San Mateo 3 - Bible in Tzeltal de Oxchuc y Tenejapa

La xchol sc'op Dios ta jochol taquin q'uinal te Juan J'ac'-ich'ja'e

¹ La sta yorail te tal ta bay jochol taquin q'uinal yu'un Judea te Juan J'ac'-ich'ja'e.

² Tey jajch' yalbey ta stojol spisil te ants-winiquetique: —Sujt'esa awo'tanic ta stojol te Diose, yu'un nopol ya xjajch'ix te bit'il ay ta ajwalinel te Diose —xi' te Juane.

³ Te j'alwanej yu'un Dios te Isaías sbiile, la sts'ibubey jilel sc'oplal te Juane: “Ya me xchicnaj aw ta jochol taquin q'uinal, te jich ya yale: ‘Chajbanbeyaic me sbe te Cajwaltique, toj me xajamic bael te sbee’ xi' me”, te xie.

⁴ Te sc'u' te Juane pasbil ta stsotsil camello, soc xchucoj xch'ujt' ta nujc'ul. Ja' la swe'elin te c'ulub soc aja-chab.

⁵ Talic te mach'atic ayic ta muc'ul lum Jerusalén, soc ta spamal sq'uinal Judea, soc te mach'atic ayic ta bay nopol ti'muc'ja' Jordán.

⁶ Te mach'atic la yalic ta jamal te smulique, jich ac'bot yich'ic ja' ta bay muc'ja' Jordán yu'un te Juane.

⁷ Te Juane la yil te tsobol fariseoetic soc saduceoetic te talemic yu'un te ya yac' sbaic ta ich'ja'e. Jich la yalbey yaiyic: —Te ja'exe, ja' sts'umbalex c'oem te jti'awal chanetique. ¿Mach'a la yalbeyex awaiyic te ya xju' ya acoltay abaic loq'uel ta swenta te tulan castigo te nopol ayixe?

⁸ Ac'a me chicnajuc ta ilel sit te awat'elic te bit'il sujt'emix awo'tanic ta mero melel yu'un te amulique.

⁹ Ma me xawalic: “Te jo'otique sts'umbalotic Abraham”, ma me xauquex. Melel xcalbeyex te ya xju' yu'un te Diose te ya sc'atp'un ta sts'umbal Abraham in tonetic to.

¹⁰ Pajal c'oemex soc te'etic te chapalix yechejul ta ts'etel c'alal ta yisim. Melel spisil ta pejt' te' te ma xyac' site, ya me yich' ts'etel soc ya me yich' ch'ojel ochel ta c'ajc'.

¹¹ Melel te ich'ja' ya caq'ue, ja' nax ta swenta seña te bit'il sujt'emix awo'tanic yu'un te amulique. Ja'uc me to, te mach'a patil ya xtal cu'une, ja' me ya yac'beyex awich'ic ja' ta swenta Ch'ul Espíritu soc c'ajc'. Ja' tulan yat'el yich'oj stuquel. Xujt' ma xtuunon ta abatinel yu'un ya caiy, ni yacuc xju' ya quich'bey bael te xanabe.

¹² Te mach'a ya xtale, jich c'oem te bit'il mach'a stsacojix ta sc'ab te sajp'ujibal sulil te strigoe. Patil ya me stsob ochel ta bay sq'uejibal te sbaq'ue. Yan te sulile ya me xchic' ta c'ajc' te ma xtup' sbajt'el q'uinal —xi' te Juane.

Jesús la sc'an yich' ja'

¹³ Te Jesuse jajch' tel ta bay sq'uinal Galilea. Jul tel ta bay ti'muc'ja' Jordán ta banti ay te Juane. Tal yac' sba ta ich'ja' yu'un.

¹⁴ Te Juane wocol la sc'an yac'bey yich' ja' te Jesuse. Jich caj yalbey: —Ya sc'an te jo'on ya awac'bon quich' ja'e. ¿Bit'il ay a te ja'at talat ta jtojole? —la yut.

¹⁵ La yal te Jesuse: —Ac'a yich' pasel, melel ya sc'an ya jc'otestic ta pasel spisil te bila ya sc'an yo'tan te Diose —xi'. Jich la yac'bey yich' ja' te Juane.

¹⁶ C'alal la yich'ix ja' te Jesuse, loc' tel ta ja'. Ora jam te ch'ulchane. La yil coj tel te Espíritu yu'un Dios, jich bit'il stsumut te jul ta stojole.

¹⁷ Soc ay mach'a c'opoj tel ta ch'ulchan: —Ja' in to, ja' te Jnich'an te bayal c'ux ta co'tane, bin nax co'tan yu'un —xi'.