Miqueas 5 - Bible in Tzeltal de Oxchuc y Tenejapa

Dios ya yac' ajwaliletic ta Israel

¹ La yal te Cajwaltic: —Yan ta ora yo'tic, Jerusalén, chajbana me te ajoyob ts'ajc'ul, melel joytaybilatix yu'un te acontro, soc ya me yac'bey tulan castigo te jtsobwanej yu'un Israel.

² Ja'at Belén Efrata, manchuc teme ch'in jxujt'at te ayat ta yolil te mach'atic sts'umbal Judá, tey ya xloc' tel ta atojol jtul ajwalil yu'un Israel, ja' me sts'umbal te namey q'uinal sme'-state —xi'.

³ Te Cajwaltic ya yijq'uitay yo'tic te mach'atic ay yu'une, ja' to me te c'alal ya x'ayin yal te ants yac ta smaliyel te yale. Ja' yu'un jich me ya stsob sbaic soc slumalic te israeletic te pujq'uemic ta yan lum.

⁴ Te muc' ajwalil ya me xjajch' scanantay te lum yu'un ta yu'el, ta yutsilal te Cajwaltic te Dios yu'une. Lamal nax me q'uinal ya yaiyic, melel te Cajwaltic muc' me ya xc'ot ta jyalel c'alal ta sti'il te balumilale.

⁵ Ya me yac' lamal-o'tanil stuquel. C'alal ya yochintay asiriaetic te jlumaltic soc te ya x'ochic ta muc'ul palacioetic cu'untic, ya me jticuntic bael ta yilbeyel sba soc juqueb jtsobwanejetic soc waxactul winiquetic te muc' sc'oplalique.

⁶ Ja'ic ya xmandalajic ta Asiria soc spuñalic, te Asiria ja' te slumal Nimrod; soc ya me scoltayotic ta sc'abic te asiriaetic te c'axemiquix tel ta bay sts'ajc' jq'uinaltic te la yochintaybotiquixe.

⁷ Ja' yu'un te mach'atic sts'umbal Jacob te jilemic to, te ay ta yolilic bayal ta jpam lumetic, jichic me te bit'il ts'ujul ya sticun tel te Cajwaltic, jich bit'il ja'al ya xjul ta sba te wamaletique, te ma ja'uc sc'anjel yo'tan te winique.

⁸ Tey ayic xan a te sts'umbal Jacob ta yolil bayal nacionetic, jich me c'oemic te bit'il león-choj ta yolil te ja'mal chambalametic, jich bit'il león-choj ta stojol te jtsojp chijetic. Teme ya xtal, ya me stsac soc ya me sjin, soc ma'yuc mach'a cuxul ya scoltay bael.

⁹ Ja'at Cajwal, jich me ya atsac, soc ya ajin ta spisil te acontroe.

¹⁰ Tulan ya yal te Cajwaltique: —Jich c'aalil ya me jmilbat te caballoetic awu'un, soc ya me jinbat te carretaetic yu'un guerra.

¹¹ Ya me jinbat te ts'ajq'uetic yu'un te lumetic awu'un, soc ya me jinbat coel te tulanil ts'ajc' awu'une.

¹² Ya me jlajinbat te j'ac'-chameletic awu'une, soc ma'yuc ya xjil te mach'atic ay bila ya sna'ic yalele.

¹³ Ya me jinbat te awajcanan soc te tonetic ch'ultesbil awu'une, swenta yu'un ma ba ya xcha'sujt'at bael ta xch'uunel ta yan buelta te loc'ombaetic te ja'at nix la apase.

¹⁴ Ya me jbulbat loq'uel te sloc'omba Asera, soc ya me jinbat ta jc'axel te lumetic awu'une.

¹⁵ Ta swenta sc'ajc'al co'tan ya me quich'bey spacol ta stojol nacionetic te ma la sc'an xch'uunbonic te jc'ope —xi'.