San Marcos 15 - Bible in Tzeltal de Oxchuc y Tenejapa

Jesús tejc'anot ta stojol Pilato

¹ Te c'alal sacubix a te q'uinale, te jwolwanej-sacerdoteetic, te principaletic, te jts'ibojometic, soc ta spisil te Muc'ul Tsoblej yu'unique, la stsob sbaic ta xchapel sc'opic. Jich la xchuquic bael te Jesuse. Ba yac'beyic ta sc'ab te Pilatoe.

² Te Pilato la sjojc'obey yaiy te Jesuse: —¿Ja'at bal Muc' Ajwalilat yu'un te judioetique? —xi'. La yal te Jesuse: —Jich te bit'il la awale —xi'.

³ Te jwolwanej-sacerdoteetic bayal la slebeyic smul te Jesuse.

⁴ Te Pilato la sjojc'obey xan: —¿Bi yu'un te ma x'ajaq'ue? Aiya awaiy te jayeb amul te ya slebate —xi'.

⁵ Te Jesuse jp'al ma la sjac'. Jich bayal ayan yo'tan yu'un te Pilatoe.

Chajbaj sc'oplal ta milel ta cruz te Jesuse

⁶ Ta jujun q'uin Pascua c'aem te ajwalil te ya scoltay bael jtul chuquel, chican te lume te mach'a ya yich' coltayel yu'une.

⁷ Ay jtul winic Barrabás sbiil te pajal ayic ta chuquel soc te sjo'taque te la yaiyic milaw ta scontrainel te ajwalile.

⁸ Jich la stsob tel sbaic te lume. Jajch' sc'anbeyic Pilato te bit'il c'aem ta spasel ta yorail te q'uine.

⁹ Te Pilato la sjojc'obey: —¿Ya bal ac'anic te ja' ya jcoltay bael te Muc' Ajwalil yu'un te judioetique? —xi'.

¹⁰ Yu'un sna'oj stojol te Pilato te lab-o'tantaybil yu'unic te Jesuse, ja' swentail te ac'ot ta c'abal yu'un te jwolwanej-sacerdoteetique.

¹¹ Te jwolwanej-sacerdoteetic la sujic te lume te ja'uc ya sc'anic te ya xcol bael ta chuquel te Barrabase.

¹² Te Pilato la sjojc'obey xan te lume: —Ja' xan te mach'a Muc' Ajwalil yu'un te judioetic ya awalique, ¿bi ya ac'anic ya jpasbey? —xi'.

¹³ La yalic ta aw: —¡Mila ta cruz! —xiic.

¹⁴ La yal te Pilatoe: —¿Bi yu'un? ¿Bila amen spasoj? —xi'. La stoyesic xan te yawique: —¡Mila ta cruz! —xiic ta aw.

¹⁵ Jich yu'un te Pilato ja' la scoltay bael te Barrabase, yu'un la sc'an yo'tan te lecuc yo'tanic te lum yu'une. Soc la yac' ochuc ta majel te Jesuse, swenta yu'un ya xba yich' jijp'anel ta cruz stuquel.

¹⁶ Jich te soldadoetique la yiq'uic ochel ta yutil yamac'ul sna te ajwalile, te Pretorio sbiile. La yiq'uic tel stijq'uil te soldadoetique.

¹⁷ La yac'beyic slap tsaj'aman c'u'ul soc la yac'bey scoronain jalbil ch'ix ta sjol.

¹⁸ Jich la yawtayic ta labanwanej: —¡Bin nax yutsil te muc' ajwalilat yu'un te judioetique! —xiic ta slabanel.

¹⁹ La smajbeyic jalal ta sjol, soc la stubtayic, soc la squejan sbaic ta swenta yich'el ta muc' ta sc'opic.

²⁰ C'alal laj yo'tanic ta slabanel te Jesuse, la sloq'uesbeyic te tsaj'aman c'u'ule, soc la yac'beyic slap te sc'u' nixe. Jich la yiq'uic loq'uel. Ba smilic ta cruz.

Jijp'anot ta cruz te Jesuse

²¹ Ay jtul winic te talem ta Cirene, Simón sbiil te ja' stat te Alejandro soc te Rufoe, te xc'otuc ta c'alc'altique. La sujic ta xcuchel bael scruz te Jesuse.

²² La yiq'uic bael te Jesús ta bay q'uinal Gólgota sbiil te Yawil Baqueljolol xi' c'oeme.

²³ C'an yac'beyic yuch' vino capal soc mirra, ja'uc me to, ma la sc'an la yuch'.

²⁴ Jich la sjijp'anic ta cruz. Te soldadoetic la spasic ta número yilic te bila ya xc'ot ta swentaic juju-jtul yu'un te sc'u'-spaq'ue.

