Nehemías 3 - Bible in Tzeltal de Oxchuc y Tenejapa

La yich' puquel te at'ele

¹ Te muc' sacerdote Eliasib soc te sjo'tac ta sacerdoteile la xcha'pasic xan te yochibal lum Chijetic sbiile. La yac'beyic ste'el, soc la yac'beyic sti'. Soc la xcha'pasic xan te joyob ts'ajq'ue, jajch' tel ta toyol ts'ajc' te Jo'winic sbiile, c'ot c'alal ta toyol ts'ajc' te Hananeel sbiile.

² Te jmajc' joyob ts'ajc', ja' la spasic te winiquetic ta Jericó. Te yan jmajc' ja' la spas te Zacur snich'an Imri.

³ Te sts'umbal te Sanaa la xcha'pasic xan te yochibal lum Chayetic sbiil. La yac'beyic ste'el soc la yac'beyic sti' soc syaweal soc pasador te ya x'och ta spat te sti'e.

⁴ Te yan jmajc' joyob ts'ajq'ue, ja' la spas te Meremot snich'an Urías, smam Cos. Te yan jmajc' ja' la spas Mesulam snich'an Berequías, smam Mesezabeel. Te yan jmajc' ja' la spas Sadoc snich'an Baana.

⁵ Te yan jmajc' te joyob ts'ajq'ue ja' la xcha'spasic te yajwal Tecoa, manchuc teme te mach'atic ich'bilic ta muq'ue ma ba la sc'an scoltayic te jwolwanejetic yu'unique.

⁶ Te Joiada snich'an Paseah soc Mesulam snich'an Besodías la xcha'pasic xan te yochibal lum Jesana sbiile. La yac'beyic ste'el, soc la yac'beyic sti' soc syaweal soc pasador.

⁷ Te yan jmajc' joyob ts'ajq'ue, ja' la xcha'pasic xan te Melatías talem ta Gabaón soc Jadón talem ta Meronot, soc te winiquetic ta Gabaón soc ta Mizpa. Ja' in lumetic to ayic ta swenta a te ajwalil yu'un te q'uinal te ay ta smalib c'aal yu'un te muc'ja' Eufrates.

⁸ Te yan jmajc' joyob ts'ajq'ue, ja' la xcha'pas xan Uziel snich'an Harhaía, ja' te ya spas biluquetic ta plata. Te yan jmajc', ja' la xcha'pas xan Hananías, ja' te jpas-perfume. Ta xchebalic la spasic xan te sjoyob ts'ajc'ul Jerusalén c'alal ta pimil joyob ts'ajc'.

⁹ Te yan jmajc', ja' la xcha'pas xan Refaías snich'an Hur, te ja' ajwalil yu'un te olil smaquen q'uinal te Jerusalén.

¹⁰ Te yan jmajc', ja' la spas xan Jedaías snich'an Harumaf, yu'un ay bael ta sti' sna. Te yan majc' ja' la spas xan Hatús snich'an Hasabnías.

¹¹ Malquías snich'an Harim soc Hasub snich'an Pahat-moab ja' la xcha'pasic xan te toyol ts'ajc' yu'un Hornos.

¹² Te yan majc', ja' la xcha'pasic xan soc yantsil-nich'nab te Salum snich'an Halohés, te ja' ajwalil yu'un te olil xan smaquen q'uinal te Jerusalén.

¹³ Hanún soc mach'atic ay snaic ta Zanoa la spasic xan te yochibal lum Stenlej Xatal Q'uinal sbiile, soc la yac'bey sti' soc syaweal soc pasador. Soc la xcha'pasic xan lajuneb yoxwinic xcha'bajc' (450) metro te joyob ts'ajq'ue, c'ot yu'unic c'alal ta yochibal lum Ch'ayjibal C'a'pal sbiil,

¹⁴ Malquías snich'an Recab, ajwalil yu'un te smaquen q'uinal ta Bet-haquerem, la xcha'pas xan te yochibal lum Ch'ayjibal C'a'pale sbiile, soc la yac'bey sti' soc syaweal soc pasador.

¹⁵ Salum snich'an Colhoze, ajwalil yu'un te smaquen q'uinal Mizpa, la xcha'pasbey xan te yochibal lum Sloq'uibja' sbiile. La xcha'pas xan, soc la spasbey yaxibal, soc la yac'bey sti' soc syaweal soc pasador, soc la xcha'pas xan te sts'ajc'ul te estanque yu'un Siloé, te nopol ay soc Ts'unbil Nichimaltic yu'un muc' ajwalil, c'alal ta cajal caj tejc'abal te coem tel ta muc'ul Lum-yu'un-David.

¹⁶ Nehemías snich'an Azbuc, ajwalil yu'un te olil smaquen q'uinal Bet-sur, ja' la spas xan te jmajc' joyob ts'ajq'ue, c'alal ta yelawal yu'un smuquenal David, c'alal ta stsobjibal ja' soc c'alal ta sna soldadoetic.

