Malaquías 4 - Bible in Tzeltal de Oxchuc y Tenejapa

Bit'il ya xc'ot sc'aalelal Cajwaltic

¹ Te Cajwaltic te Spisil ya xju' yu'un ya yal: —Yaquix ta talel sc'aalelal te xpulpon ta tilel jichuc sc'aal horno; spisil te toybaetic soc te mach'a amen yo'tanic, ya me xtilic jichuc ac ta yawil c'ajc'. Te bi c'aalil ya xtale ya me jchic'; ma'yuc jtuluc ya xjil ta jyalel.

² Yan te ja'ex te awich'ojonic ta muc', ya me xtil ta atojolic jichuc xojobil c'aal te chajbanel cu'une; te xojobile ya me yac' cuxlejal. Ja' yu'un te ja'ex ya me xwilex yu'un sbujts' awo'tanic, jichuc alal wacaxetic te c'alal ya xloq'uic bael ta yawil swe'elique.

³ Te sc'aalelal yacon ta xchajbanele, te ja'ex ya me apech'ic ta teq'uel te mach'atic amen yo'tanic jich te bit'il ts'ubil lume.

⁴ “Na'aic me te mandalil te la cac'bey te cabat Moisés ta wits Horeb. Ja'ic te mandaliletic, te spisil Israel ya me sc'an xch'uunic spasel.

⁵ “Aiya awaiyic, ya jticunbeyex te j'alwanej Elías te c'alal ma to xc'ot sc'aalelal te Cajwaltic, te mero muc' sc'aalelal te xiweltic sbae.

⁶ Ya me yac' xlecub yo'tan te tatil soc te snich'nabe. Teme ma xlecub yo'tanique, ya xtalon, ya cac'bey castigo te slumal, ya jlajin ta jc'axel ta spisil —xi' te Cajwaltique.