Nehemías 13 - Bible in Tzeltal de Oxchuc y Tenejapa

Nehemías la stojtes bitic ya sc'an pasel

¹ Ja' yorail in to, la yich' ilel ta comonsitil te libro yu'un Moisés. Tey la yich' tael a te ts'ibubil te bit'il te amonetic soc moabetic te ma'yuc bi ora ya xju' te jun ya xc'ot soc te lum yu'un te Diose.

² Melel ma ba loq'uic bael ta yaq'uel swe'el-yuch'elic te namey israeletique. Melel ja'ic stuquelic la stojic te Balaam te la sc'opon Dios yu'un ya xc'anbotic castigo ta stojolique, manchuc teme Dios la sc'atp'un ta bendición te castigo c'anbot ta stojolique.

³ Ja' yu'un te c'alal la yaiyic te israeletic te bila la yal te mandaliletic, la sloq'uesic ta stojol spisilic te mach'atic scapojix sbaic soc jyanlumetique.

⁴ Te sacerdote Eliasib, te ay ta swenta te stsobjibal biluquetic ta templo yu'un te Dios cu'untique, ja' xchapomal sba soc te Tobías.

⁵ Ja' yu'un la yac'bey ta swenta jun muc'ul cuarto, ja' te banti la yich' q'uejel smajt'an Dios ta neelal toe, ja'ic te pom, spisil bitic ya xtuun ta templo, soc te diezmoetic yu'un trigo, vino soc aceite te albil mandal ya yich' aq'uel te levitaetic soc te jc'ayojetic soc te jcanan-ti'nailetic. Soc la yich' q'uejel ta neelal to tey a te patanetic yu'un ya yich'ic te sacerdoteetique.

⁶ Te bi ora jich c'ot ta pasel spisile, ma ba ayon ta Jerusalén a, melel ta lajchayeb xcha'winic ja'wil yat'el ta muc' ajwalil a te Artajerjes, te muc' ajwalil ta Babilonia, cha'boon xan ta stojol. C'alal c'axix c'aal, la jc'anbey permiso te muc' ajwalile.

⁷ Jich sujt'on xan tel ta Jerusalén. Jich ora la jna' te bila amen yac ta spasel te Eliasib ta spasbeyel sc'anjel yo'tan te Tobías, ja' te la yac'bey ta swenta jun cuarto te ay ta scorredoril te templo yu'un te Diose.

⁸ Mero ma ba la jmulan te jich c'ot ta pasele. Ja' yu'un la jloq'uesbey tel ta yutil cuarto te biluquetic yu'un Tobías.

⁹ Ora la cal mandal te ya yich' lecubtesele, soc te ya xcha'aq'uic xan ta yawil te bitic ya xtuun ta templo yu'un Dios soc te smajt'an Dios soc te pome.

¹⁰ Soc la caiy te ma ba ya yich' aq'uel swe'elic te levitaetique. Ja' yu'un te levitaetic soc jc'ayojetic swentainejic spasel te bila swenta yich'el ta muc' te Diose, bajt'iquix ta anel ta sq'uinalic ta juju-jtul.

¹¹ Ja' yu'un la calbey ta tulan te jtsobwanejetique: —¿Bi yu'un te ch'aybilix awu'unic te templo yu'un te Diose? —la cut. Patil la jtsob te sacerdoteetic soc te levitaetique, la cac'tic xan ta yat'el ta templo.

¹² Spisil Judá la yich'ic tel te diezmo yu'un trigo, vino soc aceite, la yaq'uic ta banti stsobjibal ta templo.

¹³ Te c'alal jich la jpase, la cac'bey swentain te tsobjibaletic yu'un te biluquetic ta templo te sacerdote Selemías soc te secretario Sadoc, soc jtul levita-winic te Pedaías sbiil. La cac' ochel ta coltaywanej yu'unic te Hanán te snich'an Zacur, smam Matanías, melel ay smuc'ul co'tantic ta stojolic ta spisilic. Ja' me ya swentainic spucbeyel te sjo'taque.

¹⁴ Ya cal ta stojol Dios: —Dios cu'un, ich'bon me ta wenta te bila yacon ta spasel in to. Ma me xch'ay ta awo'tan te bitic lec la jpas ta swenta te templo awu'une, soc te abatinel ta atojole —xoon.

¹⁵ Ja' nix ta yorail a la quil ta sq'uinal Judá te ay mach'atic ya st'us ta yacanic sts'usubic yu'un vino ta sc'aalelal cux-o'tanil, soc la scuchic tombil trigoetic, te burroetic yu'unique la yac'beyic scuch vino, soc chexelchex ts'usubetic, soc higoetic soc ta spisil te ijc'atsiletic. Ta sc'aalelal cux-o'tan la yich'ic bael ta Jerusalén. Ja' yu'un la calbey ta sit te ma xyaiyic chonbajel a ta c'aal in to.

