San Mateo 12 - Bible in Tzeltal de Oxchuc y Tenejapa

Te jnopojeletique la xjixic sbac' trigo ta sc'aalelal cux-o'tan

¹ Jich ora te c'ax bael Jesús ta yolilal ts'unbil trigoetic ta sc'aalelal cux-o'tan soc te jnopojeletic yu'une. Ayic ta wi'nal te jnopojeletique, jich caj xjixbeyic sbac' te trigoe, soc la xc'uxbeyic te sbaq'ue.

² Te fariseoetic la yilic te bila yacalic ta spasele, soc jich la yalbeyic te Jesuse: —Ilawil te jnopojeletic awu'une. Yacalic ta spasel te bila ma stac' ta pasel ta sc'aalelal cux-o'tan —xiic.

³ La yal te Jesuse: —¿Ma bal awilojic ta Sjun Dios te bila la spas te David te c'alal ay ta wi'nal soc te sjo'taque?

⁴ Te c'alal och ta sna Dios, la swe'ic te ch'ul waj te pachal ta stojol te Diose te ma xju' ya swe'ic soc te sjo'taque. Ja' nax ya xju' ya swe'ic stuquel te sacerdoteetique.

⁵ Soc ja' nanix jich, ¿ma bal awilojic ta mandalile te bit'il ma xyich'ic lewa yu'un yat'el ta templo ta sc'aalelal cux-o'tan te sacerdoteetique, soc ma yu'unuc ya sta smul a?

⁶ Ya calbeyex te li' ay to te mach'a cajal yu'un te temploe.

⁷ Te ja'exe ma ba ana'ojbeyic swentail te bila ts'ibubil ta Sjun te Diose: “Ja' ya jc'an te ya awaiyic c'uxtaywaneje. Ma ja'uc ya jc'an te milbil majt'anile”, te xie. Te yu'unuc ana'ojbeyic swentaile, ma ba la alebeyic smul te mach'atic ma'yuc smulic te jichuque.

⁸ Melel te Nich'anile, ja' ajwalil yu'un te sc'aalelal cux-o'tanile —xi' te Jesuse.

Jtul winic sicuben xchial sc'ab

⁹ Jich c'ax xan bael te Jesuse. C'ot ta sinagoga yu'unic.

¹⁰ Ay jtul winic tey a te sicuben xchial te jch'ix sc'abe. La smaliy yilic te bila ya spas te Jesuse soc la sjojc'obeyic: —¿Ya bal stac' te ya yich' coltayel jchameletic ta sc'aalelal te cux-o'tane? —xiic.

¹¹ Jesús la yalbey: —¿Bi xaex yu'un? Teme ay ch'ay coel ta lomen-ch'en cojt'uc achij ta sc'aalelal cux-o'tane, ¿ma bal yacuc xba aloq'uesic?

¹² Te jtul winique c'ax jich ay sc'oplal stuquel te bit'il cojt' chije. Jich yu'un ya stac' ta pasel te bila lec ta sc'aalelal te cux-o'tane —xi' te Jesuse.

¹³ Jich la yalbey te winique: —Toya jajch'el te ac'abe —la yut. Te c'alal la stoy jajch'el te sc'abe, jich lecub. Pajal lec c'ot soc te yan sc'abe.

¹⁴ Jich te fariseoetique loq'uic bael. Ba snopic te bi ya yut ya smilic te Jesuse.

Te abat tsabile

¹⁵ C'alal la sna' stojol te Jesuse, loc' bael tey a. Tsobol ants-winiquetic la sts'aclinic bael. La scoltay spisil te jchameletique.

¹⁶ Soc la yalbey mandal te ants-winiquetic te ma ba ya spucbeyic sc'oplale.

¹⁷ Jich la yal swenta yu'un jich ya xc'ot ta pasel te bila la yalbey jilel sc'oplal ta namey te j'alwanej yu'un Dios te Isaías te jich la yale:

¹⁸ “Li' ay to te cabat, te tsabil cu'une. C'ux ya caiy ta co'tan soc bin nax co'tan yu'un. Ya me cac'bey ta yo'tan te Espíritu cu'un. Jich me ya spuc ta alel ta stojol jyanlumetic te bila toj ta pasele.

¹⁹ Ma x'utawan. Ma x'awun. Ma q'uejeluc to chican sc'op ta calleetic.

