San Lucas 4 - Bible in Tzeltal de Oxchuc y Tenejapa

Te pucuje tal yilbey yo'tan te Jesuse

¹ Te Jesús noj ta yo'tan te Ch'ul Espiritue. Jich la yijq'uitay jilel te muc'ja' Jordán, soc ic'ot bael yu'un te Espíritu ta bay jochol taquin q'uinal.

² Tey ain cha'winic c'aal a, soc tal ta ilel yo'tan yu'un te pucuje. Xujt' ma ba we' te jich yipal c'aal tey ae. Patil la yaiy wi'nal.

³ Te pucuje jich albot yu'un: —Teme ja'at Snich'anat te Diose, albeya te ya xc'atp'uj ta waj te ton in to —xi' te pucuje.

⁴ La yal te Jesuse: —Ts'ibubil ta Sjun Dios te “Ma ja'uc nax ta waj cuxulic a te ants-winiquetique. Ja' ya xcuxinic yu'un spisil te bila yaloj Dios ta sti'”, te xie —xi' te Jesuse.

⁵ Te pucuje ic'ot bael yu'un ta bay toyol wits. Ta ora nax ac'bot yil yu'un spisil ta jchajp lumetic te ayic ta balumilal.

⁶ Te pucuje la yal: —Ya cac'bat tulan awat'el ta swentainel spisil ta jchajp in lumetic to soc te yutsilale. Melel ochem ta jwenta spisilic, chican co'tan jtuquel te mach'a ya cac'beye.

⁷ Jich yu'un teme ya aquejan aba soc teme ya awich'on ta muq'ue, awu'un ya xc'ot spisil —xi'.

⁸ Te Jesús jich la yalbey: —Loc'an ta jtojol, Satanás, melel jich ya yal te Sc'op Dios ts'ibubil jilele: “Ja' nax me ya aquejan aba ta stojol te Cajwaltic Diose, soc ja' nax me ya awac' aba ta abatinel ta stojol stuquel”, te xie —xi'.

⁹ Soc ic'ot xan bael yu'un te pucuje ta bay lum Jerusalén. Jich c'o tejc'anotuc yu'un ta bay jol templo te Jesuse. Jich la yal te pucuje: —Teme ja'at Snich'anat te Diose, ch'oja aba coel li'to.

¹⁰ Melel ts'ibubil ta Sjun te Diose: “Te Dios ya yalbey mandal te ch'ul abatetic yu'un te ya me scanantayate.

¹¹ Ya me xtal stsacat ta sc'abic swenta yu'un ma ba ya alajin awacan ta ton”, te xie —xi' te pucuje.

¹² Jesús la yalbey: —Soc jich ya yal uuc te Sjun Diose: “Ma me x'awilbey yo'tan te Cajwaltic Diose”, te xie —xi'.

¹³ Te pucuje ma la sta te bila ya yilbey xan yo'tan a te Jesuse. Jich la yijq'uitay jilel jun chebuc c'aal.

Jajch' ta at'el Jesús ta sq'uinal Galilea

¹⁴ Te Jesús sujt' bael ta Galilea ta swenta yu'el te Ch'ul Espiritue. Pujc' sc'oplal ta spamal te q'uinale.

¹⁵ La yaiy p'ijubteswanej ta bay sinagogaetic ta juju-jpam lum. Spisilic bin nax yo'tanic yu'un ta bayuc.

C'ot ta lum Nazaret te Jesuse

¹⁶ Te Jesús bajt' ta lum Nazaret te banti ch'ie. Ta sc'aalelal cux-o'tan bajt' ta sinagoga, jich te bit'il c'aem ta spasele. La stejc'an sba ta yilel te Sjun Diose.

¹⁷ Ac'bot ta sc'ab te sjun Isaías te namey q'uinal j'alwanej yu'un te Diose. Ja' la sjam yil te bay ts'ibubil jilele:

¹⁸ “Te Espíritu yu'un te Cajwaltique julix ta jtojol, yu'un tsabilon yu'un ta yalel te lec yach'il c'op ta stojol te me'baetique. Ticunbilon tel ta scoltayel te mach'atic ay swocolic ya yaiyic ta yo'tanique, soc te ya calbey yaiyic te bit'il ya xcolic ta libre te mach'atic ayic ta chuquele, soc te ya jambey sitic te ma'sitetique, soc te ya jcoltay ta libre te mach'atic mosoinbilique,

¹⁹ soc te ya jchol te bit'il yorailix coltayel yu'un te Cajwaltique”, te xie.

²⁰ La smac te jun te la yile, soc la yac'bey te mach'a swentainej te junetique. Jich la snajc'an sba ta p'ijubteswanej ta stojol spisilic. Spisil te mach'atic ayic ta sinagoga la yilbeyic sit te Jesuse.

²¹ Jajch' yal te Jesuse: —Ja' in c'aal to, ja' c'otix ta pasel ta atojolic te bi la ts'ibubil jilel ta Sjun Dios —xi'.

²² Spisilic lec bajt' sc'oplal yu'unic te Jesuse, soc bayal ayan yo'tanic yu'un te bit'il buen t'ujbil la yaiybeyic te sc'ope. La sjojc'obey sbaic: —¿Ma bal ja'uc snich'an José in winic to? —xiic.