²⁵ Baluneb ora c'aal a te la yich' jijp'anel ta cruz te Jesuse.

²⁶ Soc la yaq'uic ta sjol cruz welel ch'ujte' ta bay ts'ibubil te bi swentailuc te ac'ot ta lajele: “MUC' AJWALIL YU'UN TE JUDIOETIQUE”, xi' te ts'ibubile.

²⁷ Soc ay cheb j'eleq'uetic te la yich'ic jijp'anel ta cruz soque. Jtul ta swa'el soc jtul ta xq'uexen. [

²⁸ Jich c'ot ta pasel te bila ts'ibubil ta Sjun te Diose te “ya me sjoin ta ajtayel te jmulawiletique”, te xie.]

²⁹ Te mach'atic yacalic ta c'axel tey a, la sjimulay sjolic ta slabanel: —¡E, ilawil xcal! Ya awal te ya ajin te templo soc te oxeb nax c'aal ya acha'pas xan ta ac'ope.

³⁰ Coltaya aba atuquel, coan tel ta cruz —xiic.

³¹ Ja' nanix jich la slabanic uuc te jwolwanej-sacerdoteetic soc te jts'ibojometique. Jich la yalbey sbaic: —La scoltay yantic, ja'uc me to, ma xju' ya scoltay sba stuquel.

³² Teme melel te ja' Cristo te Muc' Ajwalil yu'un te Israele, couc tel ta cruz ta ora quiltic. Jich me ya jch'uuntic —xiic. Soc la slabanic uuc te mach'atic pajal jipilic ta cruz soque.

Jich laj te Jesuse

³³ Ta olil c'aal ijc'ub q'uinal ta spamal te balumilale, ja' to ta oxeb ora smalel te c'aale.

³⁴ Ta oxeb ora c'aal a te tulan c'opoj te Jesuse: —Eloi, Eloi, ¿lama sabactani? —xi'. Ja' bi, “Dios cu'un, Dios cu'un, ¿bistuc la apijt'eson?” xi' ta c'asesel te bila la yale.

³⁵ Ay la yaiyic stojol te mach'atic tey ayic a, la yalic: —Ja' ya yic' tel te Elías te j'alwanej yu'un te Diose —xiic yu'un.

³⁶ Ay jtul te ora nax ba smul ta vinagre te esponjae. La slujch'an moel ta jalal yu'un ya yac'bey sts'ub te Jesuse. Jich la yalbey te yantique: —Ya jmaliy quiltic teme ja' ya xtal scojt'es ta cruz te Eliase —xi'.

³⁷ Te Jesuse tulan awun. Loc' xch'ulel.

³⁸ Jich ora jats coel tel c'alal sba c'alal yet'al te pac' tsalbil a te temploe.

³⁹ Te centurión yu'un soldado te teq'uel ta bay jipil te Jesuse, te c'alal la yil te bit'il awun soc te bit'il loc' xch'ulele, jich la yal: —Melel nix a te ja' Snich'an Dios in winic to —xi'.

⁴⁰ Ay antsetic te q'uejel to ayic ta ilwaneje. Tey ayic soc a te María Magdalena, soc te María te sme' te jch'iel Jacobo soc te José, soc uuc te Salomé.

⁴¹ Ja' in antsetic to la sts'aclinic ta bael te Jesús te c'alal ay to ta sq'uinal Galilea. La yac' sbaic ta abatinel yu'un. Soc ay tsobol yantic antsetic te sjoinejic moel ta Jerusalén.

La yich' muquel te Jesuse

⁴² Ja' sc'aalelal a te ya xchajban sbaic te judioetic te bit'il pajel xanix te sc'aalelal cux-o'tan yu'unique, soc malix c'aal a.

⁴³ Ay jtul winic José sbiil te talem ta ch'in lum Arimatea te yich'oj yat'el ta Muc'ul Tsobleje. Ich'bil ta muc' te José, soc yac ta smaliyel te bit'il ay ta ajwalinel te Diose. Ja' ba sc'opon te Pilatoe. Ma ba xiw ta stojol te ya sc'anbey sbaq'uetal te Jesuse.

⁴⁴ Te Pilatoe ayan yo'tan yu'un te lajemix la yaiye. Jich la yic' tel sjojc'obey yaiy te centurión yu'un soldado teme melele.

⁴⁵ Te c'alal albot yu'un te centurión te bit'il lajemixe, jich la yalbey te José te ya yich'bey bael te sbaq'uetale.

⁴⁶ Te José la sman te sábana-paq'ue, la scotesbey te sbaq'uetal soc la spotsbey ta pac'. Jich ba yac' jilel ta muquenal te p'ijom ton jutbil ochele, soc la smacbey jilel sti' ta muc'ul ton.

⁴⁷ Te María Magdalena soc te María te sme' te José la yilic te banti la yaq'uic jilele.