San Marcos 8 - Bible in Tzeltal de Oxchuc y Tenejapa

Jesús la smac'lin chanmil (4,000) ta jtul

¹ Patil ay c'ot ta pasel yan buelta te ay bayal ants-winiquetic stsoboj sbaique. Xujt' ma'yuc swe'el yich'ojic. Te Jesús la yic' tel te jnopojeletic yu'une. Jich la yalbey:

² —Ya jna'bey yo'bolil sbaic in ants-winiquetic to, yu'un yoxebalix c'aal te sjoinejonic li'to, soc ma'yuc te swe'elique.

³ Teme ma we'emuc ya jticun bael ta snaique, ya me xcom q'uinal yaiyic ta be, melel ay mach'atic te c'ubul talemique —xi'.

⁴ Te jnopojeletic la yalic: —¿Banti c'an jtabeytic swe'elic li'to ta bay jochol q'uinal? —xiic.

⁵ La sjojc'o te Jesuse: —¿Jaypejch' waj ay awu'unic? —xi'. La yalic: —Jucpejch' nax te quich'ojtique —xiic.

⁶ Te Jesús la yalbey mandal te ants-winiquetic te ya snajc'an sbaic coel ta lume. La stsac te jucpejch' waje, soc la yalbey wocol Dios yu'un. La xejt', soc la yac'bey ta sc'ab te jnopojeletique. Ja'ic ba spucbeyic te ants-winiquetique.

⁷ Soc ay cha'oxcojt' ch'in chay yich'ojic. Te Jesuse la yalbey wocol Dios yu'un uuc, soc la yac' ta puquel.

⁸ Jich we'ic ta spisilic ja' to chican noj te xch'ujt'ique. Patil la stsobic te sobraile. Noj juqueb moch yu'un.

⁹ Te jich yipal te mach'atic we'ique ay niwan chanmiluc (4,000) ta jtul. C'alal laj yo'tanic ta we'el, la sticun bael.

¹⁰ Jich te Jesús soc te jnopojeletic yu'une ochic ta barco. Bajt'ic ta bay q'uinal te Dalmanuta sbiile.

Te fariseoetic la sc'anbeyic yil seña yu'el te Jesuse

¹¹ Ay talic fariseoetic yu'un ya stsalic ta c'op te Jesuse. Jich la sc'anbeyic te ya yac' ta ilel seña yu'el ta ch'ulchan, yu'un c'an yilbeyic yo'tan.

¹² Te Jesús la sjic' yo'tan yu'un. Jich la yal: —¿Bi yu'un te ants-winiquetic to te ya sc'an ya x'ac'bot yilic señae? Jamal ya cal te ma'yuc seña ya x'ac'bot yilic te mach'atic cuxulic ta q'uinal ta ora to —xi' te Jesuse.

¹³ Jich la yijq'uitay jilel. Cha'och bael ta barco. Bajt' ta jejch' mar.

Te levadura yu'un te fariseoetique

¹⁴ Te jnopojeletique ma la sna' yich'ic bael swe'elic, yu'un pejch' nax waj ay yu'unic ta bay barco.

¹⁵ Te Jesús la spas ta mandal: —Na'aic me q'uinal ta lec, tsajtaya me abaic ta swenta te levadura yu'un te fariseoetic soc uuc te levadura yu'un te Herodese —la yut.

¹⁶ Te jnopojeletique jich caj yalbey sbaic yu'un: —Ja' yu'un te ma'yuc waj quich'ojtic tele —xiic.

¹⁷ Te Jesús la sna' stojol te bila la yalbey sbaique. Jich la yal: —¿Bistuc ya awalbey abaic te ma'yuc waj awich'ojique? Yu'un ma to c'oemuc ta awo'tanic, soc ma to x'ana'ic stojol. Tulanajem te awo'tanique.

¹⁸ Ay te asitique, ma x'awilic q'uinal a. Soc ay te achiquinique, ma x'awaiyic stojol c'op a. ¿Yu'un bal ch'ayix ta awo'tanic

¹⁹ te bit'il la jpucbey jo'pejch' waj te jo'mil (5,000) ta jtule? ¿Jayeb moch noj awu'unic te sobraile? —xi' te Jesuse. La yalic: —Lajchayeb moch —xiic.

²⁰ Soc la yal te Jesuse: —Jaxan te la jpucbey jucpejch' waj te chanmil (4,000) ta jtule, ¿jayeb moch noj awu'unic te sobraile? —xi'. La yalic: —Juqueb moch —xiic.

²¹ —¿Bi yu'un te ma xc'ot ta awo'tanique? —xi' te Jesuse.

