San Mateo 24 - Bible in Tzeltal de Oxchuc y Tenejapa

Jesús la yal te ya xjinot te temploe

¹ C'alal loc' bael Jesús ta templo, noptsajic tel te jnopojeletic yu'une. Caj yac'beyic yil te muc'ul ts'ajc'ubil naetic yu'un te temploe.

² La yal te Jesuse: —¿Yacalex bal ta yilel spisil in to? Jamal ya calbeyex, spisil me ya yich' jinel. Ma me ayuc jp'ijuc ton te cajal ya xjil ta sba te yan tone —xi' te Jesuse.

Señailetic ta nopol slajibal c'aal

³ Te c'alal ayiquix ta Wits Olivailtique, te Jesús la snajc'an sba tey a. Te jnopojeletic yu'une, stuquel nax tal sc'oponic. Jich la yalic: —Albotic caiytic te bi ora ya xc'ot ta pasel te bila la awalbotique, soc te bi señail ya xchicnaj ta ilel a te c'alal ya xtalatixe soc te ja'ix a te slajibal c'aale —xiic.

⁴ La yal te Jesuse: —Tsajtaya abaic, ma me mach'a ya slo'layex,

⁵ melel ay me tsobolic ya xtalic te yich'ojbon jbiil ta sc'opique, jich me ya yalic: “Jo'on Cristoon”, xiic me. Ay me tsobol ta jtul te ya xlajic ta lo'layel yu'une.

⁶ Soc ya me awaiyic stojol te ay guerra lum to soc te ay guerra ta c'ubule, ja'uc me to, ma me xnijc' awo'tanic yu'un. Melel puersa me jich ya xc'ot ta pasel, ja'uc me to, ma to ja'uc te slajibal c'aale.

⁷ Melel ya me xjajch' scontroin sbaic te nacionetique, soc te muc' ajwaliletique ya me xjajch' scontroin sbaic ta guerra. Soc ya me xtal bayal wi'nal, soc chamel, soc tulan nijq'uel ta bayuc.

⁸ Ta spisil in to xjajch'ibal to nax xc'uxul te woclajel ya xtale.

⁹ “Ya me x'ac'otex ta uts'inel, soc ay me ya xlajex ta milel. Ya me awich'ic ilayel yu'un spisil ants-winiquetic ta swenta jbiil.

¹⁰ Ay me tsobol ta jtul ya xchebaj yo'tanic. Soc ya me xjajch' yilay sbaic soc ya me xjajch' yac' sbaic ta c'abal.

¹¹ Soc ya me xchicnaj tsobol lotil j'alwanejetic. Jich me tsobol ta jtul ya xlajic ta lo'layel yu'un.

¹² Soc ay me tsobol ta jtul ya xch'ay xc'uxul yo'tanic, scaj te esmajix ta pasel spisil te bila amene.

¹³ Yan te mach'a ya xcujch' yu'un c'alal ta slajibale, ya me xcol.

¹⁴ Soc ya me yich' puquel te lec yach'il c'op ta spamal balumilal te bit'il ay ta ajwalinel te Dios ta ch'ulchane, swenta testigo ya xc'ot ta stojol spisil nacionetic. Ja' to teme nup' ta puquele, jich me ya xtal te slajibal c'aale.

¹⁵ “Te j'alwanej yu'un Dios te Daniel sbiile, la yalbey jilel sc'oplal te jinwanej te ya sboltes te ch'ul awilale. (Te mach'a ya yil te bila ts'ibubil li'to, ac'a me sna' stojol.) Te c'alal ya awilic te ya xc'ot ta pasel te bila la yale,

¹⁶ ac'a anuquic bael ta witstiquil te mach'atic ayic ta sq'uinal Judea.

¹⁷ Teme ay mach'a moem ta yamac'ul sba te snae, teme coj tele, ma me x'och xan ta sna ta yich'el loq'uel te sbiluque.

¹⁸ Soc teme ay mach'a baem ta c'altic a, ma me sujt' xan ta sna ta yich'el bael te sc'u'e.

¹⁹ ¡Obol me sbaic te antsetic te yic'ojic alal ta xch'ujt'ique soc te ay chu'ul-alaletic yu'unique!

²⁰ C'oponaic Dios yu'un te manchuc yorailuc invierno a soc te manchuc ja'uc sc'aalelal a te cux-o'tane.

²¹ Ya me xtal bayal woclajel, te ma'yuc bay jich c'oem ta pasel ta xjajch'ibal to tel balumilal, soc ta ora to, soc ta patil bael.

²² Te manchuc yacuc scombey sc'aalelal te Diose, ma'yuc mach'a ya xcol jtuluc te jichuque. Ja'uc me to, chapalix yu'un te ya yich' comel ta scaj te mach'atic tsabilic yu'une.

²³ “Teme ay mach'a ya yalbeyexe: “Ilawil li' ayix to te Cristoe”, teme xie, o ya yal te yane: “Lum ayix to”, teme xie, ma me xach'uunic.

²⁴ Ay me ya xchicnaj lotil cristoetic soc lotil j'alwanejetic. Ya me yac' ta ilel muc' señailetic soc jchajp at'eliletic. Bayal me ya yaiyic lo'laywanej te yacuc xju' yu'unique, asta yo'tanuc slo'layic uuc te mach'atic tsabilic yu'un te Diose.

²⁵ La me calbeyex neeluc.

²⁶ Jich yu'un teme ay mach'a jich ya yalbeyexe: “Ilawil, ayix ta jochol q'uinal”, teme xie, ma me xbaex tey a. O teme ya yalic: “Li' ayix to ta yutil na”, teme xie, ma me xach'uunic.

