Miqueas 4 - Bible in Tzeltal de Oxchuc y Tenejapa

Cajwaltic lamal q'uinal yu'un yat'el

¹ Ta slajibal c'aal tulan me ya xc'ot xan te wits ta banti ay te templo yu'un Cajwaltique. Ja' me te wits te c'ax toyol xane; ja' c'ax toyol yu'un a te yantic witstiquile. Spisil te nacionetic ya me xtalic ta stojol.

² Ya xtal bayal ta jchajp nacionetic, jich me ya yalbey sbaic: —La'ic, ya xmootic bael ta wits yu'un te Cajwaltique; ya xmootic ta templo yu'un te Dios yu'un Jacob. Ja' me ya yac'botic quiltic te beetic yu'une; jich me ya xju' xbeenotic ta bay ch'in beetic yu'une —xi'. Melel ta Sión ya xloc' tel te p'ijubtesjibal yu'un te Cajwaltique; ta Jerusalén ya xtal te sc'ope.

³ Te Cajwaltic ya me xchajban te nacionetic, soc ya me yal stuquel te bila lec ya spasic te lumetic te bayal ta jchajbe, soc me te lumetic c'ubul ayique. Te spuñalic ya sc'atp'unic ta sjoc'jibal lum; soc te slanzaique ya sc'atp'unic ta set'jibal trigo. Ma me ayuc jchajbuc lum ya stsac yat'ejib ta yac'beyel sba guerra soc yan lum; ni ma me ayuquix p'ijubtesel yu'un guerra.

⁴ Ma me ayuquix xiwel ya yaiyic ta spisilic; juju-jtul ya me xju' xcux yo'tanic ta yaxinal sts'usub soc ta yaxinal higuera yu'un. Ja' me sc'op stuquel te Cajwaltic te Spisil ya xju' yu'une.

⁵ Te yantic lumetic ya xch'uunbeyic sc'op te bitic diosinbil yu'unique; yan te jo'otique ya me jch'uunbeytic sc'op te Cajwaltic te Dios cu'untique.

Cajwaltic ya me scoltay te lum yu'une

^6-7 Ja' te tulan la yal te Cajwaltique: —Jich c'aalil ya jtsob te chijetic cu'un te la cac'bey castigoe, ja' te mach'atic coxoetic, lubenic soc te pujq'uemique. Ja'ic te mach'atic jilemic xane, ya me jpas ta tulan nación. Jo'on, Ajwalilon, ya xmandalajon ta stojol te lum cu'un ta wits Sión, ta ora to soc ta sbajt'el q'uinal.

⁸ Te ja'at, Jerusalén, balal ts'ajc' soc tulanil ts'ajc' yu'un Sión, ja'at mero centro ya xc'oat yu'un te muc' ajwalile. Ants c'oemat, te muc' ac'oplal ya xc'oat, jich bit'il ta neelal to —xi'.

⁹ Ta ora yo'tic, ¿bi yu'un jich ya x'awunat, jich bit'il ya x'awun ants yu'un xc'uxul te alajele? ¿Yu'un bal ma'yuc muc' ajwalil awu'un te ja'ate? ¿Yu'un bal chameniquix te jconsejeroetic awu'une?

¹⁰ Ts'ota aba yu'un xc'uxul, soc awunan, lum yu'un Sión, jich bit'il xc'uxul alajel ya yaiy te antse. Melel te ants-winiquetic awu'un ya xloc' bael ta atojol, ya me xba nainuc ta jamal q'uinal, soc ya me xc'ot c'alal ta Babilonia. Ja'uc me to, te Cajwaltic tey me ya yac' ta libre a te lum yu'une, ya me scoltay ta sc'ab te scontrotaque.

¹¹ Ta ora yo'tic bayal nacionetic stsoboj sbaic ta scontroinbelat. Ya yalic: —Ya xba quiltic te Jerusalén te boloben sc'oplale, ya me xbujts'naj co'tantic yu'un —xiic.

¹² Yan te nacionetic ma sna'ic te bila snopoj te Diose soc bitic chapal yu'un; ma sna'ic te ya yich'ic tsobel jichuc trigo ta tomoltom te bay ya yich'ic majel.

¹³ Jajch'an, lum Sión, maja te trigoe. Melel te Cajwaltic ya yal: —Jo'on ya cac'bat awip jichuc tat wacax te taq'uin c'oem te xulub soc te bronce c'oem te slots' yacane, swenta yu'un ya ajin bayal lumetic a. Ya me apojbey te sc'ulejalic te ma lecuc la staique, soc ya me awac'bonic cu'unin, te Ajwalilon yu'un spamal te balumilale —xi'.