San Lucas 2 - Bible in Tzeltal de Oxchuc y Tenejapa

Jich ayin te Jesuse

¹ Patil la yal tulan mandal te Cesar Augusto te ya x'och ta censo spisil ants-winiquetic te ayic ta bay te smaquen-q'uinale.

² Ja' sbabial censo te la yich' pasel te ay yat'el ta Gobernador ta sq'uinal Siria te Cirenio sbiile.

³ Spisil ants-winiquetic puersa ba yac' ta najc'anel sbiilic juju-jtul ta bay te slumalique.

⁴ Jich te José loc' tel ta lum Nazaret ta bay sq'uinal Galilea. Bajt' ta lum Belén te ay ta sq'uinal Judea. Yu'un ja' slumal te namey q'uinal muc' ajwalil David, soc ja' sts'umbal David te Joseje.

⁵ Tey ba yac' ta najc'anel sbiil soc a te María, te macbilix yu'une, soc te yic'ojix alal ta xch'ujt'e.

⁶ Te bit'il ayiquix ta Belén ae, tey la sta yuil a te ya x'alaj te Mariae.

⁷ Tey ayin a te sba yale. La spots ta pac' soc la yac' wayuc ta yawil swe'el chambalam, yu'un ma la staiquix ta majanel te lequil wayibal-nae.

Te ch'ul abatetic soc te jcanan-chijetique

⁸ Nopol ta bay lum Belén ay jcanan-chijetic, stoyel ajc'ubal yacalic ta scanantayel xchijic ta bay aquiltic.

⁹ Chicnaj tel ta stojolic jtul ch'ul abat yu'un te Cajwaltique. Lem tel xojobil Cajwaltic ta sjoyobalic. Bayal xiwic yu'un.

¹⁰ Te ch'ul abate, jich la yal: —Ma xiwex, aiya me awaiyic stojol te lec yach'il c'op ya calbeyexe. Bayal me ya xbujts'naj awo'tanic yu'un soc spisil te lume.

¹¹ Ajc' to nax yayinel ta bay slumal David te Jcoltaywanej awu'unique, ja' te Cajwaltic Cristoe.

¹² Ja' seña ya xc'o awilic: te alale potsbil ta pac' soc wayal ta yawil swe'el chambalam —xi' te ch'ul abate.

¹³ Ora chicnaj tsobol yantic ch'ul abatetic ta ch'ulchan. Yacalic ta sc'ajintayel te Diose:

¹⁴ “¡Jelawen ay yutsilal te Dios te ay ta ch'ulchan! Ya yac' lamajuc q'uinal ta balumilal ta stojol spisil ants-winiquetic te ayic ta c'uxtayel yu'une”, xiic.

¹⁵ C'alal sujt'ic bael ta ch'ulchan te ch'ul abatetique, te jcanan-chijetique jich la yalbey sbaic: —Conic ta Belén. Ya xba quiltic te bila c'otix ta pasel te la yac'botiquix jna'tic te Cajwaltique —xiic.

¹⁶ Jich bajt'ic ta ora. C'o staic te María soc José soc te alal wayal ta yawil swe'el chambalam.

¹⁷ Te c'alal la yilique, caj yaanic te bila albotic yu'un te ch'ul abat ta swenta te alale.

¹⁸ Spisil te mach'atic la yaiyic stojol te bila la yalic te jcanan-chijetique bayal ayan yo'tanic yu'un.

¹⁹ Yan te Mariae spisil ora la sna'ulay soc la snopilay ta yo'tan.

²⁰ Te c'alal sujt'ic bael te jcanan-chijetique, la sc'ajintaybeyic yutsilal Dios yu'un te bila la yaiyic stojole soc te bila la yilic ta sitique. Melel jich nix la yilic spisil te bila albot yaiyique.

Ac'ot ta stojol Dios te alal Jesuse

²¹ Ta waxaquebal c'aal yayinel a te alale, la spasbeyic circuncisión ta sbaq'uetal. Jesús sbiil c'ot yu'unic, jich nix te bit'il albot yu'un ch'ul abat te María te c'alal ma to yic'ojuc a te alale.

²² Te c'alal c'axix a te jayeb c'aal te ya yal te mandalil yu'un Moisés te ma lecuc sc'oplalique, la yiq'uic bael ta lum Jerusalén te alale, yu'un ba yaq'uic ta stojol te Cajwaltique.

²³ Jich c'o spasic te bit'il ts'ibubil jilel ta mandalil yu'un te Cajwaltique: “Spisil sba alalquerem te ya x'ayine, ja' me yu'un te Cajwaltique”, te xie.

²⁴ Jich c'o yac'beyic smajt'an Dios te bit'il ya yal te mandalil yu'un te Cajwaltique: “Chican teme cha'cojt' puliwoc o teme cha'cojt' stsumut”, te xie.

²⁵ Ay jtul winic te ainem ta lum Jerusalén te Simeón sbiile. Toj ta winiquil, soc yich'oj ta muc' te Diose. Jun yo'tan yac ta smaliyel te bi ora ya yich' coltayel ta libre te lum Israele. Te Simeone sjoinej te Ch'ul Espiritue.

²⁶ Ac'bot sna' stojol yu'un te ma to xlaj a te ya yilbey sit te Cristoe te ya xticunot tel yu'un te Cajwaltique.

