Nehemías 2 - Bible in Tzeltal de Oxchuc y Tenejapa

Artajerjes la yac' bael ta Jerusalén Nehemías

¹ Jun c'aal ta u te Nisán sbiile, te ayix jtab ja'wil yat'el ta muc' ajwalil a te Artajerjes, te c'alal yacon ta sc'asesel te bila ya yuch', la yilon te muc' ajwalil te mero jmeloj co'tane.

² La sjojc'obon te muc' ajwalile, jich la yalbon: —Mero ameloj awo'tan ya quil. ¿Bi la apas? Ma'yucat ta chamel ya quil, ja'uc me to puersa yu'un ay falta awu'un yo'tic —la yuton. Ta ora nax, tal bayal xiwel ta co'tan yu'un.

³ Jich la calbey te muc' ajwalile: —¡Stalel cuxul te awat'el, muc' ajwalil! ¿Pero bit'il ma ba ya jmel co'tan? Melel jinemix te lum te banti muculic te jme'-jtate, soc lajem ta chiq'uel te spuertaile —la cut.

⁴ —¿Bi ya xju' ya jpasbat ta awenta? —xi' ta sjojc'oyel te muc' ajwalile. La jc'opon ta co'tan te Dios ta ch'ulchane.

⁵ La jac'bey te sc'op te muc' ajwalile: —Teme lec ya awaiy te bila ya cal ta atojole, teme la ana'bonix yo'bolil jbae, ya jc'anbat ta atojol te ja'at te muc' ajwalilate, te yacuc aticunon bael ta Judá, tey ta lum te banti muculic te jme'-jtate, swenta yu'un ya jcha'pas xan —xoon.

⁶ Te muc' ajwalil, soc te tey nacal ta xujc' a te yiname, la sjac'bon te jc'ope, jich la yal: —¿Jayeb c'aal ya xjalajat te ya xbaate? ¿Bi ora ya sujt'at tel? —xi'. Te jo'one la calbey te bi ora ya sujt'on tele. Lec la yaiy, jich la yac'on bael.

⁷ Soc la calbey xan: —Te lecuc ya awaiye, yacuc awac'bonic jun te banti ts'ibubil te amandale, swenta yu'un ja' ya xc'ot ta sc'abic te ajwaliletic te ayic ta stojol smalib c'aal yu'un muc'ja' Eufrates, swenta yu'un libre ya yac'onic c'axel c'alal ta Judá.

⁸ Soc yan xan jun ts'ibubil yu'un ya xc'o cac' ta stojol Asaf te ja' jcanan-te'etic yu'un te muc' ajwalile, swenta yu'un yacuc yac'bon te' swenta yu'un ya me cac'bey xan te spuertail te toyol ts'ajc' yu'un te templo, soc nix te sjoyob ts'ajc'ul te lume, soc nix te na banti ya xnainone —la cut. Te muc' ajwalile spisil la yac'bon, melel ja' nix te Dios cu'un te la scoltayon ta c'op ta swenta te yutsil yo'tane.

⁹ C'alal c'oon ta stojolic te ajwaliletic te ayic ta stojol smalib c'aal yu'un Eufrates, la cac'bey te cartaetic yu'un te muc' ajwalile. Ja' nix te muc' ajwalil te la sticunbon join jchajp soldadoetic te cajajtic ta caballoetic te wentainbilic yu'un te capitanetic yu'unic.

¹⁰ Pero c'alal la yaiyic te Sanbalat te talem ta Horón, soc te Tobías te amon-winic te yich'oj yat'ele, bayal jajch' slab yo'tanic yu'un te ay mach'a c'otix te ay sc'oplal ta yo'tan te ya scoltay te israeletique.

Ya yich' xan pasel te joyob ts'ajc'

¹¹ C'oon c'alal ta Jerusalén. Ta yoxebal c'aal c'oel tey a,

¹² jajch'on ta ajc'ubal, joinej cha'oxtul winiquetic, pero ma'yuc mach'a la calbey te bila la yalbon ta co'tan Dios te ya yich' pasel ta Jerusalén. Ma'yuc yan burro quic'oj ta beel, jip a te moemon ae.

¹³ Ja' nix ta yorail a ta ajc'ubal, loc'on bael ta yochibal lum Stenlej Xatal Q'uinal sbiil ta stojol bael sloq'uibja' Dragón sbiil soc ta stojol yochibal lum Ch'ayjibal C'a'pal sbiil. La coclin ta lec te sjoyob ts'ajc'ul Jerusalén jineme, soc te sti' chic'bile.

¹⁴ Patil boon xan ta stojol yochibal lum Sloq'uibja' sbiil soc ta yawil ja' te Muc' Ajwalil sbiile, pero te jburroe ma ba ju' c'ax tey a.

¹⁵ Ijc' to a moon bael ta xch'ixil te beja'e. Patil c'alal la coclin beel te sjoyob ts'ajc'ul te lume, sujt'on tel, cha'ochon xan ta bay yochibal lum Stenlej Xatal Q'uinal.

¹⁶ Te jwentainwanejetic ma ba la sna'ic banti c'oon, soc ni yacuc sna'ic te bila yacalon ta spasel. C'alal ora, ni ma ba calojbey te judioetic, ja' te sacerdoteetic, soc te mach'atic ich'bilic ta muc', te jwentainwanejetic, soc te yantic winiquetic te ya spasic te at'ele.

¹⁷ Ja' yu'un jich la calbey: —Ja'ex ana'ojic ta lec te ayotic ta wocol ta mero melel. Te Jerusalén mero jinem te sjoyob ts'ajc'ule, soc c'ajq'uemic te sti' ts'ajc'ule. La', jyom jbajtic, la', jpastic te sjoyob ts'ajc'ul te Jerusalén, swenta yu'un ma ba ya quich'tiquix labanel a —xoon.

¹⁸ Te c'alal la calbey yaiyic te bit'il mero ay yutsil yo'tan te Dios te la scoltayone, soc te sc'op te muc' ajwalil la yalbone, la sjac' spisilic, jich la yalic: —Jajch'tic ta cha'pasel xan te jlumaltique —xiic. Ta mero spisil yo'tanic talel c'axel la sjoin sbaic ta at'el.

¹⁹ Pero c'alal la yaiyic te Sanbalat te talem ta Horón, soc Tobías te amon-winic te yich'oj yat'ele, soc te Gesem te árabe-winique jajch'ic ta labanwanej ta jtojoltic. Jich la yalbotic swenta ilayel: —¿Bi yacalex ta spasel? ¿Yu'un bal ya anopiquix te ya x'och atoyix abaic ta stojol te muc' ajwalile? —xiic c'oel ta labanwanej.

²⁰ Pero jich la calbey: —Te Dios ta ch'ulchane lec me ya xc'ootic yu'un. Te jo'otique yabatotic, ya xjajch'otic ta xcha'pasel xan te Jerusalén. Te ja'exe ma'yuc awat'elic, soc ma awentauc, soc ma alumaluc te Jerusalén —la cut.