Nehemías 10 - Bible in Tzeltal de Oxchuc y Tenejapa

¹ Te jayebotic te la cac' jfirmatic ta june, jo'otic in to: Jo'on Nehemías snich'anon Hacalías, te ayon ta ajwalil; Sedequías,

² Seraías, Azarías, Jeremías,

³ Pasur, Amarías, Malquías,

⁴ Hatús, Sebanías, Maluc,

⁵ Harim, Meremot, Obadías,

⁶ Daniel, Ginetón, Baruc,

⁷ Mesulam, Abías, Mijamín,

⁸ Maazías, Bilgai soc Semaías. Jpisiltic in to puro sacerdoteotic.

⁹ Te levitaetic: Josué snich'an Azanías, Binuy sts'umbal Henadad, soc Cadmiel

¹⁰ soc yermanotac, ja' Sebanías, Hodías, Kelita, Pelaías, Hanán,

¹¹ Micaía, Rehob, Hasabías,

¹² Zacur, Serebías, Sebanías,

¹³ Hodías, Bani soc Beninu.

¹⁴ Te jtsobwanejetic yu'un te nacione: Paros, Pahat-moab, Elam, Zatu, Bani,

¹⁵ Buni, Azgad, Bebai,

¹⁶ Adonías, Bigvai, Adín,

¹⁷ Ater, Ezequías, Azur,

¹⁸ Hodías, Hasum, Bezai,

¹⁹ Harif, Anatot, Nebai,

²⁰ Magpías, Mesulam, Hezir,

²¹ Mesezabeel, Sadoc, Jadúa,

²² Pelatías, Hanán, Anaías,

²³ Oseas, Hananías, Hasub,

²⁴ Halohes, Pilha, Sobec,

²⁵ Rehum, Hasabna, Maasías,

²⁶ Ahías, Hanán, Anán,

²⁷ Maluc, Harim soc Baana.

Bitic la xchapic xan ta stojol Dios

²⁸ Ja' te yantic yajwal lum, ja' te sacerdoteetic, levitaetic, jcanan-ti'nailetic, jc'ayojetic, abatetic ta templo, soc spisil te mach'atic ma ba la scapix sbaic soc te yantic yajwal te lumq'uinale, swenta yu'un jich ya me yich' ch'uunel a te mandaliletic yu'un te Diose, ta spisil soc yinamic, squerem-nich'nabic, yantsil-nich'nabic te ya sna'iquix q'uinale,

²⁹ spisilic ja' la sjoinic ta xchapel sc'opic te yermanotac soc te jtsobawanejetic yu'unique. Jc'axel la yalic ta jamal te ja' ya st'unic te bila ya yal te mandaliletic yu'un te Diose, te la yac'bey ta swenta Moisés, ja' te yabate. La yalic te jun me yo'tanic ya yaq'uic c'otuc ta pasel ta spisil ta jchajp te mandaliletic yu'un te Cajwaltique.

³⁰ Jich la yalic: —Ma ba ya cac'tiquix ta nujbinel cantsil-nich'antic soc te yajwal te lumq'uinale, soc ja' nix jich ma ba ya jc'antic te ya xnujbin soc jquerem-nich'nabtic te yantsil-nich'nabique.

³¹ Teme ay ya xtal xchonbotic ta yorail cux-o'tanil te bi ya xloc' yu'unic te yajwal te lumq'uinal, soc ta spisil te sit yawal-sts'unubique soc yawalique, ma ba ya jmanbeytic. Ma xju' ta manel ta yorail cux-o'tan, soc ni ta yorail q'uinetic cu'untic. Ja' nix jich, ta sjuquebal ja'wil ya cac'beytic xcux yo'tan te jq'uinaltique, soc ya jpasbeytic perdón te mach'a ay sbet cu'untique.

³² “Soc la yich' chapel cu'untic te puersa ya xjil ta jwentatic yaq'uel chaneb gramo plata ta jujun ja'wil, swenta yu'un ya yich' tojel a te at'el ta templo yu'un te Dios cu'untique,

³³ ja' bi ja' te waj ya yich' aq'uel ta stojol Dios, te harina pasbil ta trigo soc ta cebada te ya yich' aq'uel jujun c'aal te Diose, te chic'bil majt'anil jujun c'aal soc ta sc'aalelal cux-o'tanil soc ta yach'il u, soc nix majt'aniletic yu'un te yantic q'uinetic cu'untic swenta xch'uunel Dios, soc swenta smajt'an ta spisil, milbil majt'anil swenta stael perdón yu'un smul Israel, soc ta spisil te bila ya yich' pasel ta swenta yich'el ta muc' ta templo yu'un te Dios cu'untique —xiic.

³⁴ Soc yan xan, te sacerdoteetic, te levitaetic soc ta spisil te yajwal lume, chican te mach'a a te jun jnatic soque, la yich' pasel snúmeroil te mach'a ya xc'ot ta swenta yich'el bael ta templo yu'un te Dios cu'untic te si' albil ta swenta jujun ja'wil te c'alal ya sta yoraile, swenta yu'un ya yich' chiq'uel majt'aniletic ta scajtijib smajt'an Cajwaltic, ja' te Dios cu'untique, jich nix te bit'il ts'ibubil ta mandaliletique.

³⁵ La yich' na'el cu'untic ta jujun ja'wil te ya quich'beytic bael ta templo yu'un Cajwaltic te sba sit te bi ya xloc' cu'untique, soc sit te te'etic cu'untic te lec ta lo'ele.

³⁶ Soc la jna'tic xan te ya quic'tic bael ta templo yu'un Dios te ba alaletic cu'untic, sba yal wacaxetic, sba yal chijetic cu'untic, jich te bit'il ts'ibubil ta mandaliletique. Ja' ya quic'beytic bael ta stojolic te sacerdoteetic ayic ta abatinel ta templo.

³⁷ Soc ja' nix jich la jna'tic te ya quich'tic bael ta stsobjibal biluquetic ta templo yu'un Dios cu'untic te sbabial harina, vino, aceite, soc te sba sit spisil te te'etique, swenta jpatantic te ja' yu'un te sacerdoteetique. Soc la jna'tic xan te ya quich'beytic bael levitaetic te jun ta slajunebal te bitic ya xloc' cu'untique, melel ja'ic nix a te ya stsobic te jun ta slajunebal ta spisil te bitic ya xloc' ta jq'uinaltique.

³⁸ Te bi ora ya xbajt'ic te levitaetic ta stsobel te jun ta slajunebale, ya me sjoin jtul sacerdote, te sts'umbal Aarón. Ta patil te levitaetic ya yich'ic bael ta stsobjibal biluquetic ta templo yu'un Dios cu'untic te jun ta slajunebal te la stsobique.

³⁹ Te israeletic soc te levitaetic ya me yich'ic bael ta banti stsobjibal biluquetic te spatanil trigo, vino, soc aceite. Tey ya yaq'uic jilel ta banti ayic te bitic ch'ultesbilic te ya xtuun ta templo, soc tey nix nainemic a te sacerdoteetic yacalic ta abatinel, te jcanan-ti'nailetic soc te jc'ayojetique. La caltic ta jamal te ma ba ya xch'ay ta co'tantic te bitic ay ta aq'uel ta templo yu'un te Dios cu'untique.