich jajch'ic ta spaquel spac'al te Nailpac' Templo te mach'atic sts'umbal te Gersón soc Merari, te ja'ic te ay ta swentaic sq'uechel, jich jajch'ic ta beel.

¹⁸ Ja' nix jich jajch'ic ta beel te soldadoetic soc te bandera yu'un Rubén, te ja' jtsobwanej yu'unic te Elisur snich'an Sedeur.

¹⁹ Ta stojol te soldadoetic yu'un te sts'umbal Simeón, tey been a te Selumiel snich'an Zurisadai.

²⁰ Ta stojol te soldadoetic yu'un te sts'umbal Gad, tey been a te Eliasaf snich'an Reuel.

²¹ Patil bajt'ic te sts'umbal Coat te la yich'ic bael te ch'ul biluquetique. Te c'alal ya xc'otic, chapalix ch'ul awilal yu'unic a te ya xc'o staique.

²² Ta patil beenic te soldadoetic te ayic ta beel soc te bandera yu'un Efraín, te ja' jtsobwanej yu'unic te Elisama snich'an Amiud.

²³ Ta stojol te soldadoetic yu'un sts'umbal Manasés, tey been a te Gamaliel te snich'an Pedasur.

²⁴ Ta stojol te soldadoetic yu'un te sts'umbal Benjamín, tey been a te Abidán te snich'an Gedeoni.

²⁵ Ta slajibal te ayic ta spat te yantic soldadoetic, ja' te mach'atic ayic ta beel soc te bandera yu'un Dan, te ja' jtsobwanej yu'unic te Ahiezer te snich'an Amisadai.

²⁶ Ta stojol te soldadoetic yu'un te sts'umbal Aser, tey been a te Pagiel te snich'an Ocrán.

²⁷ Ta stojol te soldadoetic yu'un te sts'umbal Neftalí, tey been a te Ahira te snich'an Enán.

²⁸ Jich la xchol sbaic ta beel ta chajbalchajp te soldado-israeletic te c'alal jajch'ic ta beele.

Moisés la yic' sjoin sbal

²⁹ Ay jun c'aal te Moisés la yalbey te sbal Hobab, snich'an Reuel te madianil winique: —Te jo'otic ya xbootic ta lumq'uinal te yalojbotic Cajwaltic te ya yac'botique. La', joinawotic, jun me co'tantic ta atojol, melel te Cajwaltic yaloj ta jamal te buen lec yo'tan yu'un Israel —xi' te Moisés.

³⁰ Te Hobab la sjac': —Ma xju', ja' lec ya sujt'on bael ta jlumal ta bay te quermanotaque —xi'.

³¹ La yal ta sujel ta c'op te Moisés: —Ma sujt'at bael. Te ja'at awiloj bael ta lec te q'uinal ta bay ya sc'an ya jpas jcampamentotic ta jochol taquin q'uinal. Ja' me ya xtuunat cu'untic ta awic'belotic.

³² Teme ya ajoinotic bael, pajal ya jpucbey jbajtic spisil te bitic lec ya yac'botic te Cajwaltique —la yut te sbale. Jich bajt' soc.

³³ Jich la yijq'uitayic te wits yu'un Cajwaltic, beenic bael oxeb c'aal. Te scajonil trato yu'un Cajwaltic ja' neel bael yu'unic, yac ta sleel bael te banti ya xju' ya spas scampamentoic.

³⁴ Ta jujun c'aal, teme ya xloq'uic ta beel, te tocal yu'un Cajwaltic axintesbilic bael yu'un.

³⁵ Jujun buelta te c'alal ya xjajch'ic ta beel soc te cajón, te Moisés jich ya yal: —¡Jajch'an, Cajwal! ¡Ac'a spuc sbaic bael te acontrotaque! ¡Te c'alal ya yilat, ac'a anuquic bael! —xi' ta yalel.

³⁶ Yan, te c'alal ya xcom ta beel te cajón, jich ya yal te Moisés: —¡Sujt'an tel ta ora, Cajwal, ta stojol te soldadoetic yu'un Israel te ma xju'ix ta ajtayele! —xi'.