San Mateo 15 - Bible in Tzeltal de Oxchuc y Tenejapa

Te bila amen ya xc'ot yu'un te winique

¹ Ay fariseoetic soc jts'ibojometic te talic c'alal lum Jerusalén te jul sc'oponic te Jesuse. La sjojc'obeyic:

² —¿Bi yu'un te jnopojeletic awu'une te ya xc'axintaybeyic te costumbre yu'un te principaletique? ¿Bi yu'un ma ba ya spoc sc'abic neeluc te c'alal ya xwe'ique? —xiic.

³ La yal te Jesuse: —¿Bi yu'un uuc te ja'exe, te ya ac'axintaybeyic smandal Dios a te costumbre awu'unique?

⁴ Melel jich la yal te Diose: “Ich'aic ta muc' te ame'-atate”, te xie. Soc la yal xan: “Te mach'a ya sbolc'optay te state, o teme ja' te sme'e, ac'a lajuc”, te xie.

⁵ Yan te ja'exe jich ya awalic: “Teme ay jtul winic te jich ya yalbey te sme'-state: ‘La cac'beyix smajt'anin Dios spisil te bila ay cu'une, jich ma xju' te ya jc'uxtayexe’, te ya yute,

⁶ ma yejt'aluc ya xc'uxtayix te sme'-state”, te xaexe. Jich ta swenta te costumbre awu'unique ma'yuquix sc'oplal ya xc'ot ta ch'uunel awu'unic a te bila yaloj ta mandal te Diose.

⁷ Cha'lam awo'tanic te ja'exe. Jich nix la yalbeyex ac'oplalic te namey q'uinal j'alwanej yu'un Dios te Isaiase:

⁸ “Ja' in lum to sba nax sti'ic yich'ojonic ta muc', yan te yo'tanique q'uejel to ay stuquel.

⁹ Tojol te ya xtal slajin sbaic ta jtojole, melel sc'op nax ants-winic te mandal ya yaq'uic ta nopele”, te xie —xi' te Jesuse.

¹⁰ Te Jesús la yic' tel ta stojol te ants-winiquetique. Jich la yalbey yaiyic: —Aiya awaiyic stojol, soc ac'a c'otuc ta awo'tanic:

¹¹ Ma ja'uc amen sc'oplal ya xc'ot ta stojol Dios te winic yu'un te bila ya yotses ta yee. Ja' amen sc'oplal ya xc'ot ta stojol Dios yu'un te bila ya xloc' tel ta yee —xi' te Jesuse.

¹² Te jnopojeletic yu'un te Jesuse, noptsajic tel ta stojol. Jich la yalbeyic: —¿La bal awil te ilinic yu'un te fariseoetic te bila la awale? —xiic.

¹³ La yal te Jesuse: —Spisil awal-ts'unubil teme ma ja'uc la sts'un te Jtat te ay ta ch'ulchane, ya me yich' bulel loq'uel.

¹⁴ Ac'a yil sbaic jiche te melel ya stojtesic ta be ma'sitetic ta sc'opic, ja'uc me to, pajal ma'sit c'oemic soc. Jich yu'un teme ay jtul ma'sit ya stojtes ta beel te mach'a pajal ma'sit soque, xchebalic me ya xch'ayic ta xaab —xi' te Jesuse.

¹⁵ La sjac' te Pedroe: —Cholbotic caiytic bit'il ay in seña-c'op to —xi'.

¹⁶ La yal te Jesuse: —¿Yu'un bal ma to xc'ot ta awo'tanic uuc te ja'exe?

¹⁷ ¿Ma bal yacuc ana'ic stojol te bit'il ya xc'ot ta ach'ujt'ic spisil te bila ya x'och ta awe'ique? Patil ya xba ach'ayic jilel ta letrina.

¹⁸ Yan te bila ya xloc' tel ta awe'ique, ta awo'tanic ya xjajch' tel stuquel. Ja' amen ac'oplal ya xc'oex ta stojol Dios yu'un.

¹⁹ Melel ta yo'tanic ya xcaj snopic te ants-winiquetic te bila amen ta pasele: Ja' te milawe, soc te mulweje, soc yalel ta mulil, soc elec', soc le-c'op, soc toyba-c'op.

²⁰ Ta spisil in to, ja' amen sc'oplal ya xc'ot ta stojol Dios yu'un. Yan teme ma spoc sc'ab c'alal ya xwe', ma ja'uc amen sc'oplal ya xc'ot yu'un stuquel —xi' te Jesuse.

