San Marcos 16 - Bible in Tzeltal de Oxchuc y Tenejapa

Jich cha'cux tel te Jesuse

¹ C'alal c'axemix a te sc'aalelal cux-o'tane, te María Magdalena, soc te yan María te sme' te Jacobo, soc te Salomé, ba smanic perfume yu'un ya xba yac'beyic ta sbaq'uetal te Jesuse.

² Ta sbabial c'aal yu'un te semanae, sab to bajt'ic ta muquenal. Yac to nax ta loq'uel tel c'aal a.

³ Jich la yalbey sbaic: —¿Mach'a ya xbalch'unbotic te muc'ul ton te macal sti' a te muquenale? —xiic.

⁴ Ja'uc me to, te c'alal la yilique, balch'unbilix loq'uel la yilic te buen muc'ul ton te la yich' maquel jilel a te sti'e.

⁵ Ochic bael ta yutil te muquenale. Tey la yilic a jtul jch'iel querem nacal ta swa'el muquenal. Buen sac te snajt'il sc'u'e. Xiwic yu'un.

⁶ Ja'uc me to, c'oponotic yu'un: —Ma me xiwex. Yacalex ta sleel te Jesús te Nazarete te la yich' milel ta cruz, ja'uc me to, cha'cuxemix. Ma ba li' ayix to. Ilawilic te banti la yac'beyic te sbaq'uetale.

⁷ Baan albeya yaiyic te jnopojeletic yu'une soc uuc te Pedroe: Ya xneelaj bael awu'unic ta bay Galilea te Jesuse. Tey me ya xc'o awilic a jich te bit'il la yalbeyexe —xi'.

⁸ Jich loq'uic tel ta muquenal te antsetique. Bajt'ic ta anel, melel bayal yac ta nijq'uel yo'tanic yu'un xiwel. Ma'yuc mach'a la yalbey yaiy jtuluc, yu'un xiwen te yo'tanique. [

Jesús la yac' sba ta ilel ta stojol te María Magdalenae

⁹ Te c'alal cha'cuxix tel Jesús ta sacubel q'uinal ta sbabial c'aal yu'un te semanae, ja' sbabial te la yac' sba ta ilel ta stojol te María Magdalena te loq'uesbil juqueb pucujetic ta yo'tan yu'une.

¹⁰ Jich te Mariae ba yalbey yaiyic te mach'atic la sjoinic ta beel te Jesuse, yu'un bayal ayic ta mel-o'tan soc ta oq'uel.

¹¹ Jich la yaiyic stojol te bit'il cuxulix te Jesuse, soc te bit'il la yilix te María, ja'uc me to, ma la xch'uunic.

Jesús la yac' sba ta ilel ta stojol cha'tul jnopojeletic

¹² Patil ay yan te bit'il la yac' sba ta ilel ta stojol cha'tul te yacalic ta beel ta bee.

¹³ Te chebique ba yalbey yaiyic te yantique. Ja' nanix jich ma la xch'uunbeyic te sc'opique.

Jesús la yac'bey jilel yat'el te jnopojeletique

¹⁴ Ta slajibal la yac' sba ta ilel ta stojol te buluchtul jnopojeletic te c'alal yacalic ta we'ele. La yalbey ta sitic te ma'yuc bi ya sc'an xch'uun yo'tanique soc te tulan te yo'tanique, melel ma la sc'an xch'uunbeyic sc'op te mach'atic la yiliquix te cha'cuxemixe.

¹⁵ Jich albotic yu'un: —Baanic ta bayuc ta spamal balumilal. Cholbeya te lec yach'il c'op spisil te muc' biq'uite.

¹⁶ Te mach'a ya xch'uune soc teme ya yich' ja'e, ya me xcol. Yan te mach'a ma xch'uune, ya me x'ac'ot ta lajel sbajt'el q'uinal.

¹⁷ Soc ya me xchicnaj señailetic ta swentaic te mach'atic ya xch'uunique. Ta swenta jbiil ya me sloq'uesic pucujetic, soc ya me xc'opojic ta yantic c'opetic,

¹⁸ soc ya me stsac ta sc'abic jti'awal chanetic, soc ya me yuch'ic te bila miljibale, ja'uc me to, ma ba ya xlajic yu'un, soc ya me scajanbey sc'abic ta sjol te jchameletic, jich me ya xcolic —xi' te Jesuse.

Jesús mo bael ta ch'ulchan

¹⁹ Lajix yo'tan ta sc'oponel a te jnopojeletic yu'un te ic'ot moel ta ch'ulchan te Cajwaltic Jesuse. C'o najc'ajuc ta swa'el te Diose.

²⁰ Te jnopojeletique loq'uic bael ta bayuc ta xcholel te lec yach'il c'ope. Ja' coltayotic ta at'el yu'un te Cajwaltique, soc te bila la yalique, ja' la snujp'in sba soc te señailetic te chicnaj ta swentaique. Jichuc.]