Malaquías 3 - Bible in Tzeltal de Oxchuc y Tenejapa

¹ Te Cajwaltic te Spisil ya xju' yu'un ya yal: —Ya me jticun tel j'alwanej cu'un swenta yu'un ya xchajbanbon jbe. Te Ajwalil te yacalex ta sleel te ja'exe, ora me ya x'ochix bael ta templo yu'un. Julelix tel te j'alwanej yu'un te tratoe, ja' te mach'a maliybil awu'unique —xi' te Cajwaltique.

² Ja'uc me to, ¿mach'a ya xcujch' yu'un te bi c'aalil ya xtale? ¿Mach'a ya xju' yu'un te stalel teq'uel ya xjile? Melel jich ya xjul te bit'il c'ajc' te ya slecubtesotic, jich bit'il xapon te ya sloq'uesbotic sbolil te co'tantique.

³ Te Cajwaltic ya me slecubtes te sacerdoteetic, ja' te mach'atic sts'umbal Leví, jich bit'il mach'a ya slecubtes plata soc oro ta c'ajc'. Ta patil jich me ya xju' ya yaq'uic majt'anil ta stojol te Cajwaltique, jich te bit'il ya sc'an ya spasique.

⁴ Te Cajwaltic ya me xbujts'naj yo'tan yu'un te majt'anil yu'un Judá soc Jerusalén, jich nix te bit'il bujts'naj yo'tan yu'un te yantic ta nameye.

⁵ Te Cajwaltic te Spisil ya xju' yu'un ya yal: —Jo'on ya xtal quilbeyex awat'elic. Jo'on me testigoon, ya me cal ta jamal te mach'a yat'elinej ac'-chamel soc mulwej; te mach'atic ya spas lot; te mach'atic ya yuts'inic te j'at'eletic, me'ba antsetic, soc me'ba alaletic; te mach'atic ma lecuc yo'tanic ta stojol jyanlumetic; soc te mach'atic ma xyich'onic ta muq'ue.

Te jun ta slajunebal soc majt'aniletic

⁶ “Jo'on Ajwalilon, ma'yuc bay yanajem co'tan. Jich ma ba jtup'ex ta q'uinal te sts'umbalex Jacob.

⁷ Ja'uc me to, jowejemex, ma ja'uc at'unojic te mandaliletic cu'un. Jichex te bit'il jowejic te antiguo ame'-atatique, jich ma x'ac'an ach'uunonic ta ora to. Jo'on te Ajwalilon te Spisil ya xju' cu'une ya calbeyex: Sujt'anic tel ta jtojol, jich ya sujt'on tel ta atojolic te ja'exe. Ja'uc me to, ya awalic: “¿Bi ya sc'an ya jpastic te ya sujt'otic bael ta atojol ya awale?” xaex.

⁸ Jo'on ya cal: ¿Ya bal xju' awaiy te ya yelc'anbey sbiluc Dios te winique? Melel ja'ex la awelc'anbonic. Ja'uc me to, ya awalic: “¿Bila la quelc'anbat?” xaex. Ja' te ma x'ac'an ya awac'bonic te jun ta slajunebal soc te majt'aniletic cu'une.

⁹ Melel nix a, ta spisil te nación, ta apisilic te ja'ex yacal awelc'anbelonic, jich yu'un ya jch'ayex ta co'tan. Jo'on te Ajwalilon te Spisil ya xju' cu'un jich me ya calbeyex:

¹⁰ Ich'bonic tel jun ta slajunebal te abiluquic ta bay yawil ta templo, jich me ay we'eliletic ta jna. Pasawonic ta prueba, ya me awilic te ya jambeyex sventanail te ch'ulchane, ya me xco tel ta atojolic bayal te bendicione.

¹¹ Ma xcac' xtal xchamel ta awawal-ats'unubic soc te ts'usubiltic awu'unique.

¹² Ta spisil te nacionetic ya me yalbeyex te bin nax yutsil ac'oplalic, melel te ja'exe mulanbil me te alumalic. Jo'on Ajwalilon te Spisil ya xju' cu'un te jich caloje —xi'.

Dios ya sna'bey yo'bolil sba lum yu'un

¹³ Te Cajwaltic ya yal: —Te ja'exe ay bitic mero tulan awalojbonic ta jtojol. Soc ya ajojc'oyic: “¿Bila a te calojtique?” xaex.

¹⁴ Te awalojique: “Te abatinel ta stojol Dios ma'yuc swentail. ¿Bila ya xloc' cu'untic a te ya jpastic te bila ya yal ta mandal, soc te ya yich' lapel c'u'il swenta mel-o'tan ta stojol te Cajwaltic te Spisil ya xju' yu'une?

¹⁵ Jo'otic quilojtic te ja' bin nax yo'tanic ta beel te toybaetique; soc te mach'atic amen yat'elic lec ya xloq'uic stuquelic te ya yilbeyic yo'tan Dios, ni jtebuc castigo ya yich' stuquelic”, xaex ta yalel —xi' te Diose.

¹⁶ (Te mach'atic yich'ojic ta muc' te Diose la yalbey sbaic; te Cajwaltic la yaiybey stojol ta lec te bila la yalique. Jich yu'un ta stojol te Cajwaltic la yich' ts'ibuyel libro, yu'un ya yich' na'el a te mach'atic yich'ojic ta muc' te Cajwaltic soc te ya yich'ic ta wenta.)

¹⁷ Te Cajwaltic te Spisil ya xju' yu'un ya yal: —Yacon ta xchajbanel sc'aalelal te mero lum cu'un ya xc'ot. Jich te bit'il tatil te ya xjajch' sna'bey yo'bolil sba te snich'an ya yabatin, jich me ya xjajch' jna'bey yo'bolil sbaic te jo'one.

¹⁸ Jich yu'un te ja'ex ya me ana'ic stojol ta yan buelta, te yan yilel te mach'a leque soc te mach'a amene, soc yan yilel te mach'a ya squejan sba ta xch'uunel Dios soc te mach'a ma squejan sba ta stojole —xi' te Cajwaltique.