San Lucas 14 - Bible in Tzeltal de Oxchuc y Tenejapa

Jesús la scoltay jtul winic te ay ta sijt'ubel

¹ Ta sc'aalelal cux-o'tan bajt' Jesús ta we'el ta bay sna jtul jwolwanej yu'un te fariseoetic. Te yantic fariseoetique tal stsajtay yilic te Jesuse.

² Ay jtul winic tey a te ay ta sijt'ubele.

³ Te Jesús la sjojc'obey te maestroetic yu'un te mandalile soc te fariseoetique: —¿Lec bal te ya yich' coltayel jtuluc chamel ta sc'aalelal cux-o'tan, o ma lecuc? —xi'.

⁴ Ja'uc me to, ma c'opojic. Jich te Jesús la yic' tel te jchamele. La slamantesbey xchamel soc la sticun bael.

⁵ Soc jich la yalbey xan yaiyic te fariseoetique: —¿Ma bal yacuc aloq'uesic ta ora aburroic soc awacaxic teme ch'ay coel cojt'uc ta pozo manchuc teme sc'aalelal cux-o'tan? —xi' te Jesuse.

⁶ Ma ju' yu'unic sujt'esel te bila albotique.

Te mach'atic ic'bilic ta il-nujbinel

⁷ Jesús la yil te yacalic ta stsael te sbabial nactijibal ta swenta ich'el ta muc' te mach'atic ic'bilic ta we'el ta mesa. Jich la yalbey yaiyic ta seña-c'op:

⁸ —Teme ay mach'a ya yic'at ta yilel q'uin nujbinel, ma me xba anajc'an aba tey a ta bay swenta ich'el ta muc'. Teme ya xtal yan te c'ax jich ich'bil ta muc' te bit'ilate,

⁹ te mach'a yic'ojat soque ya me yalbat: “Wocoluc jajch'an, yu'un ja' ya xnajc'aj tey a in winic to”, ya me yutat. Jich me bayal q'uexlal ya awaiy yu'un te ya xba anajc'an aba tey a ta bay ma'yuc sc'oplale.

¹⁰ Jich yu'un, te c'alal ya x'ic'otate, tey xnajc'ajat a te bay te slajibale. Yu'un te c'alal ya xtal te mach'a yic'ojate, jich me ya yalbat: “Tatic, la' moan tel. Naclan li'to”, ya me yutat. Jich te mach'atic sjoinejat ta mesae ya me yilic te bit'il ich'bilat ta muq'ue.

¹¹ Melel te mach'a ya yac' sba ta ich'el ta muq'ue, ma'yuc sc'oplal ya xc'ot. Yan te mach'a peq'uel ya yac' sbae, ja' me ya x'ich'ot ta muc' stuquel —xi' te Jesuse.

¹² Soc la yalbey te mach'a ic'awan ta we'ele: —Te c'alal ya x'ic'awanat ta we'ele, ma me ja'uc x'awic' ta we'el te mach'a c'ux ya awaiy aba ta awo'tan soque, soc te apat-axujq'ue, soc te achapomale, soc te jc'ulejetic te nopol awiloj aba soque. Melel ya me yic'at ta we'el ta patil uuc. Ja' nax me sjelol ya xc'ot te ya yic'at ta we'ele.

¹³ Jich yu'un te c'alal ya apas q'uine, ja' me x'awic' tel ta we'el te mach'a ma'yuc bi ay yu'unique, soc jc'ojc'ol-c'abetic, soc coxoetic, soc ma'sitetic.

¹⁴ Jich me bin nax awutsil yu'un, melel ma xju' yu'un te ya yac'bey spacol te ya yic'at ta we'ele. Ja'uc me to, ya me awich'bey stojol te c'alal ya xcha'cuxat soc spisil te mach'atic toj awo'tan soc ta stojol te Diose —xi' te Jesuse.

Seña-c'op te muc'ul q'uine

¹⁵ Ay jtul winic te pajal nacal ta mesa soc te Jesuse te c'alal la yaiy stojol te bila la yale, jich la yal: —Bin nax me yutsil te mach'a ya x'ic'ot ta we'el ta banti ay ta ajwalinel te Diose —xi'.

¹⁶ Te Jesús jich la yalbey: —Ay jtul winic te la xchajban we'elil te la yic' ta we'el tsobol ta jtul.