¹⁶ Soc yan xan, ay yajwal lumetic ta Tiro te nainemic ta Jerusalén te la yich'ic ochel chay, soc ta spisil ta jchajp te bila ay ta chonel. La xchonbeyic ta sc'aalelal cux-o'tan te judioetic ayic ta Jerusalén.

¹⁷ Ja' yu'un jich ora la calbey ta sit te jwolwanejetic ta Judá: —¿Bi yu'un te ya apasic te bila amene, te ya awac' bolobuc sc'oplal te sc'aalelal cux-o'tane?

¹⁸ Mero ja' nix jich la spasic te antiguo ame'-atatique. Ja' yu'un te Dios cu'untique la yac' taluc bayal woclajel ta jtojoltic, soc ta stojol te lum in to. ¿Bi yu'un ya awaq'uic toyuc xan yilimba ta stojol Israel te Dios te yacal ajinbelic sc'oplal te sc'aalelal cux-o'tane? —la cut.

¹⁹ Jich la cal tulan mandal, ta mal c'aalil te c'alal nopol te ya x'ijc'ub q'uinale, te ja'ix yorail sc'aalelal cux-o'tan a, ac'a yich' maquel te spuertail Jerusalén. Ma ba ya yich' jamel ja' to c'alal c'axix a te sc'aalelal cux-o'tane. Soc ay la cac' ta yochibal lum abatetic cu'un, swenta yu'un ma xyaq'uic ochel junuc ijc'atsil ta sc'aalelal te cux-o'tane.

²⁰ Te jp'olmaletic, te jchonbajeletic, bayal buelta c'ax yu'unic ajc'ubal ta spat sts'ajc'ul te Jerusalén.

²¹ Pero jo'on la calbey ta tulan, te mach'atic ya xc'ax ajc'ubal yu'unic ta spat te joyob ts'ajc' te ma xju' ya xtaliquixe. Teme ya to xtalic xane, ya me yich'ic tsaquel. Jich ma'yuquix bi ora c'otic xan yan buelta ta sc'aalelal cux-o'tan.

²² Patil la calbey mandal te levitaetic te ya slecubtes sbaic ta stojol Dios, soc te ya xba scanantayic te yochibal lum, swenta yu'un jich ma xbolob sc'oplal a te sc'aalelal cux-o'tane. Ya cal ta stojol Dios: —Dios cu'un, na'awon yu'un te bila la jpase, na'bon me yo'bolil jba ta swenta te yutsil awo'tane —xoon.

²³ Soc ta c'aal in to, la quil te ay judioetic te nujbinemic soc asdod-antsetic, amon-antsetic, soc moab-antsetic.

²⁴ Olil te yal-snich'nabic ja' sc'opinejic te sc'op Asdod soc sc'op yantic nacionetic, pero ma sna'beyic te sc'op judioetique.

²⁵ La cut yu'un, soc la calbey te buen amenique. Ay la jmaj, soc la jbulbey stsotsil sjolic. La cac' puersa te jc'axel ya yalic ta jamal ta stojol Dios te ma'yuc bi ora ya yaq'uiquix permiso te ya xnujbin xan soc jyanlumetic te yantsil-nich'nabic; soc ma ba ya yiq'uic uuc te jyanlum-antsetique. Soc jich la calbey xan:

²⁶ —Ja' nix la smulin Salomón in to, ja' te muc' ajwalil yu'un Israel ae. Manchuc me ma'yuc yan muc' ajwaliletic ta yantic tsobol nacionetic te pajot yu'une, soc te c'ux ta o'tanil yu'un te Diose, soc la yac' ta muc' ajwalil ta stojol spisil Israel, pero ja' ac'bot sle smul yu'un te jyanlum-antsetique.

²⁷ Ja' yu'un, ma'yuc perdón yu'un teme la aleic te mero muc' mulil ta swenta scontroinel Dios, ta scaj teme ya xnujbinex soc te jyanlum-antsetique —la cut.

²⁸ Jtul te snich'nab Joiada, te snich'an muc' sacerdote Eliasib, ja' nix snial te Sanbalat te horonita-winique, la cac' loc'uc ta anel ta jtojol.

²⁹ Ya cal ta stojol Dios: —Dios cu'un, na'a me te mach'a la yixlanix te sacerdoteile soc te c'op chapal swenta sacerdote-winic soc te levita-winique —xoon.

³⁰ Jich ju' cu'un te la jloq'ues ta stojolic te bitic swenta te jyanlumetique. La jchajban ta chajbalchajp te bit'il xmelmon ya xc'axic te sacerdoteetic soc te levitaetique, chican te bit'il ya xc'ot ta swentaic te at'ele.

³¹ Soc la jchajban te ya me xtal spisil ora te si' swenta smajt'an Dios, soc te bi ajtalil albil ya xc'ote. Soc la jchajban te ya yaq'uic jujun ja'wil te sba sit yawal-sts'unubique. —Dios cu'un na'awon me, ich'bon me ta wenta yu'un cutsilal —xoon ta stojol Dios yu'un.