Nehemías 5 - Bible in Tzeltal de Oxchuc y Tenejapa

Jajch' c'op yu'unic

¹ Te bila c'ot ta pasele jajch' tulan c'op yu'unic te lume soc te antsetic yu'unic ta stojolic te slumal nix sbaique, ja' nix te judioetique.

² Yu'un ay mach'atic la yalic te ay bayal queremetic soc ach'ixetic yal-snich'anique. Ja' yu'un puersa ya sleic trigo swenta yu'un jich ma xlajic ta wi'nal a.

³ Ay yantic la yalic ta scaj te ma'yuc swe'elic la yaq'uiquix ta prendal te sq'uinalique, sts'usubilic soc snaic.

⁴ Soc ay yantic la yalic te ay la smajaniquix taq'uin swenta yu'un ya stoj spatanic ta stojol a te muc' ajwalile ta swenta te sq'uinalic soc te sts'usubile. Soc la yalic xan:

⁵ —Te jo'otique pajal israelotic soc te jlumalique. Te cal-jnich'antique, pajal yilelic soc te yal-snich'anique. Pero te jo'otique puersa ya cac'tic ta mozoil te queremetic soc te ach'ixetic cu'untique. Ay baemiquix ta criadail te cantsil-nich'nabtique. Ma'yuc bi ya xju' ya jcoltaytic a, melel te jq'uinaltique soc te jts'usubiltique yan mach'atic yich'ojiquix —xiic.

⁶ C'alal la caiybey te swocolique, soc te bila la yalique, bayal ilinon yu'un.

⁷ C'alal la jnop ta lec, tulan la calbey te mach'atic ich'bilic ta muc' soc te jwentainwanejetique, ja' yu'un te jich la yac'beyic swocolic te mach'atic jun slumalic soque. Soc la jtsob ta spisilic, swenta yu'un ya calbey yaiyic te sc'oplalique.

⁸ Jich la calbey: —Te jo'otic, te bay c'alal ju'em cu'untic la cac'tiquix ta libre yu'un sbetic te jlumaltic judioetic, te chonbilic ta stojol yantic lumetic te ma ba xch'uunejic te cuxul Diose. ¿Yo'tic ja'ex bal ya awaq'uic ta mozoinel xan, swenta yu'un ya jcha'cac' xan ta libre jiche? —la cut. Lamajic bael yu'un, melel ma wejt' te bila la yalic yu'un te jc'ope.

⁹ Ja' yu'un jich la cal xan: —Te bila yacalex ta spasele, ma ba lec. Ya sc'an ya awaq'uic ta ilel te awich'ojic ta muc' te Dios cu'untique. Jich ma ba ya slabanotic a te mach'atic ma ja'uc xch'uunejic te cuxul Diose, te ja'ic te scontroinejotic stuquelique.

¹⁰ Ja' nix jichic te mach'atic ay cu'une, soc te jcoltaywanej ta at'el cu'une, soc te jo'one, cac'ojbeytic smajanic taq'uin soc cac'ojbeytic sjelic trigo, ja' yu'un ya me jpasbeytic perdón te sbetic cu'untique.

¹¹ Wocoluc me jiche, sutbeyaic me yo'tic nix te sq'uinalique, te sts'usubilique, te olivoiltic yu'unique soc te snaique, soc lajinbeyaic sc'oplal te sbetic awu'unique, teme taq'uin, trigo, vino o aceite —la cut.

¹² Jich la yalic: —Ya me jsutbeytic spisil, ma ba ya jtabeytiquix ta alel. Mero jich me ya jpastic te bit'il la awalixe —xiic. Ja' yu'un la quic'tic tel te sacerdoteetique. La cac'bey yalic ta jamal ta stojol te sacerdoteetic te bila ya spasique.

¹³ Soc xan la jlilin te jc'u'e, jich la cal: —Jich ac'a yich' lilanel loq'uel yu'un Dios ta sna soc ta sq'uinal spisilic te mach'atic ma ba ya yaq'uic c'otuc ta pasel te bitic jc'axel la yaliquixe. Jich ac'a yich'ic pojel spisil te bitic ay yu'unic ta ora in to —xoon ta stojolic. Ta spisilic te winiquetic la sjaq'uic: —Jichuc —xiic. Soc la yalbeyic yutsil sc'oplal te Cajwaltique. Te jlumal la spasic te bila la yalique.

Yutsil yo'tan Nehemías

¹⁴ Te c'alal jtab ja'wil yat'el ta muc' ajwalil a te Artajerjes, la yac'bon cat'el ta ajwalil ta sq'uinal Judá. Lajchayeb ja'wil at'ejon ta ajwalil, pero ni jo'ucon, soc ni ja'uquic te jo'tac ta at'ele, ma'yuc la quich' te jcoltayel sc'oplal ya quich' te bit'il ochemon ta ajwalil.

¹⁵ Pero te yantic ajwaliletic te neel c'axique, mero bayal la yac'beyic swocol te yajwal te lume. Melel ta jujun c'aal la sc'anbeyic cha'winic (40) ta jsejp plata, swenta yu'un ya sman swe'elic a soc yu'un ya sman te bila ya yuch'ic a. Soc ma ja'uc nax, jichic te abatetic yu'unique, ay swocol yu'unic te yajwal lume. Pero te jo'one, ma jichuc la jpas, melel ay ta co'tan te ya x'ich'ot ta muc' cu'un te Diose.

¹⁶ Soc la jc'otes ta pasel te cat'el, ja' te la jcha'pasbey xan te sjoyob ts'ajc'ul te lume. Ma'yuc la jman jq'uinal te jo'one. Jichic uuc te jo'tac ta at'ele, at'ejic ta spasel te at'ele.

¹⁷ Ta jmesa ay we'ic asta lajuneb swaxacwinic (150) winiquetic, ay judioetic te jlumaltic nixe, soc te j'at'eletic yu'un te ajwalile. Ma ba ajtaybil stuquel te mach'atic ya xtal yula'tayotic te talemic ta yantic lumetic te nopol ayotic soque.

¹⁸ Te we'elil la yich' chajbanel cu'un swenta jujun c'aale, ja'ic in to: jcojt' jujp'en wacax, waqueb te mero t'ujbil chijetique, soc mutetic, soc ta jujun lajlajuneb c'aal ya xjul bayal vino cu'un. Manchuc me jich abi, pero ma'yuc bi ora c'opojon yu'un te jcoltayel yu'un te bit'il ayon ta ajwalil. Melel mero bayalix yalal yijc'ats ya xc'otic yaiyel a te yajwal te lum in to.

¹⁹ Ya cal ta stojol Dios: —Dios cu'un, ich'bon me ta wenta yu'un cutsilal spisil te bitic la jpasbeyix ta stojol te lum in to —xoon.