Te xch'uunjel yo'tan te cananea-antse

²¹ Loc' bael tey a te Jesuse. Bajt' ta sq'uinal lum Tiro soc ta lum Sidón.

²² Ay jtul cananea-ants nainem tey a. Tulan c'opoj ta yalel wocol: —Cajwal, sts'umbalat David, c'uxtayawon soc te cantsil-ale. Yu'un ay pucuj ta yo'tan. Bayal ay ta uts'inel yu'un —xi' ta aw.

²³ Ja'uc me to, te Jesús ma la sjac'bey te sc'ope. Jich te jnopojeletique la yalbeyic te Jesuse: —Wocoluc, ticuna bael, yu'un bayal yac ta yawtaybelotic ta jpatic —xiic.

²⁴ Te Jesús la yalbey te antse: —Ma ja'uc ticunbilon tel ta awenta. Ja' nax sticunejon Dios ta xc'uxtayel te israeletic te jich c'oemic bit'il chijetic te ch'ayemique —xi'.

²⁵ Ja'uc me to, te antse tal squejan sba ta stojol. Jich la yal: —Cajwal, coltayawon —xi'.

²⁶ Jesús la yalbey: —Ma lecuc teme ya jpojbeytic swaj te alnich'anetic te ya cac'beytic swe'ic te alal ts'i'etique —xi'.

²⁷ La yal te antse: —Jich nix a, Cajwal. Ja'uc me to, te alal ts'i'etique ya swe'ic te sts'ubil swaj ya xch'ay coel ta yanil smesa te yajwale —xi'.

²⁸ Te Jesús la yalbey: —Me'tic, bayal xch'uunjel awo'tan. Jich me ya xc'ot ta pasel te bila ya sc'an awo'tane —xi'. Jich col ta ora te yantsil-ale.

Jesús la scoltay bayal jchameletic

²⁹ Loc' bael tey a te Jesuse. Been bael ta ti'ti'mar yu'un Galilea, soc mo bael ta wits. Tey c'o snajc'an sba a.

³⁰ Talic ta stojol tsobol ants-winiquetic tey a. Yic'ojic tel coxoetic, soc ma'sitetic, soc uma'etic, soc te jc'ojc'ol-c'abetic, soc yantic jchameletic. Tal yac'beyic ta stojol te Jesuse. Spisilic la yich'ic coltayel yu'un.

³¹ Jchajp nax q'uinal la yaiyic yu'un te ants-winiquetique, yu'un la yilic te yacalic ta c'op te uma'etique, soc lec ayic te mach'atic jc'ojc'ol-c'abetique, soc yacalic ta beel te coxoetique, soc jamenix sitic te ma'sitetique. Jich caj yalbeyic wocol Dios yu'un te israeletique.

Jesús la smac'lin chanmil (4,000) ta jtul winiquetic

³² Te Jesús la yic' tel te jnopojeletic yu'une. Jich la yalbey yaiyic: —Ya jna'bey yo'bolil sbaic in ants-winiquetic to, yu'un yoxebalix c'aal te sjoinejonic li'to, soc ma'yuc te swe'elique. Ma jc'an ya jticun bael ta snaic te bit'il ma'yuquix te swe'elique, teme repente ya xcom q'uinal yaiyic ta be —xi' te Jesuse.

³³ La yalic te jnopojeletic yu'une: —¿Banti c'an jtabeytic swe'elic li'to ta bay jochol q'uinal te melel tsobol te ants-winiquetique? —xiic.

³⁴ Te Jesús la sjojc'obey: —¿Jay pejch' waj ay awu'unic? —xi'. La yalic: —Jucpejch', soc cha'oxcojt' ch'in chayetic —xiic.

³⁵ Te Jesús la yalbey mandal te ants-winiquetic te ya snajc'an sbaic ta lume.

³⁶ La stsac te jucpejch' waje soc te chayetique, soc la yalbey wocol Dios yu'un. La xet', soc la yac'bey te jnopojeletique. Ja'ic ba spucbeyic te ants-winiquetique.

³⁷ Jich we'ic ta spisilic ja' to chican noj te xch'ujt'ique. Patil la stsobic te sobraile. Noj juqueb moch yu'un.

³⁸ Te jich yipal te mach'atic we'ique chanmil (4,000) te winiquetique. Ma la yich' ajtayel te antsetic soc te alaletique.

³⁹ Te c'alal la sticunix bael a te ants-winiquetique, och ta barco te Jesuse. Bajt' ta bay q'uinal te Magdala sbiile.