Miqueas 2 - Bible in Tzeltal de Oxchuc y Tenejapa

Yat'el te j'uts'inwanejetic

¹ Ya me yil swocolic te mach'atic ayic ta swayibic te ya snopilay ta yo'tanic te muliletique. Te c'alal ya sacub q'uinal, ya xc'ot ta pasel yu'unic, melel ay yipic ta spasel.

² Ya sbic'tal-o'tantayic q'uinaletic, jich ya spojic; ya sbic'tal-o'tantayic nanatic, jich ya yu'uninic. Ya stenic ta uts'inel ants-winiquetic, soc te mach'atic ay yu'unique, soc te bitic ay yu'unique.

³ Ja' swentail te jich la yal te Cajwaltique: —Jo'on chapalix cu'un ta jcontroinbelex te ja'exe. Ya jticun tel tulan woclajel te ma xju' ya acoltay aba yu'une. Ma xju'ix te soc nax toybail ya xbeenexe, melel ya me sta yorail ya xc'ot te awocolique.

⁴ Jich me yorail te ya yich' c'ajintayel ta atojolic c'ayojetic swenta mel-o'tan. Jich me ya yalic: “Jc'axel la quich'tic jinel ta jyalel; te lum cu'untic, te ja' yu'un te Cajwaltic, la yich' jelel yajwal, ma'yuc mach'a ju' yu'un scomel; te jq'uinaltic la spucbeyix sbaic te jtsalwanejetic cu'untique”, xiic me —xi' te Cajwaltique.

⁵ Ja' yu'un te ja'exe ma'yuquex ta wenta ta bay lum yu'un te Cajwaltique.

Amen j'alwanejetic

⁶ Ya yal te lume: —Ma jc'an caiybeytic sc'op te j'alwanejetique; te tulan woclajele ma xju' staotic.

⁷ ¿Yu'un bal jc'axel ch'aybil te sts'umbal Jacob? ¿Yu'un bal jc'axel ma cujch' yu'un te Diose? ¿Jich bal ya x'at'ej te Diose? ¿Yu'un bal ma x'utsub yu'un sc'op te mach'a toj ya yac' sbae? —xiic.

⁸ La sjac' te Cajwaltique: —Te ja'exe ya atoy abaic ta scontroinel te lum cu'une. Ya apojbeyic sc'u'-spaq'uic te toyol stojol te mach'atic ya sujt'ic tel ta guerra, ya acuyic te colemexix ta ac'opique.

⁹ Ya ach'ojic loq'uel te antsetic ta snaic te bin nax yo'tanic tey ae; soc ma xawac' te ya xc'ot ta swentaic te yalatac te yutsilal cu'une.

¹⁰ Jajch'anic me, beenanic xan, melel in q'uinal to ma swentauc cux-o'tanil; yu'un c'ax bolobenix, jc'axel ts'ilajem ta jyalel.

¹¹ Teme ay mach'a ya sle ta yo'tan lot te jich ya yal: “Jo'on ya calbey sc'oplal vino soc tulan uch'balil”, teme xie, ja' me j'alwanej te ya smulanic te lum abi —xi' te Cajwaltique.

Dios ya yal ya yac' ta libre te lum yu'une

¹² Ya yal xan te Cajwaltic: —Ya me jtsob spisil te sts'umbal Jacob; ya quic' te jayeb xan israeletic. Jich ya jtsob tel te bit'il ya yich' tsobel chijetic ta corral, jich bit'il jtsojp chijetic ta aquiltic. Jich me ya xtoy sc'opic te bit'il bayal ants-winiquetic —xi'.

¹³ Dios me ya sjambey bael te sbee, ja' me ya st'unic bael; ya me xloq'uic bael ta sti'il sts'ajc'ul te lume. Ja' me muc' Ajwalil yu'unic te Cajwaltique, ya me xneelaj ta beel yu'unic.