San Mateo 1 - Bible in Tzeltal de Oxchuc y Tenejapa

Te antiguo me'il-tatiletic yu'un te Jesucristoe

¹ Ja' in to, ja' lista yu'un te antiguo me'il-tatiletic yu'un te Jesucristoe te sts'umbal David te ja' sts'umbal Abrahame.

² Abraham, Isaac, Jacob, Judá soc te yermanotaque,

³ Judá te stat Fares soc Zara. Ja' sme'ic te Tamare. Fares, Esrom,

⁴ Aram, Aminadab, Naasón,

⁵ Salmón te stat Booz. Ja' sme' te Rahabe. Booz te stat Obed. Ja' sme' te Rute. Obed,

⁶ Isaí te stat muc' ajwalil David. Te muc' ajwalil Davide stat Salomón. Ja' sme' te yinam Urías ta neelal toe.

⁷ Salomón, Roboam, Abías,

⁸ Asa, Josafat, Joram,

⁹ Uzías, Jotam, Acaz,

¹⁰ Ezequías, Manesés, Amón, Josías.

¹¹ Te Josiase stat Jeconías soc te yermanotaque. Ja' yorail te chucul ic'otic bael ta Babilonia te israeletique.

¹² Ta patil te c'alal ayix ta Babilonia te Jeconiase tal Salatiel,

¹³ Zorobabel, Abiud, Eliaquim,

¹⁴ Azor, Sadoc, Aquim,

¹⁵ Eliud, Eleazar, Matán,

¹⁶ Jacob, José te smamlal te Mariae te sme' Jesús te Cristo sbiile.

¹⁷ Jich yu'un teme ya jcajtaytic coel tel te jaycum te antiguo me'il-tatiletic yiloj sba soc Abraham te Davide, ay chanlajuncum. Soc ay chanlajuncum yiloj sba soc David te bi ora chucul ic'otic bael ta Babilonia te israeletique. Soc ja' nanix jich ay chanlajuncum xan ja' to c'alal ayin te Cristoe.

Jich ayin te Jesucristoe

¹⁸ Te bit'il ayin te Jesucristoe, jich ay: Te sme'e, ja' te Mariae, chapalix te ya xnujbin soc te Joseje. Ja'uc me to, ma to bay yic'oj sbaic a, chicanix te yic'ojix alal ta swenta te Ch'ul Espiritue.

¹⁹ Te Joseje, ja' te smamlale, te bit'il toj ta winiquile, jich ma la sc'an te ya sboltesbey sc'oplal te Mariae. La snop te muquen c'an yijq'uitay jilele.

²⁰ Te c'alal jich snopojix a te jich c'an spase, ta swaich chicnaj la yil jtul ch'ul abat yu'un te Cajwaltique. Jich albot yu'un: —José, te sts'umbalat Davide, ma x'axi' te ya awic' awinamin te Mariae, melel te bit'il ay yale, ja' ta swenta te Ch'ul Espiritue.

²¹ Ya me x'ayin squerem-al. Jesús sbiil ya xc'ot awu'un te yale. Jich ay te sbiile, yu'un ya me scoltay ta lajel yu'un smulic te lum yu'une —xi' te ch'ul abate.

²² Spisil in to c'ot ta pasel swenta yu'un jich me ya xc'ot te bila yaloj te Cajwaltic ta swenta te j'alwanej yu'une:

²³ “Ay me jtul tec'tojom ach'ix te ya yic' alale. Ya x'ayin squerem-al, Emanuel ya xc'ot te sbiile”, te xie. Te bit'il Emanuel xi' te sbiile, “Sjoinejotic te Diose”, xi' c'oem.

²⁴ C'alal wijc' sit te Joseje, jich la spas te bila mandal albot yu'un te ch'ul abate. La yic' yinamin te Mariae,

²⁵ ja'uc me to, ma la sc'opon sba soc, ja' to c'alal ayin te sba yale. Jesús sbiil c'ot yu'un te yale.