San Mateo 19 - Bible in Tzeltal de Oxchuc y Tenejapa

Sc'oplal te mach'atic ya yijq'uitay sbaique

¹ C'alal lajix yo'tan ta c'op a te Jesuse, la yijq'uitay te sq'uinal Galilea. Bajt' ta sq'uinal Judea ta stojol sloq'uib c'aal ta jejch' muc'ja' Jordán.

² Ts'aclinot yu'un tsobol ants-winiquetic. Tey la scoltay a te jchameletique.

³ Ay fariseoetic noptsajic tel ta stojol te Jesuse, swenta yu'un ya yilbey yo'tan. Jich la sjojc'obeyic: —¿Ya bal spas te ya sujt'es yinam te winique, ta biluc nax swentail? —xiic.

⁴ La yal te Jesuse: —¿Yu'un bal ma ba awilojic te bila ts'ibubil ta Sjun te Diose? Melel ta xjajch'ibal Dios la spas jtul winic soc jtul ants.

⁵ Jich la yal te Diose: “Ja' swentail te ya yijq'uitay sme'-stat te winique, ya yic' sba soc te yiname, jun nax sbaq'uetal ya xc'ot ta xchebalic”, te xie.

⁶ Jich ma chebuquix. Jun nax sbaq'uetalic. Te mach'a jun nax la yac' te Diose, jich ma spas ta jatel yu'un te ants-winiquetique —xi' te Jesuse.

⁷ Te fariseoetic jich la yalic: —¿Bistuc jiche te la yal mandal te Moisés te ac'a yich' najc'anel ta jun te bi swentailuc te ya yijq'uitay jilel te yinam te winique, soc ac'a yac'bey bael ta sc'ab, soc ac'a yijq'uitay sba soc, te xie? —xiic.

⁸ La yal te Jesuse: —Ta scaj te tulan awo'tanic te jich la yac'beyex awijq'uitay abaic soc awinamic te Moisese, ja'uc me to, ta xjajch'ibal ma jichuc ay ta pasel.

⁹ Ya calbeyex te mach'a ya yijq'uitay sba soc te yiname, teme ma ta scajuc te mulwej la spase, teme ya yic' yinamin yan antse, ayix ta mulwej abi. Soc te mach'a ya yic' yinamin te ants te ijq'uitaybilixe, jich ayix ta mulwej uuc —xi' te Jesuse.

¹⁰ Te jnopojeletic yu'un jich la yalic: —Teme yu'un jich ay sc'oplal te winic soc te yiname, ja' lec ma xnujbinotic abi —xiic.

¹¹ Jesús la yal: —Ma spisiluc ya xc'ot ta yo'tanic teme ja' lec te ma xnujbinique, ja' to teme Dios ya x'ac'bot ta yo'tanic yu'une.

¹² Ay winiquetic te eunuco ta scaj te stalel jich ayinic soc te sbaq'uetalique. Ay yantic eunuco te jich pasotic ta eunuco yu'un te winiquetique. Soc ay yantic eunucoetic te stuquel ya spas sbaic ta eunuco yu'un jich ya xju' ya yac' sbaic ta abatinel yu'un te bit'il ay ta ajwalinel te Dios te ay ta ch'ulchane. Teme ay mach'a jich ay ta yo'tane, jich ac'a spas —xi' te Jesuse.

Jesús la yac'bey bendición te alaletique

¹³ Ay la yiq'uic tel alaletic ta stojol te Jesuse, swenta yu'un ya scajanbey sc'ab ta sjolic ta sc'oponel Dios, ja'uc me to, te jnopojeletique c'an scomic te mach'atic yic'ojic tele.

¹⁴ La yal te Jesuse: —Ma me x'acomic. Ac'a taluc ta jtojol te alaletique, melel te mach'atic jich yo'tanic te bit'il in alaletic to, ja' me ya x'ochic ta banti ay ta ajwalinel te Dios te ay ta ch'ulchane —xi'.

¹⁵ Te Jesús la scajanbey sc'ab ta sjol te alaletique. Patil loc' bael tey a.