¹⁷ Te c'alal la sta yorail te we'ele, la sticun bael yabat te ya xba yic' tel te mach'atic ic'bilique. Jich c'o yal te abate: “La'ic me. Yu'un chapalix spisil”, la yut.

¹⁸ Ja'uc me to, spisilic ay bila la smaquic a. La yal te jtule: “Ay jmanbel to jq'uinal. Jich yu'un puersa ya xba quil te bi yilele. Ya me apasbon perdón”, xi'.

¹⁹ La yal te yane: “Ay jmanoj jo'eb mancuerno jwacax. Ya xba quil te bi yilel ya x'at'ejique. Ya me apasbon perdón”, xi'.

²⁰ La yal te yane: “Ach' to nax nujbinon. Jich ma xju' cu'un te ya xboone”, xi'.

²¹ Te abate sujt' bael. Spisil c'o xcholbey yaiy te winique. Jich ilin yo'tan yu'un. Jich la yalbey te abate: “Baan ta ora ta muc'ul calleetic soc ta ch'in calleetic ta bay spamal te lume. Ic'a tel te mach'a ma'yuc bi ay yu'unique, soc uuc te jc'ojc'ol-c'abetic, soc coxoetic, soc ma'sitetic”, la yut.

²² Patil tal yal te abate: “Cajwal, la jpasix te bit'il la awalbon mandale, ja'uc me to, ay to jochol te nactijibale”, xi'.

²³ Te winique la yalbey te yabate: “Baan ta bebetic soc ta pat corraletic. Ic'a tel ta jyalel te jayeb mach'a ya atae. Jich me ya xnoj te jnae.

²⁴ Melel xcalbeyex, te mach'atic la quic' ta neelale, jtul ma x'ac'bot smulanic te we'elil te chapal cu'une”, xi' te winique —xi' ta yalel te Jesuse.

Ay swocolil ta ts'aclinel te Cristoe

²⁵ Ay tsobol ants-winiquetic la sts'aclinic ta beel te Jesuse. La sujt'es sba sc'opon:

²⁶ —Te mach'a ya xtal ta jtojole, teme ma c'axuc jich c'uxon ta yo'tan a te bit'il te state, te sme'e, te yiname, te snich'nabe, te sbanquiltaque, te xwixitaque, te yijts'inabe, soc uuc te xcuxlejal ta q'uinale, ma xju' te jnopojel ya xc'ot cu'une.

²⁷ Te mach'a ma sc'an ya xcuch scruz te ya sts'aclinone, ma xju' te jnopojel ya xc'ot cu'une.

²⁸ Teme ay jtul te ja'ex te ya ac'an ya apas muc'ul toyol ts'ajc', ¿ma bal neeluc ya anajc'an aba ta snopel teme tic' ya xju' a te jayeb taq'uin atsoboje?

²⁹ Melel teme ja' nax ya ajajch'es te yiptajibe, teme patil ma xju' awu'une, ya me slabanat spisil te mach'a ya yilique.

³⁰ Ya me yalic: “Te winique ma ju' yu'un sju'tesel te ts'ajq'ue”, xiic me.

³¹ Soc teme ay muc' ajwalil te ya sc'an ya xba spas guerra soc te yan muc' ajwalile, ¿ma bal neeluc ya snajc'an sba ta snopel teme ya xju' yu'un soc te lajunmil (10,000) yajsoldado te ya stsal ta guerra te jtab ta jmil (20,000) soldadoetic yu'un te yajcontroe?

³² Teme ma xju' yu'un ya yaiye, ya me sticun bael abatetic te c'alal najt' to ma xtaot yu'un te yajcontroe, swenta yu'un ya xba yalbey wocol te ya xlamaj a te c'ope.

³³ Ja' nanix jich te ja'exe, teme ma xawijq'uitay ta awo'tanic spisil te bila ay awu'unique, ma xju' te jnopojel ya xc'oex cu'une.

C'alal ya xch'ay xchi'il te ats'ame

³⁴ “Te ats'ame lec ta tuuntesel, ja'uc me to, teme laj te xchi'ile, ¿ya to bal xtuun xan?

³⁵ Ma xtuunix yu'un te lumq'uinale, soc ma xtuunix yu'un te c'a'al c'a'bale. Ja' xanix te ya yich' ch'ojel baele. Te mach'a ay xchiquine, ac'a me yaiy stojol ta lec —xi' te Jesuse.