Malaquías 2 - Bible in Tzeltal de Oxchuc y Tenejapa

¹ Te Cajwaltic la yalbey xan: —Ta ora yo'tic, sacerdoteetic, ya calbeyex xan awaiyic:

² Ja'ex ay ta awentaic te ya ach'uunbonic te jc'ope; soc ja' ya sc'an te ayuc sc'oplal ta awo'tanic te ya awich'onic ta muq'ue. Teme ma xapasic, ya me jch'ayex ta co'tan. Teme ma'yuc jc'oplal ta awo'tanic te ya awich'onic ta muq'ue, ya me jch'aybeyex te bila ya ataic ta awat'elic ta sacerdoteile —xi' te Cajwaltic te Spisil ya xju' yu'une.

³ Soc la to yal xan: —Ya me jpojbeyex te awat'elic, soc ya me jtujq'uiybeyex ta asitic te stsa' chambalametic te ya awiq'uic tel ta milele. Pajal ya xbaex ta ch'ojel soc te stsa' chambalametique.

⁴ Jich me ya ana'ic stojol te jo'on cac'ojbeyex te mandalil in to ta swenta te trato cu'un soc Leví te ma xch'ay sbajt'el q'uinal —xi' ta yalel te Cajwaltic te Spisil ya xju' yu'une.

⁵ Soc cha'c'opoj xan: —Te trato cu'un ja' cuxlejal soc lamal q'uinal ta stojol Leví. La cac'bey yu'un ya me yich'on ta muc' soc ya me xi'on; jich yu'un la yac'bon quil te la xi'one soc te la yich'on ta muq'ue.

⁶ Te Leví la yaiy p'ijubteswanej yu'un te bila smelelil; soc ma'yuc bila amen loc' ta ye. Toj nax cuxin; lamal nax q'uinal yu'un ta jtojol. Tsobol la yac'bey snopic te ma ba ya spasic te bila amen ta pasele.

⁷ Ja' me yat'elic te sacerdoteetic ta sp'ijubtesel te lum te yacuc sna'bonic jbae; soc jich me spisilic ya xtalic ta sleel p'ijubtesel ta stojolic, melel ja'ic te j'alwanejetic cu'un, jo'on Ajwalilon te spisil ya xju' cu'une.

⁸ “Yan te ja'ex sacerdoteetic, la awijq'uitayiquix jilel te lequil be. Ay bila yaquex ta yaq'uel ta nopel te bayal yaliquix yu'une. Jich la ach'ayboniquix sc'oplal te trato cu'un soc Leví.

⁹ Jich yu'un, ta scaj te ma ba ya ach'uunbonic te jc'ope, soc te c'alal ya ap'ijubtesic te lum, ma pajaluc ya ac'opon ta spisilic, ya me cac' te spisil lum ya xjajch' yilayex ta yo'tanic, soc ma'yuc ac'oplal ya xc'oex ta yo'tanic —xi' te Cajwaltic te Spisil ya xju' yu'une.

Ma junuc yo'tanic ta stojol Dios israeletic

¹⁰ ¿Yu'un bal ma junuc nax Jtatic ta jpisiltic, ja' te Dios te la xchicnantesotic ta jpisiltic? ¿Bi yu'un nix a te ya jlo'lay jbatic juju-jtul te yacotic ta jelawel a te trato la spas Dios soc te antiguo jme'-jtatique?

¹¹ Ma junuc yo'tan ta stojol Dios te Judae; yac ta spasel te bila mero c'ax amen ta jyalel ta lum Jerusalén soc ta spamal sq'uinal Israel. Te Judae la sboltesbey yutsilal te templo smulanej te Cajwaltic, melel te winiquetic ta Judá la yinaminic te antsetic te ya squejan sbaic ta xch'uunel te lotil diosetique.

¹² Ayuc bit'il ya yich' tup'el yu'un Cajwaltic ta jlumaltic te mach'a jich ya spase, mach'auc a, manchuc me ya yich'bey tel smajt'an Cajwaltic te Spisil ya xju' yu'une.

¹³ Ja'uc me to, ay yan bila ya apasic: Ya awajts'es ta ya'lel asitic te scajtijib smajt'an te Cajwaltic; c'ax bayal ya x'oq'uex yu'un, te ma binuc nax yo'tan Cajwaltic ya stsac te majt'aniletic awu'unique.

¹⁴ Soc ya to ajojc'oyic te bi yu'une. Ja' testigo te Cajwaltic te ma c'ot ta pasel awu'un te bila la achap ta stojol te ach'ix nujbinat soc te c'alal queremat toe. Ja' ajoy ta xjajch'ibal, soc la awalbey ta jamal te jun me awo'tan ta stojol ta sbajt'el ora.

¹⁵ ¿Yu'un bal ma junuc nax Dios la spasbey sbaq'uetal soc xch'ulel? Te bi ya sc'an te Diose, ja' ya sc'an te sts'umbal te ch'ultesbile. Canantaya abaic ta lec soc awo'tanic, swenta yu'un ma me ayuc ya xch'ay te ac'op la awal ta jamal ta stojol te awinam la ata c'alal queremat to a.

¹⁶ Te Cajwaltic te Dios yu'un Israel te Spisil ya xju' yu'un, jich ya yal: —Canantaya awo'tanic, ma me chebuc awo'tanic ta stojol te awinamique; ma me lecuc co'tan yu'un te mach'a ya yijq'uitay yinam, soc te ya sboltes sba ta spasel te bila amene —xi' te Diose.

Sc'aalelal ich'el ta wenta cat'eltic

¹⁷ Te Cajwaltic lubenix yu'un yaiyel stojol ac'opic; ja'uc me to, ya ajojc'oyic: —¿Bila calojtic te lubenix yu'un yaiyel stojole? —xaex. Melel awalojic te ya smulan Cajwaltic te mach'atic ya spasic te bila amene, te bin nax yo'tan yu'un ta ac'opique. Yu'un nix ma xch'uun awo'tanic a te toj yo'tan te Diose.