Miqueas 6 - Bible in Tzeltal de Oxchuc y Tenejapa

Dios ya stij ta c'op te Israele

¹ Aiya awaiyic stojol yo'tic te bila ya yal te Cajwaltique: —Jajch'an, albeya ta stojol witstiquil te c'op awu'une, ac'a yaiybat stojol ac'op —xi'.

² Aiya me awaiyic stojol sc'op, ja'ex witstiquil, soc te stulanil yiptajibex te lumq'uinale. Te Cajwaltic ya me yalbey smul te lum yu'une, ya me stij ta c'op te Israele.

³ Jich ya yal te Cajwaltique: —Jac'bon jc'op, lum cu'un. ¿Bila jpasojbat, o bila a te la cuts'inat yu'une?

⁴ Jo'on la jloq'uesat tel ta lum Egipto, la cac'at ta libre yu'un mosoil. Jo'on la jticun bael te Moisés, te Aarón soc te María, swenta yu'un ja'ic ya yiq'uex tel.

⁵ Lum cu'un, na'a me yo'tic te bitic chapal ta yo'tan te Balac te muc' ajwalil yu'un Moab, soc te bila sujt'ib sc'op la yac' te Balaam snich'an Beor. Na'a me c'alal ayat ta Sitim te c'axat bael ta Gilgal, soc na'a ta lec te la caiy tsalaw ta bayuc —xi' te Cajwaltique.

Bila ya smaliy Cajwaltic yu'un ants-winiquetic

⁶ ¿Bi ya cut jba te ya jtejc'an jba ta stojol Cajwaltic, te Dios ay ta toyole? ¿Ya bal jtejc'an jba ta stojol soc wacaxetic te jun ja'wil ya'wilale, swenta yu'un ya cac'bey chic'bil smajt'anin?

⁷ ¿Ya bal xbujts'naj yo'tan yu'un Cajwal, teme ya cac'bey jmil (1,000) ta jcojt' tat chijetic o lajunmil (10,000) yocja'etic c'oem ta puro aceite? ¿O ya bal cac'bey te sba jnich'an ta swenta stojol te jtoybail soc te jmule?

⁸ Te Cajwaltic la yalbatix, ja'at ants-winic, te bila lec ya sc'an pasel soc te bila a te ya smaliybat te ja'ate: Ja' te ya apas te bila toj ta pasele, te junajem awo'tan ta stojol; soc te peq'uel awac'oj aba ta xch'uunel sc'op spisil ora te Dios awu'une.

⁹ Te Cajwaltic yac ta yiq'uel te lum, soc ja' me p'ijilil te lamalotic nax ta yaiyel stojole: —Aiya awaiyic ja'ex lum soc te jconsejeroetic awu'une.

¹⁰ Ay c'ulejalil ta sna te mach'a amen yo'tan te ma lecuc staoje. Ja' ya quilay te lotil p'isjibale.

¹¹ ¿Bit'il ya jpasbey perdón te mach'a ya stuuntes te slicjibal te la syantesix soc te lotil sp'isjibal yalale?

¹² Te jc'ulejetic tey ta lum ja'ic spisilic j'uts'inwanejetic; jpas-lotetic soc jlo'laywanejetic spisilic te yajwale.

¹³ Jich yu'un ya me cac'bat castigo; ya me jinat ta scaj te muliletic awu'une.

¹⁴ Ya xwe'at, ja'uc me to, ma xnoj ach'ujt' yu'un; stalel ay awocol yu'un wi'nal ya xjilat. Ya ale te bitic ya xtuun awu'une, ja'uc me to, ma'yuc bila ya xju' awu'un; teme ay bila ju' awu'un jtebuque, ya me cac' sjinbat guerra.

¹⁵ Ya awaiy ts'unbajel, ja'uc me to, ma ba ya ac'aj. Ya ajuch'bey sit olivo, ja'uc me to, ma ba ya atuuntesbey te yaceiteile. Ya apits' ta teq'uel te ts'usube, ja'uc me to, ma ba ya awuch'bey te ya'lele.

¹⁶ Melel ja' at'unoj ta ch'uunel smandal soc ta spasel yat'el te Omri soc te mach'atic ay yu'un Acab, jich yacat ta spasel te bit'il la spasique. Ja' yu'un ya jpasbat ja'at soc te awinictac te ya awich'ic ilayel soc labanel; soc ya me xc'ot ta awenta te labanel yu'un te nacionetique —xi' te Cajwaltique.