Levítico 3 - Bible in Tzeltal de Oxchuc y Tenejapa

Milbil majt'anil swenta lamal-o'tanil

¹ “Teme ay mach'a ya yic' tel xwacax, chican teme stat o sme', swenta yu'un ya yac'bon ta milbil jmajt'an jo'on te Ajwalilon ta swenta lamal-o'tanil, ya me sc'an te ma'yuc bila boloben ta sbaq'uetal te chambalam ya yac'bon jmajt'anine.

² Te mach'a ya yac'bon jmajt'an, ya me scajan sc'ab ta sjol te chambalam ya yac'bon jmajt'anin, ya me sbojbey snuc' ta stojol te yochibal Nailpac' te banti ya quich' c'oponele. Jich te sacerdoteetic ya me stsijts'anbeyic xch'ich'el ta sjoyobal ta spat te scajtijib ta chiq'uel jmajt'ane.

³ “Te mach'a ya yic' tel te chambalam yu'un ya yac'bon jmajt'anin swenta lamal-o'tanile, ya me sc'an ya yac'bon ta jtojol swenta chic'bil jmajt'an te xepuil macal a te yutil xch'ujt' te chambalame,

⁴ te riñonetic yu'un, te xepuil potsol a, te xepuil ay ta sba te slomo, soc te xepuil ay ta sejc'ub te ya sc'an te pajal ya xloc' soc te riñonetic yu'une.

⁵ Te sacerdoteetic ya me xchiq'uic spisil ta scajtijib te jmajt'ane, ja' nix ya sjoin ta chiq'uel te chambalam te yac ta tilel soc te si'e, swenta chic'bil jmajt'an te buen bujts'an yic' ta jtojol jo'on te Ajwalilone.

⁶ “Teme ay mach'a ya yic'bon tel ta jtojol jcojt'uc xchij o stentsun swenta yu'un ya yac'bon ta milbil jmajt'an ta swenta te lamal-o'tanile, ya me sc'an te ja' ya yac'bon jmajt'anin te state, o te sme'e, pero ya sc'an te ma'yuc bila boloben ta sbaq'uetal.

⁷ Teme alal chij te ya yac' ta majt'anile, te c'alal ya yac'bon ta jtojol,

⁸ ya me scajan sc'ab ta sjol, ya me sbojbey snuc' ta stojol te Nailpac' te banti ya quich' c'oponele. Jich te sacerdoteetic ya me stsijts'anbeyic te xch'ich'el chambalam ta sjoyobal ta spat te scajtijib ta chiq'uel majt'anile.

⁹ “Te mach'a ya yac' chambalam te milbil jmajt'an swenta lamal-o'tanile, ya me sc'an ya yac'bon ta jtojol swenta me chic'bil jmajt'an te xepuile, xch'ixil te sne c'alal to ta banti mero loq'uem tel te ya yich' set'ele, te xepuil macal a te sbiquile,

¹⁰ ta xchebal te riñonetic, te xepuil potsol a, te xepuil ay ta sba slomo, soc te xepuil ay ta sejc'ub te pajal ya yich' loq'uesel soc te riñonetique.

¹¹ Jich te sacerdote ya me xchic' ta sba scajtijib spisil, swenta majt'anil we'elil te ya yich' chiq'uel ta swenta quich'el ta muc' jo'on te Ajwalilone.

¹² “Teme tentsun te chambalam ya yac'bon jmajt'anine, te c'alal ya yac'bon ta jtojole,

¹³ ya me scajan sc'ab ta sjol, ya me sbojbey snuc' ta stojol te Nailpac' te banti ya quich' c'oponele. Jich te sacerdoteetic ya me stsijts'anbeyic te xch'ich'el ta sjoyobal ta spat te scajtijib ta chiq'uel te majt'anile.

¹⁴ “Te mach'a ya yac' te chambalame, ac'a stsac, ac'a yac'bon swenta chic'bil jmajt'an yu'un quich'el ta muc' jo'on te Ajwalilone: spisil te xepuil macal a te sbiquile,

¹⁵ xchebal te riñonetic, te xepuil potsol a, te xepuil ay ta sba slomo, soc te xepuil ay ta sejc'ub te ya sc'an te pajal ya xloc' soc te riñonetique.

¹⁶ Jich te sacerdote ya me xchic' ta sba scajtijib spisil swenta chic'bil majt'anil we'elil te buen bujts'an yiq'ue. Spisil te xepuil jo'on me cu'un stuquel te Ajwalilone.

¹⁷ “Ja' in mandalil to, ma me ayuc bi ora ya xlaj sc'oplal, melel ya me sc'an te ya yaiyic te me'il-tatiletic, soc ya me yalbeyic uuc te yal-snich'nabique. Ta bayuc nainemex, ma me ayuc bi ora te ya alo'beyic te xepuil chambalam soc ma me xalo'beyic te xch'ich'ele.” Jich me ya awal ta stojolic —xi' te Cajwaltique.