Nehemías 12 - Bible in Tzeltal de Oxchuc y Tenejapa

Sacerdoteetic soc levitaetic

¹ Ja'ic te sacerdoteetic soc levitaetic te sujt'ic tel soc Zorobabel te snich'an Salatiel, soc Josué: Te sacerdoteetic: ja'ic te Seraías, Jeremías, Esdras,

² Amarías, Maluc, Hatús,

³ Secanías, Rehum, Meremot,

⁴ Ido, Gineto, Abías,

⁵ Mijamín, Maadías, Bilga,

⁶ Semaías, Joiarib, Jedaías,

⁷ Salú, Amoc, Hilcías soc Jedaías. Ja'ic te jwolwanej yu'un te sacerdoteetic in to, soc xchapomalic, ta yorail te Josué.

⁸ Te levitaetic ja'ic te Josué, Binuy, Cadmiel, Serebías, Judá soc Matanías, ja' te swentainejic soc sjo'tac te c'ayojetic swenta sc'ajintayel yutsilal te Diose.

⁹ Te Bacbuquías, Uni, soc ja' nix sjo'tac ja' nix ayic ta mandalteswanej ta stojolic, swenta yu'un ya spas te yat'elique.

¹⁰ Ja' snich'an Josué te Joiacim, ja' snich'an Joiacim te Eliasib, ja' snich'an Eliasib te Joiada,

¹¹ ja' snich'an Joiada te Johanán, ja' snich'an Johanán te Jadúa.

¹² Ta yorail te Joiacim, ja'ic te jwolwanej-sacerdoteetic ta chajbalchajp: te jchajp mach'atic ay yu'un Seraías, ja' te Meraías; te jchajp mach'atic yu'un Jeremías, ja' te Hananías;

¹³ te jchajp mach'atic yu'un Esdras, ja' te Mesulam; te jchajp mach'atic yu'un Amarías, ja' te Johanán;

¹⁴ te jchajp mach'atic yu'un Melicú, ja' te Jonatán; te jchajp mach'atic yu'un Sebanías, ja' te José;

¹⁵ te jchajp mach'atic yu'un Harim, ja' te Adna; te jchajp mach'atic yu'un Meraiot, ja' te Helcai;

¹⁶ te jchajp mach'atic yu'un Ido, ja' te Zacarías; te jchajp mach'atic yu'un Ginetón, ja' te Mesulam;

¹⁷ te jchajp mach'atic yu'un Abías, ja' te Zicri; te jchajp mach'atic yu'un Miniamín soc te jchajp mach'atic yu'un Moadías, ja' te Piltai;

¹⁸ te jchajp mach'atic yu'un Bilga, ja' te Samúa; te jchajp mach'atic yu'un Semaías, ja' te Jonatán;

¹⁹ te jchajp mach'atic yu'un Joiarib, ja' te Matenai; te jchajp mach'atic yu'un Jedaías, ja' te Uzi;

²⁰ te jchajp mach'atic yu'un Salai, ja' te Calai; te jchajp mach'atic yu'un Amoc, ja' te Eber;

²¹ te jchajp mach'atic yu'un Hilcías, ja' te Hasabías; te jchajp mach'atic yu'un Jedaías, ja' te Natanael.

²² Ta yorail Eliasib, Joiada, Johanán soc Jadúa, ja' to ta yorail yat'el ta muc' ajwalil te Darío te persia-winique, te levitaetic ochic ta jun te sbiilic te jwolwanejetic yu'un juju-jchajp, soc nix te sacerdoteetique.

²³ Te jwolwanejetic yu'un juju-jchajp levitaetic la yich'ic ts'ibuyel ta libro yu'un crónicas, ja' to ta yorail Johanán smam Eliasib.

²⁴ Te jwolwanejetic yu'un te levitaetic, ja'ic in to: Hasabías, Serabías, Josué, Binuy soc Cadmiel, soc te sjo'tac te sitinej sbaic soc swenta yu'un ya yalbey yutsilal soc ya yalbey wocol te Cajwaltic, te c'alal ya xc'ot yorail ta chajbalchajp te abatinel yu'unique, jich te bit'il yaloj mandal David, te swinic te Diose.

²⁵ Te jcanan-ti'nailetic, te yacalic ta scanantayel ta ochibaletic, ja'ic in to: Matanías, Bacbuquías, Obadías, Mesulam, Talmón soc Acub.

²⁶ Ja'ic in to te cuxulic ta yorail Joiacim snich'an Josué, smam Josadac, soc ta yorail te ay ta ajwalil Nehemías, soc te sacerdote-maestro Esdras.

La yich' aq'uel ta stojol Dios joyob ts'ajc'

²⁷ Te c'alal la sta yorail te la yich' aq'uel ta stojol Dios te sjoyob ts'ajc'ul Jerusalén, la sleic te levitaetic ta spisil te banti nainemique. La yiq'uic ta Jerusalén, swenta yu'un ya spasic te q'uin yu'un yaq'uel ta stojol Dios te joyob ts'ajq'ue. Bayal me yutsil q'uinal la yaiyic a, la yalbeyic yutsilal Dios ta c'ayojetic soc at'ejibaletic yu'un música, ja'ic te platilloetic, arpaetic, soc liraetic.

²⁸ Te jc'ayoj-levitaetic talic ta sjoyobal Jerusalén, soc ta ch'in lumetic yu'un Netofa,

²⁹ soc ta nanatic yu'un Gilgal, soc ta sq'uinal Geba soc nix ta Azmavet. Melel te jc'ayojetique, ay spasoj snaic ta sejpelsejp ta sjoyobal Jerusalén.