Jtul jch'iel winic te jc'uleje

¹⁶ Ay jtul jch'iel winic tal sc'opon te Jesuse. —Maestro te lecat atuquel. ¿Bila lec ya sc'an te ya jpase, swenta yu'un ya xcuxinon sbajt'el q'uinal? —xi'.

¹⁷ La yal te Jesuse: —¿Bi yu'un ya awal te lecon ta winiquile? Jtul nax te mach'a leque. Ja' nax lec stuquel te Diose. Ja'uc me to, teme ya ac'an te ya xcuxinate, at'elina spasel te bila ya yal te mandaliletique —xi' te Jesuse.

¹⁸ La yal te jch'iel winique: —¿Bila mandaliluc? —xi'. Jich la yalbey te Jesuse: —“Ma me x'awaiy milaw, ma me x'awaiy mulwej, ma me x'awaiy elec', ma me xawac' aba ta lotil testigo,

¹⁹ ich'a ta muc' te ame'-atate, soc c'ux me x'awaiy ta awo'tan te apat-axujq'ue jich bit'il c'ux ya awaiy aba atuquel te ja'ate”, te xie —xi' te Jesuse.

²⁰ Te jch'iel winic jich la yal: —Spisil in to, cat'elinej spasel ta jqueremil to tel. ¿Bila ya sc'an xan cu'un? —xi'.

²¹ Te Jesús jich la yalbey: —Teme ya ac'an te jc'axel lec ya xc'oate, baan, chona spisil te bila ay awu'une. Q'uebanbeya te me'baetique. Jich me ay ac'ulejal ta ch'ulchan ya xc'oat. La' me, joinawon ts'iin —xi' te Jesuse.

²² Te c'alal la yaiy stojol te jch'iel winique, bayal la smel bael yo'tan yu'un, melel bayal te sc'ulejale.

²³ Te Jesús caj yalbey te jnopojeletic yu'une: —Jamal ya calbeyex, te jc'uleje wocol ya yajwalin te Dios te ay ta ch'ulchane.

²⁴ Soc ya calbeyex xan: Jich bit'il ma xju' ya xc'ax ta aguja te jcojt' camelloe, c'axem to xan wocol ya x'ochic te jc'ulejetic ta banti ay ta ajwalinel te Diose —xi'.

²⁵ Te c'alal la yaiyic stojol te jnopojeletic yu'une, jchajp nax q'uinal la yaiyic yu'un. Jich la yalbey sbaic: —¿Mach'a me c'an coluc jiche? —xiic yu'un.

²⁶ Te Jesús la yilbey sitic, soc jich la yalbey xan yaiyic: —Te ants-winiquetique ma xju' yu'unic spasel in to. Yan te Diose spisil ya xju' yu'un spasel stuquel —xi'.

²⁷ La yal te Pedroe: —Cajwal, te jo'otique jilemix cu'untic spisil te bitic ay cu'untique, melel jts'aclinejticatix. ¿Bila ya quich'tic yu'un? —xi'.

²⁸ Te Jesús jich la yalbey yaiyic: —Jamal ya calbeyex, te bi ora ya yich' pasel ta yach'il spisil te bitic aye, te c'alal ya snajc'an sba ta bay yutsil smuc'ul nactijib te Nich'anile, ja'ex uuc te ajoinejique ya me x'ac'botex anactijibinic lajchayeb muc'ul nactijibaletic, yu'un ya me awaiyic chajbanwanej ta stojol te lajchaychajp israeletique.

²⁹ Spisil mach'a ay bi ya yijq'uitay jilel ta jwenta, chican teme sna, sbanquiltac, xwixitac, yijts'inab, sme'-stat, yinam, snich'nab, o ja' te sq'uinale, jo'winic buelta ya x'esmaj sjelol te ya x'ac'bote, soc ya me x'ac'ot cuxinuc sbajt'el q'uinal.

³⁰ Ja'uc me to, te mach'atic sbabial ayique, slajibal ya xc'otic. Te mach'a slajibal ayique, ja' me sbabial ya xc'otic —xi'.