²⁷ Jich ic'ot tel ta templo yu'un te Ch'ul Espíritu te bi c'aalil tal te sme'-stat te alal Jesuse, tal spasic te bit'il ya yal ta mandalile.

²⁸ Te Simeón la spet te alale, soc la yalbey yutsilal te Diose:

²⁹ —Cajwal, jun co'tan ic'awonix ta atojol. Melel c'otix ta pasel te bila awalojbon te awabatone.

³⁰ La quilix ta jsit te bit'il ay te jcolel awu'une,

³¹ te chapalix awu'un ta stojol spisil ta jchajp lumetic.

³² Ya me sacub q'uinal yu'un ta bay te jyanlumetique; soc ay me yutsilal ya xc'ot yu'un te lum Israel awu'une —xi' te Simeone.

³³ Te José soc te sme' te Jesuse, yan nax q'uinal la yaiyic yu'un te bila la yal te Simeón ta swenta te alale.

³⁴ Te Simeón la sc'anbey bendición ta stojolic, soc la yalbey te María te sme' te alale: —Aiya awaiy stojol, ja' in alal to, ay me tsobol te israeletic te ya xjinic yu'un soc ay me tsobol ya xtoy sc'oplalic yu'un. Te alale ja' seña yac'oj Dios te tsobol ya scontroinique.

³⁵ Tey me ya xchicnaj a te bila ay ta yo'tanic ta juju-jtule. In te ja'ate ya me xc'ax awocol ta mel-o'tan yu'un. Jich me xc'uxul ya awaiy te bit'il lowel ta puñale —xi' te Simeone.

³⁶ Soc ay jtul antsil-alwanej yu'un Dios tey a, Ana sbiil. Ja' yantsil-nich'an te Fanuele te sts'umbal Asere. Me'elix ta jyalel. Nujbin c'alal ach'ix to a, ja'uc me to, ja' nax juqueb ja'wil cuxin soc te smamlale.

³⁷ Ayix chane'yo'winic (84) ja'wil ya'wilal te jilem ta me'ba antse. Spisil ora ay ta templo. C'aal ajc'ubal la spas ayuno ta sc'oponel te Diose.

³⁸ Te c'alal yac ta c'op a te Simeone, tal uuc te Anae. La yalbey wocol Dios yu'un te alal Jesús, soc la yalbey sc'oplal ta stojol spisil te mach'atic yacalic ta smaliyel te bit'il ya yich' coltayel ta libre te lum Jerusalene.

Sujt'ic bael ta Nazaret

³⁹ Te bit'il la spasiquix ta templo spisil te bila ya yal te mandalil yu'un te Cajwaltique, sujt'ic bael ta Galilea ta bay slumalic, ja' te lum Nazarete.

⁴⁰ Ch'i te alale soc la yich' yip te yo'tane. Yanyan ta p'ijubel soc yich'oj bayal bendición yu'un te Diose.

Te ch'in querem Jesús xc'otuc ta templo

⁴¹ Te sme'-stat te Jesuse c'aemic ta jujun ja'wil te ya xbajt'ic ta spasel q'uin Pascua ta Jerusalén.

⁴² Te c'alal ayix lajchayeb ja'wil ya'wilal a te Jesuse, moic bael ta Jerusalén ta spasel q'uin, jich te bit'il c'aemic ta spasel jujun ja'wile.

⁴³ Te c'alal c'axemix spisil a te jayeb c'aal ay te q'uine, sujt'ic bael. Yan te querem Jesuse jil ta Jerusalén. Te sme'-state ma la sna'ic stojol teme jileme.

⁴⁴ La scuyic te ay tel ta yolilic te mach'atic sjoinejic ta beele. Jich beenic jun c'aal. Caj sleic ta bay yolil te xchapomale soc ta bay te yantic te na'bil sba yu'unique.

⁴⁵ Ja'uc me to, ma la staic tey a. Jich sujt'ic bael ta Jerusalén ta sleel.

⁴⁶ Yoxebal to c'aal la staic ta templo, nacal ta yolilic te jts'ibojometique. Yac ta yaiyel stojol te bila ya yalique, soc ay bila ya sjojc'obeyic ta stojolic.

⁴⁷ Spisil te mach'atic la yaiyic stojol sc'op te Jesuse, jchajp nax la yilic te bit'il ay sp'ijil sjol ta sujt'esel te aiyeje.

⁴⁸ Te sme'-state yan nax q'uinal la yaiyic yu'un te c'alal la yilique. La yal te sme'e: —Querem, ¿bistuc jich la apasbotic? Bayal ayon ta mel-o'tan ta jlebelat soc te atate —xi'.

⁴⁹ La yal te Jesuse: —¿Bistuc te yacalex ta leawe? ¿Yu'un bal ma x'ana'ic te ya sc'an ya cat'elin te bila ay yu'un te Jtate? —xi' te Jesuse.

⁵⁰ Ja'uc me to, ma c'ot ta yo'tanic te bila albotic yu'une.

⁵¹ Te querem Jesús la sjoinic sujt'el ta Nazaret. Jun yo'tan la xch'uun mandal ta stojolic. Te sme'e la sna'ulay ta yo'tan spisil te bila c'ot ta pasele.

⁵² Yanyan ta ch'iel te Jesuse, soc yac ta esmajel te sp'ijile. Yanyan ta toyel yutsil yo'tan ta stojol te Diose soc ta stojol te ants-winiquetic.