Levítico 9 - Bible in Tzeltal de Oxchuc y Tenejapa

Aarón la sjach yat'el ta sacerdoteil

¹ Ta swaxaquebal c'aal a, te Moisés la sc'opon te Aarón, te snich'nab, soc te mamaletic ich'bilic ta muc' yu'un Israel.

² Jich la yalbey te Aarón: —Ic'a tel jcojt' toro yu'un ya yich' aq'uel ta milbil majt'anil yu'un te amulique, soc jcojt' tat chij te ma'yuc bila boloben ta sbaq'uetal, yu'un ya yich' aq'uel swenta majt'anil te scojt'ol ya yich' chiq'uele. Ya me awac'bey ta stojol te Cajwaltique.

³ Te israeletic albeya, ac'a stsaquic tel jcojt' tat tentsun swenta milbil majt'anil yu'un mulil, jcojt' toro soc jcojt' chij, pero ja' me te c'axem ta jun ja'wile, ja'ic me te ma'yuc bila boloben ta sbaq'uetal, swenta yu'un ya me yich' aq'uel ta swenta majt'anil te scojt'ol ya yich' chiq'uel,

⁴ soc xan jcojt' wacax soc jcojt' tat chij swenta yu'un ya yich' milel smajt'anin te Cajwaltic swenta te lamal-o'tanile. Ac'a me yich'ic tel soc majt'anil harina, wots'bil me soc aceite, melel ya me xtal ta atojolic yo'tic te Cajwaltique —xi' te Moisese.

⁵ Te israeletic la yich'ic bael c'alal ta banti ay te Nailpac' te banti ya yich' c'oponel te Cajwaltic, ja' te bila albot stsobic yu'un Moisés. Ta spisilic la slaman sbaic ta tejc'lej ta stojol te Cajwaltique.

⁶ Te Moisés jich la yal: —Ja' te bila yaloj Cajwaltic, pasaic, jich me ya yac' sba ta ilel ta atojolic soc smuc'ul yutsil xojobil —xi'.

⁷ Te Moisés jich la yalbey te Aarón: —Noptsajan bael ta scajtijib ta chiq'uel majt'anil, mila te majt'anil yu'un amul, soc te chambalam ya awac' ta chiq'uel scojt'ol swenta sc'anel perdón yu'un amul soc nix te smulic te israeletique. Ac'a te majt'anil yu'un israeletic swenta sc'anel perdón yu'un te smulique, jich nix te bit'il yaloj mandal te Cajwaltique —xi' te Moisese.

⁸ Ja' yu'un te Aarón noptsaj bael ta scajtijib ta chiq'uel majt'anil, la sbojbey snuc' te toro la yac' swenta sc'anel perdón yu'un te smule.

⁹ Te snich'nab te Aarón la yich'ic tel ta sts'eel te xch'ich'ele. Jich te Aarón la smul sbic'tal sc'ab ta ch'ich', la xjax ta xulubiletic yu'un te scajtijib ta chiq'uel majt'anile. Te sobrail xan jil te ch'ich'e, la smal ta sjoyobal ta yacan te scajtijib ta chiq'uel majt'anile.

¹⁰ Och xchic' ta scajtijib te xepuil, te sriñon soc te banti ay xepuil sejc'ub te chambalam la yich' milel yu'un te mulile, jich nix te bit'il albot mandal yu'un Cajwaltic te Moisese.

¹¹ Pero te sbaq'uetal soc te snujc'ulel la xchic' ta spat te campamentoe.

¹² Te Aarón la sbojbey snuc' te chambalam ya yich' aq'uel swenta majt'anil te scojt'ol ya yich' chiq'uele. Te snich'nab te Aarón la yich'ic bael te xch'ich'ele, ja' te la stsijts'anbey ta sjoyobal ta spat te scajtijib ta chiq'uel majt'anile.

¹³ Soc la yich'ic bael te sjol te chambalam soc te sbaq'uetal yich'oj niwac sesenel, la yich' aq'uel swenta majt'anil te scojt'ol ya yich' chiq'uele. Te Aarón la xchic' spisil ta scajtijib.

¹⁴ La spocbey te bitic ay ta yutil xch'ujt' soc ta xchebal te ya'e, la xchic' ta scajtijib, jich la spasbey ta scojt'ol te chambalame.

¹⁵ Te Aarón la yac' xan te majt'anil yu'un te israeletique. La stsac te tat tentsun, te ja' milbil majt'anil yu'un smul te lume, la sbojbey snuc', la yac' yu'un te smulique, jich nix te bit'il la spas soc te yan majt'anil neel la yaq'ue.

¹⁶ Te c'alal la yac' ta majt'anil te chambalam te scojt'ol ya yich' chiq'uele, jich la spas te bit'il chapal sc'oplale.

¹⁷ Soc la yac' te majt'anil harina, la stsac jojp, la xchic' ta scajtijib soc te majt'aniletic te ya yich' chiq'uel ta jujun sabe.

¹⁸ Te Aarón la sbojbey snuc' te wacax soc te tat chij te la yaq'uic te israeletic yu'un milbil majt'anil swenta te lamal-o'tanile. Te snich'nab Aarón la yac'beyic te xch'ich'ele. Jich te Aarón la stsijts'anbey ta sjoyobal ta spat te scajtijib ta chiq'uel majt'anile.

¹⁹ Soc ac'bot nix te xepuil te wacax soc te chije, soc nix te sne, te xepuil smajq'uil te sbiquile, te sriñon, soc te xepuil ay ta sejc'ube,

²⁰ la yac'beyic sjoin te stanic te xepuile. Jich te Aarón la xchic' te xepuil ta scajtijib,

²¹ pero te stanic soc te swa'el ya' te chambalametique, ja' nax la spas ta stojol Cajwaltic te ya stoyilaybey ta stojol, jich nix te bit'il albot mandal yu'un Cajwaltic te Moisese.

²² Te Aarón la stoy sc'ab, la sc'anbey bendición ta stojol te slumal Israele. Te c'alal laj yo'tan ta yaq'uel te milbil majt'anil yu'un te mulile, soc te majt'anil te scojt'ol ya yich' chiq'uele, soc milbil majt'anil swenta te lamal-o'tanile, la yijq'uitay jilel ta scajtijib majt'anil te Aarone.

²³ Te Moisés soc Aarón ochic bael ta Nailpac' te banti ya yich' c'oponel te Cajwaltique. C'alal loq'uic, la sc'anbeyic bendición ta stojolic te israeletique. Jich te Cajwaltic la yac' sba ta ilel soc muc' xojobil ta stojol te lume:

²⁴ Loc' c'ajc' ta stojol te Cajwaltique, la slajin ta jc'axel te chambalam te yac ta c'ajq'uele, soc nix te xepuil ayic ta scajtijib ta chiq'uel smajt'an te Diose. C'alal la yilic, ta spisil te israeletic tulan awunic ta swenta yutsil q'uinal yaiyic, la stinan sbaic coel c'alal ta lum te sti'baique.