Nehemías 6 - Bible in Tzeltal de Oxchuc y Tenejapa

Te scontrotac Nehemías la xchajp sc'opic ta muquen

¹ La jcha'pasix xan te joyob ts'ajq'ue. Ma'yuc banti jamalix jilel, manchuc teme ma to ochemuc a te spuertaile. C'alal la yaiyic te Sanbalat soc te Tobías soc te Gesem te árabe-winic, soc nix te yantic jcontrotic,

² la sticunbonic c'op te Sanbalat soc Gesem, swenta yu'un ya laj jtsob jbajtic ta bay junuc yawil te ay ta stenlej xatal ta Onó. Pero te bila chapal yu'unique, yu'un ya sc'anic te ay bila amen ya spasbonique.

³ Te jo'one la jticun abatetic te bajt'ic ta alel te ma ba jocholone, te ay at'el te mero bayal sc'oplal ta co'tan yacon ta spasele, te ja' yu'un ma ba ya xju' ya xboone. Melel quechel ya xjil te at'el teme ya quijq'uitay jilel ta scaj te sc'opique.

⁴ Chaneb buelta la sticunbonic ta alel te c'opetique. Jun nax sc'oplal te bitic ya yalbonique, pero ja' nix jich jun nax te bila la jsutbeyic bael ae.

⁵ Ja' yu'un te Sanbalat la sticunbon carta ta yo'ebal buelta te c'op in to. La sticunbon ta aq'uel yu'un jtul yabat, pero jamal te cartae.

⁶ Jich la yal ta jun: “Yacalic ta yalel te winiquetic, soc jich nix ya yal te Gesem, te ja'at soc te judioetic te yacalex ta xchapel te ya atoy abaique. Ja' laj yu'un yacal ta cha'pasel xan te joyob ts'ajq'ue. Soc jich chican ta alel te ja'at laj ya x'ochat ta muc' ajwalil yu'unic.

⁷ Soc ay laj la aleix j'alwanejetic yu'un Dios, swenta yu'un ya yac'bat awat'el ta muc' ajwalil ta Jerusalén. Jich ay ya yaliquix te ayix muc' ajwalil ta Judá. ‘Ja' in c'opetic to, ma wocoluc ya xc'ot ta stojol te muc' ajwalil Artajerjes’, xoon. Ja' yu'un la' me jiche, swenta yu'un ya xc'opojotic ta jchebaltic”, xi' te ts'ibubile.

⁸ Te jo'one la jticunbey sujt'ib. La calbey te ma meleluc in c'opetic to, yu'un ja' nix snopoj ta yo'tan te bila yacal ta yalele.

⁹ Melel yo'tanicuc ya xiwtesotic ta sc'opic. Scuyojic te ya xpejc'aj co'tantique, soc te ma ba ya ju'testic ta pasel te at'ele. Pero te jo'one, mero la cac' xan puersa ta spasel te at'ele.

¹⁰ Patil boon ta sna Semaías snich'an Delaía, smam Mehetabel, te smacoj sba ta snae. Jich la yalbon: —Ja' lec ya jtsob jbajtic ta templo yu'un Dios ta yutil ch'ul awilal. Ya me jmactic te sti'e. Melel in ajc'ubal to, snopojic te ya xtalic yu'un ya smilate —xi'.

¹¹ Pero jich la calbey: —Te jo'one ma x'anon, soc ma x'ochon ta templo yu'un ya jxi' milel. Te jo'one, ma ba ya jnac' jba ta templo —la cut.

¹² Soc la jna' te ma ta swentauc Dios te jich la yale, melel swenta quil-o'tantayel spisil in to. Melel boltesbot yo'tan yu'un te Sanbalat soc te Tobías.

¹³ Tojot, swenta yu'un ya xiwteson, soc swenta yu'un jich ya jta jmul ta stojol Dios ta sc'opic a. Jich me ya staic te bi ya yutic ya yaq'uic bolobuc jc'oplal a, soc swenta yu'un jich ma'yuconix ta wenta ya xc'oon ta sc'opic.

¹⁴ Ya cal ta stojol Dios: —Dios cu'un, na'a me te bila la spasic te Sanbalat soc Tobías. Soc ma me xch'ay ta awo'tan te Noadías te antsil-j'alwanej, soc nix te yantic j'alwanejetic te ya sc'an xiwtesonic ta sc'opique —xoon.

¹⁵ Te joyob ts'ajq'ue ju' ta pasel ta jo'eb xcha'winic (25) yajtalul a te u Elul. Ta spisil te at'ele jalaj lajchayeb yoxwinic (52) c'aal.

¹⁶ Te jcontrotique la yaiyic te ju'ixe. Spisilic te lumetic ayic ta sjoyobal te jq'uinaltique, bayal xiw yo'tanic yu'un. Pejc'aj te stoybailique, melel c'ot ta yo'tanic te ja' ta swenta bit'il ja' la scoltayotic te Dios cu'untic te ju' ta pasel cu'untic te at'ele.

¹⁷ Ja' nix yorail a te bayal la sticunbey sbaic carta te Tobías soc winiquetic te ich'bilic ta muc' ta Judá.

¹⁸ Melel ay bayal winiquetic ta Judá te la yalbeyic te jun yo'tanic ta stojol Tobías. Ja' yu'un te ja' snial te Secanías snich'an Ara. Yan te snich'ane, te Johanán sbiile, nujbin soc te yantsil-nich'an Mesulam snich'an Berequías.

¹⁹ Ja' yu'un buen lec sc'oplal yu'unic ya yalbonic, soc ya yalbeyic jujun buelta te bila la cale. Jich te Tobías la sticunbon cartaetic swenta yu'un ya xiwteson ta sc'op a.