Nehemías 8 - Bible in Tzeltal de Oxchuc y Tenejapa

¹ Ta spisil te lume, comon la stsob sbaic ta plaza te snujp'usitayej sba soc te yochibal lum Ja' sbiil. La yalbeyic te maestro Esdras: —Ich'a tel te slibroil te mandaliletic yu'un Moisés te la yalbotic te Cajwaltic te jo'otic te israelotique —la yutic.

² Ta sbabial c'aal sjajch'el a te sjuquebal u, te sacerdote Esdras la yich' bael ta tsoblej te libro yu'un te mandaliletique. La stsob sbaic antsetic winiquetic, ta spisilic te jayebic ya sna'iquix q'uinale.

³ Jajch' yil ta sab ja' to c'alal ta olil c'aal, la yilbey ta stojol spisilic. Tey la yil ta plaza te snujp'usitayej sba soc te yochibal lum Ja' sbiil. Ta spisilic te lume jun yo'tan la yaiyic te bila la yal te libro yu'un mandaliletic te la yich' ilel ta lecturae.

⁴ Te maestro Esdras tejc'aj ta sba plataforma te yich'oj pasel ta te', te ja' nix ya xtuun yu'un ae. Soc tey tec'ajtic ta swa'el a te Matatías, Sema, Anías, Urías, Hilcías soc Maasías. Ta xq'uexen tec'ajtic te Pedaías, Misael, Malquías, Hasum, Hasbadana, Zacarías soc Mesulam.

⁵ Te Esdras la sjam te libro ta stojol spisilic te lume, melel ja' toyol tejq'uel c'oel ta stojol yantic. Pero te c'alal la sjame, spisilic la stejc'an sbaic.

⁶ Jich te Esdras la yalbey yutsilal te Cajwaltique, ja' te Dios te Spisil ya xju' yu'une. Te lume stoyoj sc'abic ta spisilic a, la sjaq'uic, jich la yalic: “Jichuc, jichuc”, xiic. Ora la squejan sbaic soc la stinan sbaic coel c'alal ta lum ta swenta xch'uunel te Cajwaltique.

⁷ Te levitaetic Josué, Bani, Serebías, Jamín, Acub, Sabetai, Hodías, Maasías, Kelita, Azarías, Jozabed, Hanán soc Pelaía la xcholbeyic sc'oplal te mandaliletic ta stojol te lume. Te ants-winiquetique jun nax yawilic ta tejc'lej.

⁸ Te levitaetic mero tulan la yalic te bitic ay ta libro, ja' te mandaliletic yu'un te Diose; la sc'asesic swenta yu'un mero jamal chican ta aiyel a te bila la yal ta lectura.

⁹ Melel spisil te lum yacalic ta oq'uel yu'un te bi xi' la yaiyic te mandaliletique. Ja' yu'un te ajwalil Nehemías soc te maestro-sacerdote Esdras, soc nix te levitaetic te la yalbeyic yaiy sc'oplal te bila la yal te mandaliletique, la spasic ta mandal te lume. La yalbey yaiyic te ma ba ya smel yo'tanic yu'un, soc te manchuc ya x'oq'uique. Melel in c'aal to, ch'ultesbil yu'un te Cajwaltique ja' te Dios yu'unique.

¹⁰ Soc jich la yalbey te Esdrase: —Baanic ta swe'el te bila mero bujts'anic ta we'ele, uch'aic chi'il vino, soc ticunbeya swe'el uuc te mach'atic ma'yuc bila xchajbanejic yu'un ya swe'ique. Melel in c'aal to q'uin ta stojol te Cajwaltique. Ma me xamel awo'tanic ta stojol, melel te yutsil q'uinal ya caiytic yu'un te Cajwaltique, ja' quiptic stuquel —la yut.

¹¹ Ja' nix jich te levitaetic la scomic te lume. La yalbeyic te yacuc xch'abique, te ma ba ya x'oq'uique, melel in c'aal to q'uin ta stojol te Cajwaltique, la yutic.

¹² Ja' yu'un spisil te ants-winiquetic bajt'ic ta sna'ic ta we'el soc ta uch'el. Ba spucbey sbaic te swe'elique, jajch' spasic buen muc'ul q'uin, melel ja' yu'un te c'ot ta yo'tanic te bila ac'bot snopique.

Spasel q'uin swenta Nailwamal

¹³ Ta xchebal c'aal, ta spisilic te jwolwanej ta jujun na, soc te sacerdoteetic soc te levitaetique, la stsob sbaic soc te maestro Esdras, yu'un jajch' snopbeyic sc'oplal mandaliletic.

¹⁴ Tey ts'ibubil la staic a, te ay mandal yaloj Cajwaltic ta swenta Moisés: Ja' ta yorail te q'uin swenta xch'uunel Dios ya yich' pasel ta sjuquebal u, te israeletic ya me sc'an te ya xnainic ta nailwamal.

¹⁵ Ja' yu'un ta spisil juju-jpam lumetic soc ta Jerusalén, la yich' puquel ta alel te spisil ants-winiquetic ac'a loc'uc bael ta ja'maltic ta sleel yabenal olivo, arrayán, palmaetic o yantic te'etic te bayal yabenal ta sc'abe, swenta yu'un ya yich' pasel a te nailwamal yu'unique, jich nix te bit'il ts'ibubil ta mandaliletique.

¹⁶ Te ants-winiquetic loq'uic baele, yich'ojic sujt'el tel ja'mal yu'un ya spasic a te snailwamale. Tey la spasic ta ba na soc ta amaq'uetic, soc nix ta amac' yu'un templo, ta plaza ta yochibal lum Ja' sbiil, soc ta plaza ta yochibal lum Efraín te sbiile.

¹⁷ Ta spisilic te sujt'ic tel te ac'bot yijq'uitay slumalique, la spasic snailwamalic, soc ochic ta nainel tey a. Melel te c'alal cuxul ta q'uinal a te Josué snich'an Nun c'alal ora, ma'yuc yan jich yutsil yo'tanic ta spasel a te bit'il c'ot ta pasel ta ora in to. Mero bayal yutsil q'uinal la yaiyic yu'un.

¹⁸ Te q'uin la spasic ta swenta te Diose, jalaj juqueb c'aal. C'alal to ta xjajch'ibal soc c'alal ta slajibal te q'uine, te Esdras jujun c'aal la yawtaybey yaiyic te sc'op Dios ts'ibubil ta slibroil te mandaliletic yu'un te Diose. Ta swaxaquebal c'aal la yich' pasel tsoblej te mero bayal yutsil sc'oplale, jich nix bit'il costumbre jajch'em ta pasele.