Miqueas 3 - Bible in Tzeltal de Oxchuc y Tenejapa

Sc'op Dios ta stojol amen ajwaliletic

¹ Aiya awaiyic stojol yo'tic, ajwaliletic soc jtsobwanejetic yu'un Israel. ¿Yu'un bal ya acuy te ma'yuc ta awentaic ja'ex te ya ana'ic te bila stojil ta pasele?

² Ja'uc me to, ya awilayic te bay leque; soc ja' lec awo'tan yu'un te bila amene. Ya aloq'uesbeyic snujc'ulel c'oem te lum cu'une; soc chajal ya awijq'uitaybeyic te sbaquele.

³ Cuxul to a te ya ati'bonic c'oem te lum cu'une; ya ach'i'beyic te snujc'ulele, soc ya ac'asbeyic te sbaquele. Jich c'oem ta awo'tanic te bit'il ti'bal ya yich' payel ta oxome.

⁴ Ya me sta sc'aalelal te ya awawtayic te Cajwaltique; ja'uc me to, ma ba ya sjac'beyex ac'opic. Te bi ora jich ya apasique, ya me snac' sba ta atojolic ta scaj te muliletic apasojique.

⁵ Te lum cu'un jowejem ta be; ja' smul te j'alwanejetic te la slo'layique. Ya yalbeyic sc'oplal lamal q'uinal ta stojol te mach'atic ya x'ac'bot swe'elic yu'une; yan te mach'atic ma'yuc bi ya xnojesbot yeic yu'une, ya yalbeyic sc'oplal guerra. Te Cajwaltic ya yalbey te j'alwanejetic:

⁶ —Te ja'exe ta swenta j'alwanej ma'yuc bila ya x'ac'botex awilic xan ta ajc'ubal, ni ma'yuc bila ya awalbey bael sc'oplal ta ijc' q'uinal —xi'. Te c'aale ya xch'ay bael ta stojolic te j'alwanejetic; te c'aaleltic ijc' q'uinal ya xc'ot.

⁷ Te j'alwanejetic soc te mach'a ay bila ya sna'ic yalele ya me xjilic ta q'uexlal ta jc'axel. Spisilic ya me xcomic ta c'op te c'alal ma stsacbot sc'opic yu'un te Diose.

⁸ Yan te jo'one, te espíritu yu'un Cajwaltic ya yac'bon quip, toj-o'tanil soc stulanil co'tan, swenta yu'un ya me calbey ta sit Israel te stoybaile soc te smule.

⁹ Ajwaliletic soc jtsobwanejetic yu'un Israel, aiya me awaiyic stojol ta ora to. Te ja'exe ya awilayic te bila toj ta pasele; ja' ya ajinic spisil te bila toj aye.

¹⁰ Ya apasic Jerusalén, te lum ta wits Sión, ta swenta milaw soc te bila c'ax ma tojuque.

¹¹ Te juecetic ta lum ya xchajbanwanic soc taq'uin; te sacerdoteetic ja' nax ya xp'ijubteswanic yu'un taq'uin; soc te j'alwanejetic ya xchonic te bila ya yalbeyic sc'oplale. Yacal ta yalel te jich nix yo'tan te Cajwaltic, jich ya yalic: —Te Cajwaltic sjoinejotic; mero ma'yuc bila amen ya xtal ta jtojoltic —xiic ta yalel.

¹² Ja'uc me to, ta awentaic te ja'exe, ya me xc'atp'uj ta joc'bil lum te Jerusalén; ja' te lum ta wits Sión, ta busulbus ya xc'ot. Soc te wits ta banti ay te templo ya me xmujc' ta ja'mal q'uinal.