²⁰ Ma ba ya slajin sc'asel ta jyalel te jalal te c'asemixe; soc ma ba jc'axel ya stup'bey sc'aal te smechail c'ajc' te c'un nax yac' ta tilele. Ma xlaj yo'tan ta ora ja' to teme ya yaiy tsalaw ta stojil chajbanele.

²¹ Spisil jyanlumetic ya me yac' smuc'ul yo'tanic ta stojol te abat cu'une”, xi' te Diose.

Te Jesús yich'ojbey yu'el pucuj ta sc'opic

²² Ay la yiq'uic tel ta stojol Jesús jtul winic uma' te ma'situben yu'un te pucuje. Te Jesús la scoltay. Jich c'opoj te winique, soc la yil q'uinal.

²³ Spisil te ants-winiquetic jchajp nax la yilic a. Jich la yalic: —¿Ma bal ja'uc te Sts'umbal David te maliybile? —xiic.

²⁴ Te c'alal la yaiyic stojol te fariseoetique, jich la yalic yu'un: —Ja' in winic to, ya sloq'ues pucujetic ta swenta Beelzebú ja' te mero ajwalil yu'un te pucujetique —xiic.

²⁵ Jesús la sna' stojol te bila la yaan yo'tanique. Jich caj yalbey yaiyic: —Te mach'atic jtul nax muc' ajwalil ay yu'unique, teme ya xat sbaique soc teme ya xjajch' scontroin sbaique, tey ya sjin sbaic ta spisilic a. Ja' nanix jich uuc te mach'atic jun nax lum ayique, o te mach'atic jun nax na ayique, teme ya xat sbaique ma ba ya xjalajic ta q'uinal yu'un.

²⁶ Ja' nanix jich, ¿ya bal xju' ya sloq'ues sba stuquel te Satanase? Te jichuc ya spase, ja' nax scontroinej sba abi. ¿Bit'il c'an jalajuc ta at'el te jichuque?

²⁷ Te ja'exe ya awalic te ja' ta swenta Beelzebú te ya jloq'ues pucujetique. Teme melel te bila ya awalique, ¿mach'a ta swenta te ya sloq'ues pucujetic te jnopojeletic awu'unique? Jich yu'un, ta swenta te jnopojeletic awu'unique, ja' me ya yich'beyex ac'opic stuquel.

²⁸ Ja'uc me to, te jo'one ya jloq'ues pucujetic ta swenta te Espíritu yu'un te Diose. Tey chicanix ta jamal te ayix ta ajwalinel ta awolilic te Diose.

²⁹ “Melel teme ay mach'a yo'tan ya yochintaybey sna te c'ajc'al winique, neel ya sc'an ya sc'ol ta chuquel. Patil ya xju' ya yelc'anbey te sbiluque.

³⁰ “Te mach'a ma sjoinone, ja' jcontro abi. Te mach'a ma ta jwentauc ya stsobawane, ja' jinwanej abi.

³¹ “Jich yu'un ya calbeyex: Spisil mulil soc stoyba c'op te ants-winiquetique, ya spasbot perdón yu'un te Diose. Yan teme ya stoybac'optayic te Ch'ul Espiritue, ma xju' ya spasbot perdón yu'un stuquel.

³² Teme ay mach'a ya scontroc'optay te Nich'anile, ya xju' ya spasbot perdón yu'un. Yan te mach'a ya scontroc'optay te Ch'ul Espiritue, ma xju' ya spasbot perdón yu'un stuquel te jayeb c'aal cuxul ta q'uinal ni ja'uc ta patilal bael ta sbajt'el q'uinal.

Te te'e ya xna'bot sba ta swenta te site

³³ “Teme lec te te'e, lec te sit ya yaq'ue. Yan teme amen te te'e, amen sit ya yac' stuquel. Melel te te'e ya jna'beytic sba ta swenta te site.

³⁴ Te ja'exe sts'umbalex jti'awal chanetic, ¿bit'il c'an lecuc te ac'opique?, melel amen te awo'tanique. Ta swenta ac'opic chican te bila nojel ta awo'tanique.

³⁵ Te mach'a lec yo'tane, lec ya xc'opoj, yu'un lec te bila nojel ta yo'tane. Yan te mach'a amen yo'tane, ma lecuc ya xc'opoj, yu'un nojel ta yo'tan te bila amene.

