Nahúm 1 - Bible in Tzeltal de Oxchuc y Tenejapa

Dios ya yac'bey spacol Nínive

¹ Te libro yu'un te j'alwanej Nahúm, te talem ta lum Elcos, ja' te bila ac'bot sna' stojol yu'un Dios, te bit'il ay sc'oplal te lum Nínive.

² Te Cajwaltic, ja' te Dios te ma smulan teme ay bila yan ya jch'uuntique, ya me sujt'esbey ta swenta te j'uts'inwanejetique. Ya me yac'bey spacol te mach'atic ya stoy sba ta stojole; ya me yilintay te scontrotaque.

³ Te Cajwaltic sts'icojbey to te smule; ja'uc me to, muc' te yu'ele. Ma xch'aybey castigo ta stojol te mach'a ay smule. Te Cajwaltic ya scajtijibin ta beel te tulan iq'ue; te tocaletic jich c'oem te bit'il tan te ya xwil te c'alal ya xbeene.

⁴ Ya scom te mar, soc ya staquintes; ya me staquintes spisil te muc'ja'etique. Te spamlejetic yu'un Basán soc te wits Carmelo, ya sayubic, soc ya xlubaj te nichimetic ta Líbano.

⁵ Ya xnijq'uic te toyol witstiquil ta stojol; te peq'uel witstiquil ya x'ulubic yu'un. Spisil te lumq'uinal ya stij sba te c'alal ya yil; spamal balumilal ya stij sba soc te mach'atic nainemic tey a.

⁶ ¿Mach'a ya xju' yu'un te ya stejc'an sba ta stojol te yilimbae? ¿Mach'a ya xcujch' yu'un te sc'ajc'ale? Te sc'ajc'al yo'tan ya me spuc bael jichuc c'ajc', ya me xjat yu'un te muc'ul tonetique.

⁷ Te Cajwaltic lec yo'tan; anjibal me c'oem ta yorail woclajel. Ya scanantay te mach'atic ja' ya smuc'ulin yo'tanique.

⁸ Ja'uc me to, jich bit'il snojel ja' ya smes bael spisil, ya slajin te mach'atic ya stoy sbaic ta stojole; ya xtaot ta ijc' q'uinal te scontrotaque.

⁹ ¿Bila a te ya achapic ja'ex ta scontroinel te Cajwaltique? Ja' me ya slajinex ta jc'axel stuquel. Ma'yuc mach'a ya xju' stoy sba cheb buelta.

¹⁰ Melel jichic me te bit'il ch'ixetic te sts'otoj sbae, jich bit'il taquin ac, ya me xc'ajq'uic ta jc'axel.

¹¹ Te ja'at Nínive, loc' tel ta awolil te jtul jconsejero te amene,te la snop te bila amenya spasbey te Cajwaltique.

¹² Jich yu'un te Cajwaltic ya yalbey te lum yu'une: —Manchuc me tulanic ta jyalel te asiriaetic soc bayalic, ya me yich'ic jinel, soc ya me xch'ayic bael. La cac' c'axuc awocol, ja'uc me to, ma ba ya cac' xwoclajat yan buelta.

¹³ Ya jwuybat te yugo acuchoj soc ya jtuch'bat te cadenaetic chucbilat a —xi'.

¹⁴ Te Cajwaltic la yalbat ac'oplal, ja'at te muc' ajwalilat yu'un Nínive: “Ma me ayuc ats'umbal te ya yich'bat jilel te abiile. Ya me jinbat spisil te loc'omba ach'uunejic ta bay stemplo te dios awu'une, tey me ya jmucat a, melel ja'at ilaybilat”, xi'.

Ya yich' jinel lum Nínive

¹⁵ ¡Ilawilic! Ya xtalix ta sba witstiquil te mach'a ya xtal yalbey sc'oplal te lamal q'uinale. Ja'at Judá, pasa te q'uinetic awu'une; c'otesa ta pasel te bitic awaloj ta jamale. Mero ma me xyochintayatix te mach'atic amen yo'tanique; jc'axel la yich'iquix jinel.