Jesús la sjambey sit jtul winic ay ta Betsaida

²² Patil c'otic ta lum Betsaida. Ay la yiq'uic tel jtul ma'sit. La stejc'anbeyic ta stojol te Jesuse, soc la yalbeyic wocol te yacuc sjambey te site.

²³ Te Jesús la stsacbey sc'ab te ma'site. La snit loq'uel ta ti'lum. Tey la stubtaybey sit a, soc la spicbey. La sjojc'obey yaiy teme ya xju'ix ya yil jtebuc te q'uinale.

²⁴ Te ma'site caj yil jtebuc te q'uinale. Jich la yal: —Ay winiquetic ya quil, yacalic ta beel, te'etic yilel —xi'.

²⁵ Te Jesús la spicbey xan te site. La yac'bey yil ta lec te q'uinale. Tey utsubix a te site, soc chicanix ta lec ya yil spisil.

²⁶ Te Jesuse la sticun bael ta sna, soc jich la yalbey: —Ma me x'ochat bael ta lum. Ma me mach'a xawalbey yaiy jtuluc tey a —la yut.

Pedro la yal ta jamal te ja' Cristo te Jesuse

²⁷ Te Jesús bajt' soc te jnopojeletic yu'une. Beenic bael ta ch'in lumlumtic te ay ta bay te q'uinal te Cesarea Filipo sbiile. Te bit'il yac ta beel soc te jnopojeletique, te Jesús caj sjojc'obey yaiy: —¿Mach'aon me ta sc'opic te ants-winiquetique? —xi'.

²⁸ La yalic te jnopojeletique: —Ay ya yalic ja'at te Juan J'ac'-ich'ja'e. Te yane ya yalic te ja'at te Eliase. Soc ay yantic ya yalic te ja'at te namey q'uinal j'alwanej yu'un te Diose —xiic.

²⁹ Soc albotic yu'un uuc te Jesuse: —¿Jaxan te ja'exe, mach'aon ta ac'opic uuc? —xi'. La yal te Pedroe: —Ja'at Cristoat —xi'.

³⁰ Te Jesuse la scom ta spisilic te ma me mach'a ya yalbeyic yaiy jtuluque.

La yal Jesús te ya xlaje

³¹ Te Jesús jajch' yac'bey sna'ic stojol te jnopojeletic yu'un te puersa ya xc'ax bayal swocol: —Te Nich'anile xujt' ma'yuc sc'oplal ya xc'ot ta yo'tanic te principaletique soc te jwolwanej-sacerdoteetic soc te jts'ibojometique. Ya me x'ac'ot ta lajel yu'unic, soc ya xcha'cux tel ta yoxebal c'aal —xi'.

³² Ja' la yal ta jamal ta stojolic. Jich te Pedro la yic' bael ta q'uejel jtebuc, soc la scom te manchuc jich ya xc'ot ta pasele.

³³ Ja'uc me to, te Jesús la sujt'es sba ta yilel te jnopojeletic yu'une, soc la scom te Pedro. Jich la yalbey: —¡Q'ueja aba ta jtojol, Satanás! Ma'yuc ta awo'tan te bila ya sc'an yo'tan te Diose. Ja' ay ta awo'tan te bila ya sc'an yo'tan te ants-winiquetique —la yut.

³⁴ Te Jesús la yic' tel te tsobol ants-winiquetic soc uuc te jnopojeletic yu'une. Jich la yalbey yaiyic: —Teme ay mach'a ya sc'an yac' sba ta jnopojel cu'une, ac'a me sloq'ues sba ta yo'tan. Ac'a xcuch cruz. Ac'a st'unon.

³⁵ Melel spisil mach'a ya xc'uxtay sba soc te xcuxlejale, ya me xlaj soc te xcuxlejale. Yan te mach'a ya yac' sba ta lajel soc xcuxlejal ta jwenta soc ta swenta te lec yach'il c'ope, ja' me ya xcuxin stuquel.

³⁶ Melel ¿bila ya xloc' yu'un a te winic teme ya yu'unin spisil te balumilal teme ch'ayel ya xbajt' soc te xch'ulele?

³⁷ ¿Bila ya yac'bey ta jelol te xch'ulel teme chaye?

³⁸ Teme ya xq'uexawex cu'une soc teme ya xq'uexawex yu'un te jc'op ta stojol te mach'atic ayic ta q'uinal ta ora to te ma junuc yo'tanic ta stojol Dios soc te c'aemic ta mulile, ja' nix jich ya me xq'uexaw awu'unic uuc te Nich'anile, te c'alal ya xtal soc yutsilal te State soc te ch'ul abatetic yu'une —xi' te Jesuse.