Miqueas 7 - Bible in Tzeltal de Oxchuc y Tenejapa

Boloben xcuxlejal Israel

¹ ¡Obol jba! Jich c'oemon ya caiy te bit'il ya jle xan te c'alal c'axemix a te bila la yich' tulele; ma ba ya jtaix sit ts'usub ni sit higuera, ja'ic te bi ya smulan co'tan swe'elinel xane.

² Ma'yuc ya xjilix ta balumilal winiquetic te toj ayique, ni ja'uc te jun yo'tanic ta stojol Dios. Spisilic ya smaliyic te bi ora ya xju' yu'unic uts'inwanej; juju-jtul ya spasbey sbaic syaquilic.

³ Ja'ic maestroetic yu'un spasel te bila amene. Te ajwaliletic ya sujawanic ta sc'anel majt'anil. Te juecetic ya sc'an smajt'an taq'uinic ta muquen. Te mach'atic tulanic ya spasic te bila ya sc'an yo'tanic soc ya sjowtesic te lume.

⁴ Te mach'atic lec yilel jich c'oemic te bit'il ch'ix; te mach'a ich'bil ta muq'ue, jich nix c'oemic. Ja'uc me to, ya sta sc'aalelal te ya yich' ilel te at'elile, ja' te bi c'aalil la yalbat te j'il-q'uinale. Ja' yu'un jich ya xcajic ta soquetel.

⁵ Ma xach'uunbey sc'op te apat-axujq'ue, ni ma me smuc'ulin awo'tan te ajoye; ya me atsajtay aba te ya xc'opojat soc te awiname.

⁶ Melel te nich'aniletic ma lecuc yo'tanic yu'un te sme'-statique. Te ach'ixetic ya stoy sbaic ta stojol te sme'ique. Te alibaletic ya stoy sbaic ta stojol te yalib-me'elique. Te scontro juju-jtul, ja' nix te mach'a ay ta yutil snae.

⁷ Ja'uc me to, ya jmaliy te Cajwale; ja' ayon ta smaliyel jtuquel te Dios te Jcoltaywanej cu'une, melel ya yaiybon stojol jc'op stuquel.

Tsalaw yu'un Israel

⁸ Ja'at nación te jcontroate, ma me binuc nax awo'tan yu'un te jwocole. Manchuc me yalon, ya me xjajch'on; manchuc me la sjoytayon te ijc' q'uinal, te Cajwal ja' saquil q'uinal cu'un stuquel.

⁹ Jtaoj jmul ta stojol te Cajwale, jich yu'un ya me xc'ax cu'un te yilimbae. Ja'uc me to, ya me stabon te bi swentailuc soc toj me ya xchajbanon. Te Cajwaltic ya me yic'on bael ta saquil q'uinal, ya me yac'bon quil te tsalaw yu'une.

¹⁰ Ya me yil te jcontro, soc ya me xpotsot ta q'uexlal yu'un. Melel la yalbon: —¿Banti ay te Ajwalil te Dios awu'une? —xi' ta yalel. Ja'uc me to, ta ora yo'tic ya me jmulan yilel te ya yich' teq'uel jichuc ajch'al ta calleetic.

¹¹ Jerusalén, ya me xc'ot sc'aalelal te ya yich' pasel xan te ajoyob ts'ajc'ule, soc ya me xmuc'ubat xan bael.

¹² Ya me xc'ot sc'aalelal te ya xtalic ta atojol spisil ta bayuc: c'alal ta Asiria ja' to me ta Egipto, c'alal ta muc'ja' Nilo ja' to me ta muc'ja' Éufrates, c'alal ta mar ja' to ta yan mar, c'alal ta wits ja' to ta yan wits.

¹³ Te q'uinal ya xc'atp'uj ta jochol taquin q'uinal ta scaj smul te yajwal, ta scaj te bila amen spasojique.

¹⁴ Cajwal, canantaya te lum awu'une, ja' te chijetic te awu'unineje, te pijt'em stuquelic ta ja'maltique, te joytaybilic yu'un te buen lequil q'uinale. Jich me x'awic'tilay bael ta aquiltic ta Basán soc ta Galaad, jich te bit'il la apas ta nameye.

¹⁵ Pasbeya yilic jchajp at'elil, jich bit'il te bi c'aalil la aloq'ues tel ta Egipto.

¹⁶ Ac'a me yilic te yantic nacionetic, soc jich me ya xpotsotic yu'un te q'uexlale, manchuc me ay yipic te spisil ya xju' yu'un ta sc'opique. Jichuc ac'a jiluquic te bit'il uma' soc cojc'.

¹⁷ Jich me ac'a sleq'uic tan te bit'il chanetic soc jich bit'il yantic te bitic staslajanic ta beele. Yacuc me ta nijq'uel ya xloq'uic tel ta spechech, soc nojeluc me xiwel ta yo'tanic ya xtalic ta atojol, Cajwal Dios cu'untic.

Dios ya spasbey perdón te lum yu'une

¹⁸ Ma'yuc yan Dios jich te bit'ilate, melel ya apasbey perdón yu'un te bila amen spasojique, soc ya ach'aybey ta awo'tan stoybail te lum te jilem xan jtebuque. Te ja'at ya awac'botic quiltic te xc'uxul awo'tan; soc ma'yuc ta awo'tan sbajt'el q'uinal te awilimbae.

¹⁹ Na'botic xan yo'bolil jbatic ta yan buelta; soc ac'a yich' muquel awu'un te bila amen jpasojtique. Ch'ojbotic coel jmultic ta sc'ubulil te mare.

²⁰ Cajwal, junuc me awo'tan soc ayuc me xc'uxul awo'tan, te jich nix jamal la awal ta namey ta stojol te antiguo jme'-jtatic ja' te Abraham soc Jacob.