³⁰ Jich ora la slecubtes sbaic ta stojol Dios te sacerdoteetic soc te levitaetique. Ora la slecubtesic ta stojol Dios te yajwal te lume, te yochibal yu'un te lume, soc nix te joyob ts'ajq'ue.

³¹ Patil la cal mandal te ya xmoic ta joyob ts'ajc' te jwentainwanejetic ta Judá, soc te ya xchajban sbaic cha'chajp muc'ul coroetic. Te sbabial coro been bael ta sba joyob ts'ajc' ta wa'el ta stojol yochibal lum Ch'ayjibal C'a'pal sbiile.

³² Ta spat te coro been Osaías soc olil te jwentainwanejetic ta Judá,

³³ ja'ic te Azarías, Esdras, Mesulam,

³⁴ Judá, Benjamín, Semaías soc Jeremías.

³⁵ Ay sacerdoteetic te joinwanic soc te oq'uesetique: ja'ic Zacarías snich'an Jonatán, te ja' patil alnich'an yu'un te Semaías, Matanías, Micaías, Zacur, soc Asaf,

³⁶ soc xan te xchapomal, ja' te Semaías, Azarael, Milalai, Gilalai, Maai, Natanael, Judá soc Hanani, ja'ic te ya stijic te at'ejibaletic yu'un música yu'un David te swinic te Diose. Ja' neel yu'unic te maestro Esdras.

³⁷ Ta sba te yochibal lum Sloq'uibja' sbiil, soc jich xan bael ta sba stoyolil te joyob ts'ajq'ue, mo bael ta escaleraetic ta Lum-yu'un-David, ta stojol te sna David sbiil c'alal ta yochibal lum te Ja' sbiil, ay ta stojol te sloq'uib c'aale.

³⁸ Te xchebal coro been bael ta q'uexen. Te jo'one ts'acalon bael ta spat te coro ta sba te joyob ts'ajc' soc te olil xan te winiquetique. Jajch'otic tel ta stoyol ts'ajc'ul te Hornoetic sbiile, c'alal ta pimil joyob ts'ajc'.

³⁹ C'axotic ta yochibal lum Efraín sbiile, soc ta yochibal lum Jesana sbiil, soc ta yochibal lum Chayetic sbiile, soc ta toyol ts'ajc' te Hananeel sbiile, soc te toyol ts'ajc' te Jo'winic sbiile, c'alal ta yochibal lum te Chijetic sbiile. C'o jcom jbajtic ta yochibal lum Guardia sbiile.

⁴⁰ Te cheb coroetic bajt'ic ta yawilic ta templo yu'un Dios. Ja' nix jichon soc te olil xan te jwentainwanejetic te joineje, boon soc ta cawil.

⁴¹ Te sacerdoteetic la yoq'uesinic oq'uesetic, ja'ic te Eliacim, Maaseías, Miniamín, Micaías, Elioenai, Zacarías, Hananías,

⁴² Maasías, Semaías, Eleazar, Uzi, Johanán, Malquías, Elam soc Ezer. Te jc'ayojetic wentainbil yu'un Izrahías, jun nax c'ajinic.

⁴³ Ta c'aal in to, la yich' aq'uel bayal milbil majt'aniletic ta stojol Dios. Te winiquetic mero bayal yutsil yo'tanic, melel Dios nojesbotic ta yo'tanic yutsil q'uinal yaiyic yu'un. Te antsetic soc te alaletic mero bayal yutsil yo'tanic uuc. Te yutsil q'uinal la yaiyic ta Jerusalén, chicnaj ta aiyel ta sc'ubulil te lume.

We'elil yu'un sacerdoteetic soc levitaetic

⁴⁴ Ta c'aal in to la yich' aq'uel yat'elic mach'atic ochic ta swentainel te stsobjibal yu'un te bitic majt'aniletic ta stojol Dios, soc te diezmoetic, soc te sba sit yawal-sts'unubic. Ya yich'ic q'uejel tey a, swenta yu'un tey ya yich' tsobel spisil a te bitic ya yich'ic tel ta sq'uinal te juju-jpam lume, jich nix te bit'il ya yal te mandaliletique. Ja' yu'unic te sacerdoteetic soc te levitaetique. Melel te mach'atic ayic ta Judá bin nax yo'tanic ta stojolic te sacerdoteetic soc te levitaetic te yacalic ta at'el ae.

⁴⁵ Ja' nix sjo'tac te jc'ayojetique, soc te jcanan-ti'nailetique. Ja'ic te ya swentainic te templo te yich'jibal ta muc' te Dios yu'unique, soc te bit'il ya slecubtes sbaic ta stojol te Diose, jich nix te bit'il yaloj mandal te David soc snich'an, ja' te Salomón.

⁴⁶ Melel ta namey ta yorail David soc ta yorail Asaf, ay jwolwanejetic yu'un jc'ayojetic, soc ay c'ayojetic yu'un yalbeyel yutsilal Dios soc swenta yalel wocol ta stojol Dios.

⁴⁷ Ja' yu'un, ta yorail Zorobabel soc ta yorail Nehemías, ta spisil Israel la yaq'uic ta jujun c'aal te we'eliletic yu'unic te jc'ayojetic soc te jcanan-ti'nailetique. La yac'beyic te levitaetic te bay c'alal ya xc'ot ta swentaique. Ja' nix jich la spasbeyic ta stojolic te sts'umbal Aarón.