Miqueas 1 - Bible in Tzeltal de Oxchuc y Tenejapa

Castigo ta stojol Samaria

¹ Ja' sc'op Cajwaltic te la yalbey te Miqueas te talem ta lum Moreset, albot te bit'il ay sc'oplal Samaria soc Jerusalén. Ja' yorail ay ta ajwalil a te Jotam, Acaz soc Ezequías te mandalajic ta Judá.

² Apisilic lumetic, aiya awaiyic stojol; yajwalex spisil te lumq'uinal, aiya me awaiyic: Te Cajwaltic ja' testigo ta scontroinbelex te ja'exe, te ya xc'opoj tel ta ch'ul templo yu'un.

³ Te Cajwaltic ya xloc' tel ta awilal ta bay naineme, soc yac ta beel ya xtal ta sba te witstiquile.

⁴ Ta yet'al yacan ya x'ulub coel te witstiquil, jich bit'il chabec' te ya slac' te c'ajq'ue. Soc ya me xjat bael te q'uinale, cha'jat ya xc'ot, jich bit'il ya xjat bael lum yu'un yip snojel ja'.

⁵ Ta spisil ya xc'ot ta pasel ta scaj stoybail te sts'umbal Jacob, ta scaj smul te israeletic. ¿Banti ay te stoybail te sts'umbal Jacob? ¡Ta lum Samaria! ¿Banti ay te toyol ch'uunjibaletic ta Judá? Ja' ta bay Jerusalén.

⁶ Jich yu'un ya yal te Cajwaltique: —Ya jpasbey te lum Samaria, jbus nax ts'ajc' ya xc'ot. Jamal me q'uinal te tey ya yich' ts'unel a te ts'usubiletique. Ya jpucbey bael ta stenlej xatal q'uinal te tonetic yu'un te lume; t'anal ya quijq'uitaybey te yiptajibe.

⁷ Spisil te yajcanane ya me xwuyic jilel; soc ya me xc'ajq'uic spisil te' sts'apojic ta ch'uunele. Melel pastaj ta puro stojol jmulawil antsetic te ayic ta templo yu'un te lotil diosetic. Ja' nix jich ta stojol jmulawil antsetic ya jc'atp'un ta yan buelta —xi'.

Oc' Miqueas

⁸ Jich yu'un ya x'oc'on scaj te bayal te mel-o'tan ya caiye; ma'yuc jxanab soc t'anal ya xbeenon. Yacon ta ajc'an jichuc ja'mal ts'i', soc ta aw jichuc alal avestruz-mut.

⁹ Melel te yejch'en Samaria ma xju' ta poxtayel; jich tabilix uuc te Judá, c'oemix c'alal ta Jerusalén, ja' te lum ta bay nainemic te jlumale.

¹⁰ Ma me xawalbeyic te yajwal lum Gat; ma me xawaq'uic ta ilel oq'uel. Baletanic ta ts'ubil lum yu'un xc'uxul mel-o'tan ta lum Bet-le-afra.

¹¹ Yajwal Safir, ijq'uitayaic te alumal, baanic ta yan lum, t'analex soc nojel awo'tanic yu'un q'uexlal. Ma me xloq'uic tel te mach'atic nainemic ta Zaanán. Ay oq'uel ta Bet-esel; ma xc'opojix awu'unic.

¹² Mach'atic nainemic ta lum Marot ya sts'ot sbaic yu'un xc'uxul; yo'tanuc te lecuc q'uinal ya yaiyic. Melel te Cajwaltic la spas te ya xjul te bila amen ta bay sti'il sts'ajc'ul Jerusalén.

¹³ Ja'ex yajwal Laquis, te la atoy abaic jich bit'il Israel, te ja' la ajajch'esic mulil ta Sión, chajbana caballoetic, ac'a snitic bael te carretaetic awu'unique.

¹⁴ Ijq'uitaya jilel ta jc'axel te Moreset-gat. Te lum Aczib ya me xtuun yu'un slo'layel te muc' ajwaliletic yu'un Israel.

¹⁵ Te Cajwaltic ya yal: —Te mach'aex te nainemex ta Maresa, ya jticunbeyex xan acontroic ja'ex. Soc te mach'atic c'ax lequic xan ta Israel ya me xba ochuc ta nailch'en ta Adulam.

¹⁶ Te ja'at lum Sión, joxa loq'uel stsotsil ajol ta señail xc'uxul mel-o'tan ta scaj te anich'nabic te bayal c'ux ta awo'tane. Joxa loq'uel, t'axal ac'a jiluc jichuc sjol buitre-mut, melel te anich'nab ya me x'ic'otic bael ta mosoil —xi'.