San Mateo 16 - Bible in Tzeltal de Oxchuc y Tenejapa

Te fariseoetic soc te saduceoetic la sc'an seña yilic

¹ Ay fariseoetic soc saduceoetic te ba sc'oponic te Jesuse, yu'un la sc'an yilbeyic yo'tan. Jich la sc'anbeyic te ya yac' ta ilel seña yu'el ta ch'ulchan. [

² Ja'uc me to, te Jesús la yalbey yaiyic: —Te c'alal malix a te c'aale jich ya awalic: “Q'uepelix q'uinal pajel, yu'un tsaj te ch'ulchane”, xaex yu'un.

³ Soc te c'alal sacubix a te q'uinale, jich ya awalic: “Yo'tic ya xtal ja'al, yu'un tsaj te ch'ulchan soc ay tocal”, xaex yu'un. ¡Cha'lam awo'tanic te ja'exe! Ya ana'ic stsajtayel te bi yilel te q'uinale, ja'uc me to, ya awalic te ma x'ana'ic stsajtayel te señaetic yac ta coel ta pasel ta ora to.]

⁴ In te mach'a cuxulic ta q'uinal ta ora to, amen yo'tanic soc jmulwejetic, ya sc'an seña yilic, ja'uc me to, ma x'ac'botic. Ja' seña ta stojolic te Jonás te namey q'uinal j'alwanej yu'un te Diose —xi'. Jich la yijq'uitay jilel. Q'uejel a bajt'.

Te levadura yu'un te fariseoetique

⁵ Te c'alal c'axic bael ta jejch' mar, ma la sna' yich'ic bael swajic te jnopojeletique.

⁶ Te Jesús jich la yal: —Na'aic me q'uinal ta lec, tsajtaya me abaic ta swenta te levadura yu'un te fariseoetic soc te saduceoetique —xi'.

⁷ Te jnopojeletique jich caj yalbey sbaic yu'un: —Ja' yu'un te ma la jna'tic tel te waje —xiic.

⁸ Te Jesús la sna' stojol te bila la yalbey sbaique. Jich caj yalbey: —¿Bistuc ya awalbey abaic te ma'yuc waj awich'ojique? Ma'yuc xch'uunjel awo'tanic.

⁹ Yu'un ma to c'oemuc ta awo'tanic jiche. ¿Yu'un bal ch'ayix ta awo'tanic te jo'pejch' waj we'ic a te jo'mil (5,000) ta jtule, soc ch'ay balix ta awo'tanic te jayeb moch noj a te sobraile?

¹⁰ ¿Soc ch'ay balix ta awo'tanic te jucpejch' waj la yich' mac'linel a te chanmil (4,000) ta jtule, soc te jayeb moch noj te sobraile?

¹¹ ¿Bit'il ay a te ma c'ot ta awo'tanic te ma ja'uc waj te la calbeyex sc'oplale? Ja' la calbeyex te ya atsajtay abaic ta swenta te levadura yu'un te fariseoetic soc te saduceoetique —xi' te Jesuse.

¹² Jich c'ot ta yo'tanic te jnopojeletic te ma ja'uc la yal te ya stsajtay sbaic ta swenta te levadura yu'un te waje. Ja' la yal te ya sc'an ya stsajtay sbaic yu'un te bila ya yac' ta nopel te fariseoetic soc te saduceoetique.

Pedro la yal ta jamal te ja' Cristo te Jesuse

¹³ Te Jesús c'ot ta bay te q'uinal te Cesarea Filipo. Tey la sjojc'obey yaiy a te jnopojeletic yu'une: —¿Bi ya yalic awaiy te ants-winiquetique? ¿Mach'a ta sc'opic te Nich'anile? —xi'.

¹⁴ La yalic: —Ay ya yalic te ja'at Juanat te J'ac'-ich'ja'e. Te yane ya yalic te ja'at Eliasat. Soc ay yantic ya yalic te ja'at Jeremiasat, o yan namey q'uinal j'alwanejat yu'un te Diose —xiic.

¹⁵ Jich albotic yu'un te Jesuse: —¿Ja' xan te ja'exe, mach'aon ta ac'opic uuc? —xi'.

¹⁶ La yal te Simón Pedroe: —Ja'at Cristoat te Snich'anat te cuxul Diose —xi'.

¹⁷ La yal te Jesuse: —Bin nax me awutsil te ja'ate, Simón te snich'anat Jonase, te melel ma ants-winicuc te la yac'bat ana' yalel in to. Ja' la yac'bat ana' stojol te Jtat te ay ta ch'ulchane.

¹⁸ Jo'on ya cal te ja'at Pedroat, ta sba te ton in to ya cac' ipajuc ta stsojbol a te jch'uunjeletic cu'une. In te jch'uunjeletic cu'une ma stsalotic yu'un te lajele.

¹⁹ Jo'on ya cac'bat syaveal ta sjamel soc smaquel ta banti ay ta ajwalinel te Dios te ay ta ch'ulchane. Te bila ya achuc li'to ta balumilale, jich chucul ya xc'ot ta ch'ulchan. Soc te bila ya achap ta balumilale, jich chapal ya xc'ot ta ch'ulchan —xi' te Jesuse.

²⁰ Soc la spas ta mandal te jnopojeletic yu'un te ma me mach'a ya yalbeyic jtuluc te ja' te Cristo te Jesuse.

La yal Jesús te ya xlaje

²¹ Ja' nix yorail a te Jesús caj xcholbey yaiyic te jnopojeletic yu'une te ya xbajt' ta Jerusalén, soc te tey ya xc'ax bayal swocol ta sc'abic te principaletique soc te jwolwanej-sacerdoteetique soc te jts'ibojometique. Soc la yal te bit'il ya x'ac'ot ta lajel, soc te ya yich' cha'cuxesel ta yoxebal c'aal.

²² Jich te Pedroe la yic' bael ta q'uejel te Jesuse, soc la yalbey: —Cajwal, ma me jichuc ya sc'an te Diose. Ma me jichuc ya xc'ot ta pasel ta awenta —la yut.

²³ Te Jesús la sujt'es sba sc'opon te Pedroe: —¡Q'ueja aba ta jtojol, Satanás! Ja'at jcojch'inwanejat. Ma'yuc ta awo'tan te bila ya sc'an yo'tan te Diose. Ja' nax ay ta awo'tan te bila ya sc'an yo'tan te ants-winiquetique —la yut.

²⁴ La yalbey ts'iin te jnopojeletic yu'une: —Te mach'a ya sc'an yac' sba ta jnopojel cu'une, ac'a me sloq'ues sba ta yo'tan. Ac'a xcuch scruz. Ac'a st'unon.

²⁵ Melel te mach'a ya xc'uxtay sba soc te xcuxlejale, ya me xch'ay soc te xcuxlejale. Yan te mach'a ya yac' sba ta lajel soc xcuxlejal ta jwenta, ja' ya yich' xcuxlejal stuquel.

²⁶ ¿Bila ya xloc' yu'un a te winic teme ya yu'unin spisil te balumilale teme ch'ayel ya xbajt' soc te xch'ulele? ¿Bila ya yac'bey ta sjelol te xch'ulel teme ch'aye?

²⁷ Melel te Nich'anile ya me xtal soc yutsilal te State soc te ch'ul abatetic yu'une. Ya xtal yac'bey stojol sc'ab juju-jtul chican bi yilel te yat'el spasoje.

²⁸ Jamal ya calbeyex, ay mach'atic li' ayic to te ma ba ya xlajique ja' to teme la yilic ya xtal ta ajwalinel te Nich'anile —xi' te Jesuse.