²⁷ Melel te c'alal ya xtal te Nich'anile, jich me ya xchicnaj tel te bit'il tsantsewal te ya xlem tel ta sloq'uib c'aal c'alal to ta smalib c'aal.

²⁸ Te banti chawal sbaq'uetal te bila lajeme, tey ya stsob sbaic tel a te xulemetique.

Te bit'il ya xtal te Nich'anile

²⁹ “Teme c'axix sc'aalelal a te woclajel ta uts'inele, ya x'ijc'ub te c'aale, soc ma ba ya yac' xojobil te ue, soc ya me xch'ay coel ta ch'ulchan te eq'uetique, soc ya me yich' tijel te bitic ay yipic ta yolil te ch'ulchane.

³⁰ Jich me ya xchicnaj ta yolil ch'ulchan te seña yu'un te Nich'anile. Spisil ta jchajp ants-winiquetic te ayic ta balumilale ya me xcaj yoq'uetay sbaic, soc ya me yilic te Nich'anile. Ya me yilic te ya xtal ta bay tocal ta sjamalul ch'ulchan soc yu'el soc ay bayal xojobil te yutsilale.

³¹ Te c'alal ya x'oc' tulan te oq'uese, ya me sticun bael te ch'ul abatetic yu'une. Ya me xba stsobic tel ta xchanjejch'elul q'uinal ta spamal balumilal te mach'atic tsabilic yu'une.

³² “Te bila la calbeyexe, nopaic ta swenta bit'il ay te higo-te'e: Melel teme yaquix ta ach'ubel te sc'abc'abe, soc teme yaquix ta yaxubel te yabenale, jich me ya ana'ic stojol te nopolix tel te veranoe.

³³ Ja' nanix jich teme la awilic yac ta c'oel ta pasel spisil te bila la calbeyexe, jich me ya ana'ic stojol te nopol ayix ta ti'naile.

³⁴ Jamal ya calbeyex, ma to xlajic a te mach'atic cuxajtic ta q'uinal ta ora to te spisil ya xc'ot ta pasel te bila la calbeyexe.

³⁵ Ya xlaj te ch'ulchane soc te balumilale. Yan te jc'ope ma xlaj sc'oplal stuquel.

³⁶ “Ja'uc me to, ma'yuc mach'a ya sna' stojol te bi ora soc te bi c'aalil ya xc'ot ta pasele. Ma sna' uuc te ch'ul abatetic te ayic ta ch'ulchane. Ja' nax ya sna' stuquel te Jtate.

³⁷ “Jich bit'il ta yorail te Noeje, ja' nanix jich te c'alal ya xtal te Nich'anile.

³⁸ Melel te c'alal ma to xtal a te pulemale, jun nax yo'tanic yacalic ta we'el ta uch'bajel a, soc yacalic ta nujbinel a, soc yacalic ta yaq'uel nujbinel a, ja' to te c'alal och ta barco te Noeje.

³⁹ Ma la sna'ic stojol te bila ya xc'ot ta pasele, ja' to te tal te pulemale. Jich lajic ta spisilic. Ja' nanix jich te c'alal ya xtal te Nich'anile.

⁴⁰ Melel ta bay cheb winiquetic te sjoinej sbaic ta at'el ta c'altique, jtul ya x'ic'ot, soc jtul ya x'ijq'uitayot.

⁴¹ Soc ta bay cheb antsetic te sjoinej sbaic ta juch' mats'e, jtul ya x'ic'ot, soc jtul ya x'ijq'uitayot.

⁴² “Jich yu'un te ja'exe, wiq'uiluc me asitic, yu'un ma na'biluc awu'unic te bi ora ya xtal te Awajwalique.

⁴³ Na'aic me jich bit'il in to: Te yacuc sna' stojol te yajwal na te bi ora ya xtal te j'eleq'ue, wiq'uil sit ta smaliyel te jichuque, soc ma la yac' ta jamel sna te jichuque, soc ma la yac' bajt'uc ta elc'anel bael te sbiluque.

⁴⁴ Ja' nanix jich te ja'exe, chapaluquex me ta maliywanej. Melel ma na'biluc awu'unic te ya awil talix a te Nich'anile.

Te lequil abat soc te bol abat

⁴⁵ “¿Mach'a a te abat te jun yo'tan soc te ay sp'ijile? Ja' te ya x'ac'bot swentain te abatetic yu'un te yajwale, soc te ya yac'bey swe'elic ta mero yorail ta jujun buelta te ya xwe'ique.

⁴⁶ Bin nax me yutsil te abate teme jich yacal ta spasel a te c'alal ya xtal te yajwale.

⁴⁷ Jamal ya calbeyex, te yajwale ya me yac'bey swentainbey spisil te bila ay yu'une.

⁴⁸ “Yan teme amen yo'tan te abate, jich ya xcaj yal ta yo'tan te ma xtal ta ora te yajwale.

⁴⁹ Soc ya xjajch' smaj te sjo'tac ta abatile, soc ya xcaj sjoin ta we'el-uch'bajel te yacubeletique.

⁵⁰ Jich te yajwale ya me xtal ta bi c'aalil soc ta bi ora te ch'ayem stsa ta maliywanej a te abate.

⁵¹ Ya me yac'bey stoj ta lajel. Tey me ya xbajt' a te banti ya xbajt' te mach'atic cha'lam yo'tanique. Tey me ya xc'o yoq'uetay sba a soc tey me ya xc'o sjets'ulay ye a —xi' te Jesuse.