San Mateo 4 - Bible in Tzeltal de Oxchuc y Tenejapa

Yiljibal yo'tan Jesús

¹ Te Jesús ic'ot bael ta jochol taquin q'uinal yu'un te Espiritue, swenta yu'un ya x'ilbot yo'tan yu'un te pucuje.

² Te c'alal la spas ayuno cha'winic c'aal soc cha'winic ajc'ubal te Jesuse, la yaiy wi'nal.

³ Jich te pucuje tal yilbey yo'tan te Jesuse. Jich la yal: —Teme ja'at Snich'anat te Diose, albeya in tonetic to te ya xc'atp'uj ta waje —xi' te pucuje.

⁴ La yal te Jesuse: —Jich ts'ibubil ta Sjun Dios: “Ma ja'uc nax waj cuxulic a te ants-winiquetique. Ja' ya xcuxinic yu'un spisil te bila yaloj Dios ta sti'”, te xie —xi' te Jesuse.

⁵ Te Jesús ic'ot bael yu'un te pucuj ta bay ch'ul lum Jerusalén. C'o tejc'anotuc ta jol templo la yaiy.

⁶ Jich albot yu'un te pucuje: —Teme ja'at Snich'anat te Diose, ch'oja coel aba, melel jich ts'ibubil ta Sjun Dios: “Te Dios ya yalbey mandal te ch'ul abatetic yu'un te ya scanantayate. Ya me slicat ta sc'abic swenta yu'un ma ba ya alajin awacan ta ton”, te xie —xi' te pucuje.

⁷ Jesús la yalbey: —Soc jich ts'ibubil ta Sjun Dios: “Ma me x'awilbey yo'tan te Cajwaltic te Dios awu'une”, te xie —xi'.

⁸ Yan buelta te Jesús ic'ot bael yu'un te pucuj ta bay muc' toyol wits. Tey la yac'bey yil spisil ta jchajp lumetic te ayic ta balumilale soc te yutsilalique.

⁹ Soc la yalbey: —Teme ya aquejan aba ta jtojol soc teme ya awich'on ta muq'ue, ya me cac'bat spisil in to —xi' te pucuje.

¹⁰ Jesús la yalbey: —Baan, q'ueja aba, Satanás. Melel jich ts'ibubil ta Sjun Dios: “Ja' nax me x'awich' ta muc' te Cajwaltic te Diose, soc ja' nax me ya awac' aba ta abatinel ta stojol stuquel”, te xie —xi'.

¹¹ Jich te Jesuse, ijq'uitayot yu'un te pucuje. Ja' tal yac' sbaic ta abatinel yu'un te ch'ul abatetique.

Jajch' ta at'el Jesús ta sq'uinal Galilea

¹² Te c'alal la yaiy stojol Jesús te chuculix te Juane, sujt' bael ta sq'uinal Galilea.

¹³ Ja'uc me to, ma ba jalaj ta bay lum Nazaret. Jich ba ainuc ta lum Capernaúm te ay ta ti'mare, ja' te sq'uinal te sts'umbal Zabulón soc te sts'umbal Neftalí.

¹⁴ Ja' c'ot ta pasel te bila ts'ibubil jilel yu'un te j'alwanej yu'un Dios te Isaías sbiile:

¹⁵ “Ta sq'uinal Zabulón soc ta sq'uinal Neftalí, ta banti sbelal te mare c'alal ta jejch' muc'ja' Jordán, ta sq'uinal Galilea te banti nainemic te jyanlumetique,

¹⁶ te ants-winiquetic te ayic ta ijc' q'uinale, tilemix muc'ul luz ta stojolic. Sacubenix q'uinal ta stojol te mach'atic ayic ta yaxinal te lajele”, te xie.

¹⁷ Jich yorail te Jesús jajch' yal ta bayuc ta stojol ants-winiquetic te lec yach'il c'op yu'un te jcoleltique. Jich la yal: —Sujt'esa awo'tanic ta stojol te Diose, yu'un nopol ya xjajch'ix ta ajwalinel te Dios ta ch'ulchane —xi' te Jesuse.

Te Jesús la yic' sjoin te chantul jtsac-chayetique

¹⁸ Te bit'il yac ta beel c'axel ta ti'mar yu'un Galilea te Jesuse, la yil cheb winiquetic te yermano sbaique, Simón sbiil te jtule. Ja' nix te Pedro yan sbiile. Soc Andrés sbiil te yijts'ine. Yacalic ta xch'ojel ochel ta mar te stsacjibal-xchayique, melel ja' yat'elic te tsac-chaye.

¹⁹ Te Jesús la yalbey yaiyic: —La', ts'aclinawonic. Ta ora to ja' awat'elix ya xc'ot te ya atsobic tel ants-winiquetic ta jtojol —xi'.

²⁰ Ta ora nax la yijq'uitayic jilel te stsacjibal-xchayique. La sts'aclinic bael.

²¹ C'ax xan bael jtebuc te Jesuse. Tey la yil yan cheb winiquetic te yermano sbaique, ja' te Jacobo soc Juan te snich'nab Zebedeoe. Ayic ta barco soc te statique. Yacalic ta stsaquel te xchojaq'uil stsacjibal-xchayique. La yic' te Jesuse.

²² Ta ora nax la yijq'uitayic jilel te sbarcoique soc te statique. La sts'aclinic bael te Jesuse.

Te Jesús la sp'ijubtes tsobol ants-winiquetic

²³ Been ta spamal sq'uinal Galilea te Jesuse. La yaiy p'ijubteswanej ta sinagogaetic te banti c'ax ta beele. Soc la xcholbey yaiyic te lec yach'il c'op yu'un te bit'il ay ta ajwalinel te Diose. Soc la slamantesbey spisil te bitic chamelil te ay ta sbaq'uetalic te ants-winiquetique soc spisil ta jchajp te bila c'ux ta aiyele.

²⁴ Pujc' sc'oplal ta spamal sq'uinal Siria te Jesuse. La yiq'uic tel ta stojol Jesús spisil te mach'atic ayic ta chamele, chican bila chameliluc te yich'ojique soc chican te bila toyol xc'uxul ya yaiyic ta sbaq'uetalique. Ay mach'atic ay pucuj ta yo'tanic, soc ay mach'atic ayic ta tujp'ul ic', soc ay mach'atic lajem xchial te yoc sc'abique. Spisil lecub yu'un te Jesuse.

²⁵ Tsobol ants-winiquetic la sts'aclinic ta beel. Ay talemic ta Galilea, soc ay mach'atic talemic ta sq'uinal Decápolis, soc ta lum Jerusalén, soc ta sq'uinal Judea, soc ta jejch' muc'ja' Jordán ta stojol sloq'uib c'aal.