¹⁷ Te yan jmajc', ja' la xcha'pasic te levitaetique: ja' te Rehum snich'an Bani. Soc te jich xan baele, ja' la spas te Hasabías, te ajwalil yu'un te olil smaquen q'uinal Keila, ja' la spas ta swenta te smaquen q'uinale.

¹⁸ Te yan jmajc', ja' la xcha'pasic xan te sjo'taque: ja' te Bavai te snich'an Henadad, te ajwalil yu'un te yan olil xan smaquen q'uinal Keila;

¹⁹ soc te Ezer snich'an Josué, te ajwalil yu'un Mizpa, ja' la xcha'pas xan uuc te jmajq'ue, ja' ta yelawal yu'un te moel ta banti ya yich' tsobel at'ejibaletic yu'un guerra ta xujc' te sts'ajq'ue.

²⁰ Te yan jmajc' ja' la spas te Baruc snich'an Zabai, jajch' ta xujc', c'ot yu'un c'alal ta sti' sna Eliasib, ja' te muc' sacerdote.

²¹ Te Meremot snich'an Urías, smam Cos, ja' la xcha'pas xan te jmajq'ue, jajch' yu'un ta sti' sna Eliasib, c'ot c'alal ta slajibal te sna Eliasib.

²² Te yan jmajc' joyob ts'ajq'ue, ja' la xcha'pasic xan te sacerdoteetic te nainemic ta stenlej xatal q'uinal yu'un Jordán.

²³ Soc xan bael, te Benjamín soc Hasub la xcha'pasic xan jajch'el te joyob ts'ajc' ta elawal yu'un te snaique. Te yan jmajc', ja' la spas te Azarías snich'an Maasías, smam Ananías, la xcha'pas xan te banti pajal ay soc snae.

²⁴ Te yan jmajc', ja' la xcha'pas xan Binuy snich'an Henadad, jajch' tel ta sna Azarías, c'ot yu'un c'alal ta banti spuxoj sba ta xujc' te ts'ajq'ue.

²⁵ Te yan jmajc' joyob ts'ajq'ue, ja' la xcha'pas xan jajch'el te Palal te snich'an Uzai. Ja' la spas te yelawal yu'un xujc' te ts'ajq'ue, soc nix te toyol ts'ajc' c'axem c'axel ta sba te sts'ajc'ul sna ajwalile, ja' te ay ta yamaq'uil te banti ya x'ain jcanantaywanej-soldadoetic yu'une. Te yan jmajc', ja' la xcha'pas xan te Pedaías, te snich'an Faros.

²⁶ C'ot yu'un c'alal ta elawal yu'un te yochibal lum Ja' sbiil, ta stojol sloq'uib c'aal, soc nix te c'axem stoyolil ta sbae. (Te mach'atic nainemic ta Ofel, ja'ic a te abatetic yu'un templo.)

²⁷ Te mach'atic talemic ta Tecoa, ja' la xcha'pasic xan te yan jmajq'ue. Jajch' yu'unic ta elawal yu'un muc' toyol ts'ajc' te c'axem stoyolile, c'ot c'alal ta sjoyob ts'ajc'ul Ofel.

²⁸ Te sacerdoteetique la xcha'pasic xan te joyob ts'ajq'ue. Ta juju-jtul la spasic te ay ta yelawal yu'un snaique, jajch' tel yu'unic ta yochibal lum Caballoetic.

²⁹ Te yan jmajc', ja' la xcha'pas te Sadoc snich'an Imer, ja' me la spas te ay ta yelawal yu'un te snae. Te yan jmajc', ja' la spas xan te Semaías te snich'an Secanías, ja' te jcanan-ti'nail yu'un te yochibal lum Sloq'uib C'aal sbiile.

³⁰ Patil la xcha'pas xan bael jmajc' xan te Hananías snich'an Selemías soc Hanún, te swaquebal snich'an Salaf. Te yan jmajc', ja' la spas te Mesulam snich'an Berequías, ja' la spas te banti yelawal yu'un te snae.

³¹ Malquías, te ya x'at'ej ta plata, ja' la xcha'pas xan bael jmajc' xan te joyob ts'ajq'ue, c'alal ta sna te abatetic ta templo soc te sna jchonbajeletic, te ay ta yelawal te yochibal lum te Oclinwanej sbiil, c'alal ta yawil j'il-q'uinal ta xujc' ts'ajc'.

³² Te j'at'eletic ta plata soc te jchonbajeletic la spasic xan bael te jmajq'ue. Jajch' yu'unic ta yawil j'il-q'uinal ta xujc' te ts'ajq'ue, c'ot yu'unic c'alal ta yochibal lum Chijetic sbiil.