³⁶ Soc ya calbeyex awaiyic, spisil ta jp'al c'op te ma'yuc swentail ya yal loq'uel ta ye te ants-winiquetique, ya me x'ich'bot sc'opic yu'un Dios ta slajibal c'aal.

³⁷ Melel ta swenta ac'op te ya yac'at ta libre, soc ta swenta ac'op te ya yac'at ta castigo yu'une —xi' te Jesuse.

Ya sc'an seña yilic te mach'a amenique

³⁸ Ay fariseoetic soc jts'ibojometic te la sc'oponic te Jesuse: —Maestro, ya jc'antic te yacuc awac'botic seña awu'el quiltic —xiic.

³⁹ La yal te Jesuse: —Ya nax sc'an seña yilic te mach'atic te amen yo'tanic soc te mach'atic ma junuc yo'tanic ta stojol te Diose, ja'uc me to, ma x'ac'bot yilic. Ja' seña ta stojolic te Jonás te namey q'uinal j'alwanej yu'un te Diose.

⁴⁰ Melel te Jonase ain ta xch'ujt' muc'ul ballena-chay oxeb c'aal soc oxeb ajc'ubal. Ja' nanix jich uuc te Nich'anile ya me x'ain ta muquenal oxeb c'aal soc oxeb ajc'ubal.

⁴¹ “Te c'alal ya sta yorail ya x'ilbot yat'elic te jayeb ants-winiquetic cuxulic ta q'uinal ta ora to, tey me ayic uuc a te niniveetique. Ja' me ya yalbeyic ta jamal te smulique, melel te niniveetique la sujt'es yo'tanic yu'un smulic te c'alal la xchol sc'op Dios te Jonase. Yan ta ora to li' ay to te mach'a cajal yu'un te Jonase.

⁴² Soc tey me ay uuc a te antsil muc' ajwalil te ay smaquen-q'uinal ta stojol sur. Ja' me ya yalbey smulic uuc te mach'atic cuxulic ta q'uinal ta ora to, melel c'ubul tal ta yaiybel stojol sp'ijil sc'op te Salomone. Yan ta ora to, li' ay to te mach'a cajal yu'un te Salomone.

Te pucuje ya xcha'och xan tey a ta bay loq'uem

⁴³ “C'alal ya xloc' ta yo'tan ants-winic te pucuje, ya xbeen ta taquin q'uinaletic yu'un ya sle te banti ya yich' lewae, ja'uc me to, ma sta.

⁴⁴ Jich ya xjajch' yal: “Ya me sujt'on bael ta jna te banti loq'uemon tele”, xi'. Te c'alal ya xc'ot tey a, jochol ya xc'o stabey yo'tan te ants-winique, jich bit'il na te ma'yuc yajwal te mesbil soc te chajbanbil ta leque.

⁴⁵ Jich ya xba yic' tel juqueb pucujetic te c'ax jich yixtaelic te bit'il ay stuquele. Spisilic ya x'och snainbey yo'tan te ants-winique. C'ax to xan jich ya xbolob a te bit'il ay ta neelale. Jich me ya xc'otic te mach'a cuxulic ta q'uinal ta ora to te ma lecuc yo'tanique —xi' te Jesuse.

Te sme' te Jesuse soc te yijts'inabe

⁴⁶ Te Jesús yac to ta c'op ta stojol a te ants-winiquetique, tal te sme'e soc te yijts'inabe. Teq'uelic julel ta amac', ya sc'an sc'oponic te Jesuse. [

⁴⁷ Ay mach'a la yalbey yaiy te Jesuse: —Te ame'e soc te awijts'inabe teq'uelic ta amac'. Ya sc'an sc'oponat —xi'.]

⁴⁸ Te Jesuse la yalbey yaiy: —¿Mach'a a te jme'e soc te quijts'inab ya awale? —xi'.

⁴⁹ La stoy bael sc'ab ta stojol te jnopojeletic yu'une, soc jich la yal: —Ja' in to ja' jme' soc ja' quijts'inab c'oem ta spisilic.

⁵⁰ Melel mach'auc a te ya spasbey sc'anjel yo'tan te Jtat te ay ta ch'ulchane, ja' quijts'inab soc ja' jme' c'oem —xi' te Jesuse.