²³ Te Jesús jajch' yalbey yaiyic: —Ay wan jich ya awalic te bit'il ay ta alele: “Te bit'il jpoxtaywanejate, poxtaya aba atuquel”, xaex me. Soc jich ya awalic uuc: “Te bila la apas ta Capernaúm, jich nix me xapas li'to ta bay alumal”, ya niwan awutonic —xi' te Jesuse.

²⁴ Soc la yalbey yaiyic: —Jamal ya calbeyex, ma x'ich'ot ta muc' ta bay slumal te mach'a j'alwanej yu'un te Diose.

²⁵ Melel xcalbeyex, te c'alal ay ta j'alwanej ta namey te Eliase, ay tsobol me'ba antsetic ta bay smaquen-q'uinal Israel. Te c'alal ma ba la yac' ja'al olil xchaneb ja'wil, jich tal bayal wi'nal ta spamal q'uinal.

²⁶ Ja'uc me to, te Elías ma teyuc ticunot bael a ta bay me'ba antsetic te ayic ta sq'uinal Israel. Tey ticunot bael yu'un Dios ta bay sna jtul me'ba ants te ay ta ch'in lum Sarepta ta bay sq'uinal Sidón.

²⁷ Ja' nanix jich te c'alal ay ta j'alwanej te Eliseoe. Tsobol mach'atic ayic ta c'a'el-chamel ta sq'uinal Israel. Ja'uc me to, jtul ma'yuc mach'a la yich' lecubtesel, ja' nax te Naamán te talem ta sq'uinal Siria —xi' te Jesuse.

²⁸ C'alal la yaiyic stojol te jich la yal te Cajwaltique, ilinic yu'un spisil te mach'atic ayic ta sinagogae.

²⁹ Caj stenic loq'uel ta ti'lum te Jesuse. La yiq'uic bael ta bay mero toyol coel te witse, yu'un ta ba wits ay te lume. Tey c'an scotp'inic coel a.

³⁰ Ja'uc me to, te Jesuse c'ax ta yolilic. Bajt'.

Jtul winic te ay pucuj ta yo'tan

³¹ Te Jesús co bael ta Capernaúm te ay ta sq'uinal Galilea. Tey la yaiy p'ijubteswanej ta stojol te ants-winiquetic ta sc'aalelal cux-o'tan.

³² Bayal la ayan yo'tanic yu'un te bila la yal ta p'ijubteswanej, melel jich c'opoj te bit'il mach'a yich'oj tulan yat'ele.

³³ Ay talem ta sinagoga jtul winic te ochem pucuj ta yo'tan. Tulan awun:

³⁴ —Jesús te Nazarete, ¿bi awentaotic? ¿Yu'un bal tal ajinotic? Ya jna'bat aba te ja'at te Xch'ul-nich'anat te Diose —xi' ta aw.

³⁵ Jesús la scom ta c'op te pucuje: —¡Ma xc'opojat! ¡Loc'an tel ta yo'tan te winique! —la yut. Te winic jipot ta lum yu'un te pucuj ta bay yolilic. Jich a loc' ta yo'tan. Ma'yuc yejch'en jilel.

³⁶ Spisilic jchajp nax la yilic a. Jich la yalbey sbaic: —¿Bit'il ay a te sc'ope? Yich'oj tulan yat'el soc ay yu'el yu'un sloq'uesel pucujetic, te melel ta smandal nax ya xloq'uic ta ora yu'un —xiic.

³⁷ Pujc' sc'oplal ta sjoylejal q'uinal te Jesuse.

Jesús la slamantesbey xchamel te snialme'el te Simón Pedroe

³⁸ Loc' tel ta sinagoga te Jesuse, bajt' ta sna Simón. Te snialme'el te Simone ay bayal swocol, ay ta tulan c'ajc'. La yalbeyic wocol te Jesús te yacuc slamantesbey te sc'aale.

³⁹ Te Jesús la stinan sba yil, la scombey te sc'aale. Ora nax a lamaj te xchamele. Tejc'aj jajch'el ta ora, och ta mac'linwanej.

Jesús la slamantes tsobol jchameletic

⁴⁰ Te c'alal ch'ayix bael c'aal a, spisil te mach'atic ay jchameletic yu'unique, chican te bila chameliluc te yich'ojique, la yiq'uic tel ta stojol te Jesuse. La scajanbey sc'ab ta sjol juju-jtul, jich lamaj xchamelic ta spisilic.

⁴¹ Soc loc' pucujetic ta yo'tanic tsobol ta jtul te mach'atic ayic ta chamele. Awun te pucujetique: —Ja'at Snich'anat te Diose —xiic ta aw. Te Jesús la scom ta c'op te pucujetique, yu'un sna'ojic te ja'ix te Cristoe.

Jesús la xchol sc'op Dios ta sq'uinal Galilea

⁴² C'alal yac ta sacubel q'uinal a, loc' bael ta lum te Jesuse. Bajt' ta bay jochol te q'uinale. Jajch' ta leel yu'un te ants-winiquetique. Te c'alal la staique, c'an scomic te manchuc ya x'ijq'uitayotic yu'une.

⁴³ Te Jesús la yalbey yaiyic: —Puersa ya xba cal ta bay lumlumtic te lec yach'il c'op te ya xjajch'ix ta mandal te Diose, melel ja' swentail te ticunbilon tel yu'une —xi'.

⁴⁴ Jich been Jesús ta xcholel te lec yach'il c'op ta bay sinagogaetic te ayic ta spamal sq'uinal Galilea.