Levítico 27 - Bible in Tzeltal de Oxchuc y Tenejapa

Bitic ch'ultesbil ya x'ac'otic ta stojol Dios

¹ Te Cajwaltic la sc'opon te Moisés, jich la yalbey:

² —Albeya te israeletique: “Teme ay mach'a ya sc'an sman loq'uel jtuluc te mach'a ac'botix cu'unin, ya me stoj chican te jayebix ya'wilale, teme winic o teme antse.

³ Teme winic, jtab ya'wilal c'alal ta oxwinic (60) ya'wilale, ya me awac'bey stoj lajuneb yoxwinic (50) ta jsejp plata, chican te bila sp'isol chapbil ta ch'ul awilal.

⁴ Ja' nix jich teme antse, lajuneb xcha'winic (30) ta jsejp plata ya yich' aq'uel ta swenta stuquel.

⁵ Te mach'atic ay jo'eb ya'wilal c'alal ta jtab ya'wilal, jtab ta jsejp plata ya yich' aq'uel teme winique. Yan teme antse lajuneb ta jsejp plata ya yich' aq'uel ta swenta stuquel.

⁶ Alalqueremetic te ay jun yuil, soc c'alal ta jo'eb ya'wilal, jo'eb ta jsejp plata ya yich' aq'uel ta swenta. Te ch'in ach'ixetique, ya yich' aq'uel oxeb ta jsejp plata ta swentaic.

⁷ Te mach'atic c'axemix ta oxwinic (60) ya'wilal, teme winique ya me yich' aq'uel ta swenta, jo'lajuneb ta jsejp plata. Teme antse, ya me yich' aq'uel lajuneb ta jsejp plata ta swenta.

⁸ Te mach'a mero me'ba, te ma xju' yu'un yaq'uel te taq'uin chapale, ya me xba yich' alel te sacerdote, swenta yu'un ja' me ya yal xan, chican te bit'il ya xju' yu'un yaq'uel te mach'a yaloj sbae.

⁹ “Te sc'oplal chambalametic ya yich' aq'uel ta jtojole, jich ay: Spisil chambalam te ya yich' aq'uel ta jtojole, ch'ultesbil me ya xjil.

¹⁰ Ja' yu'un ma xju' ya yich' jelel ta yan chambalam, manchuc me ja' lec, o yu'un ja' ma lecuc. Teme ay la yich' jelel, te chambalam yich'ojix aq'uele, soc te chambalam och ta sjelole, pajal me cu'un ya xjilic.

¹¹ “Te sc'oplal chambalam ma lecuc sc'oplal ta ti'ele, te ma xju' ya yich' aq'uel jmajt'anin, ya me yich' iq'uel bael ta stojol sacerdote te chambalame,

¹² swenta yu'un ja' me ya yal te jayeb taq'uin ya yich' aq'uel ta swenta, chican te bi yilel te chambalame. Chican jich yipal te taq'uin ya yal te sacerdote, jich nix me ya xc'ot a.

¹³ Teme ay mach'a ya sc'an te ya yic' loq'uel te chambalame, ya me sc'ases jun xan ta yo'ebal a te bit'il albil te taq'uine.

¹⁴ “Teme ay mach'a ya yac'bon sna, te sacerdote ya me yal te bit'il stojole, chican te bi yilel ta pasel te nae. Te ya yal te sacerdote, yu'un nix me jich ya xc'ot a.

¹⁵ Pero teme ay bi ora ya sc'an ya sujt' xan ta stojol te sna te mach'a la yac' ta jtojol, ya sc'an te ya sc'ases jun xan ta yo'ebal a te bit'il te stojol albilixe, jich me ya xcha'sujt' ta swenta te snae.

¹⁶ “Teme ay mach'a ya yac'bon jtsaluc te sq'uinale, te stojol te q'uinale ja' me ya yich' na'el te bila ya xloc' tey a, jich me ya yich' tojel lajuneb yoxwinic (50) ta jsejp plata ta jujun buluchwinic (220) litro cebada te yawalele.

¹⁷ Teme ja' yorail ya yac'bon a ta sjajch'el te yorail ainel ta libre, jich nix me ya xjil te stojol te bit'il albilixe;

¹⁸ pero teme patilixe, teme c'axemix a te yorail ainel ta libre te ya yac'bon, te sacerdote ya me yajtay te jayeb te plata ya xju' ta aq'uele, te ya yich' ts'ujtesel a te stojol albilix te jayeb te ya xc'ot te jujun ja'wil te jayeb xan ja'wil te ma ba staoj te ja'wil aq'uel ta libre.

¹⁹ “Teme ya sc'an ya xcha'sujt' xan ta swenta te sq'uinal te mach'a la yac'bon, ya me sc'ases jun xan ta yo'ebal a te bit'il stojol albilixe, jich me ya xcha'sujt' xan ta swenta te sq'uinale.

²⁰ Pero teme ma ba la xcha'yich' xan ta stojole, teme la yich' chonel yan winic, ma xju' ya xcha'sujt'ix ta swenta te sq'uinale.

²¹ Te c'alal ya xjil ta libre ta yorail te ja'wil swenta ainel ta libre te q'uinale, ya me xjil ta tuuntesel ta jtojol, ja' me ya yich' ta swenta te sacerdoteetic te q'uinale.

²² “Teme ay mach'a ya yac'bon te smanbil q'uinale, te ma ja'uc te ac'bot yu'unin yu'un te state,

²³ te sacerdote ya me xchap soc te stojol te q'uinal ja' to c'alal ta yorail te ja'wil swenta ainel ta libree. Ja' me ya stoj ta yorail nix te stojol la yich' chapel te q'uinale, jich me ya yac'bon te q'uinale.

²⁴ Ta yorail te ja'wil swenta ainel ta libre, te q'uinal ya me xcha'sujt' xan ta swenta te mach'a la xchone, ja' te mach'a yu'un ta neelal toe.

²⁵ “Ta spisil te jayeb ya xc'ote, puersa me ja' ya yich' p'isel te siclo te jtab gera yich'oje, melel ja' sp'isol yalal yu'un te ch'ul awilal.

²⁶ “Pero te sba yal te chambalametique, ja' nix cu'un a, ma me ayuc mach'a ya xju' ya yac'bon stuquel. Manchuc me ch'in wacax, o ch'in chij, ja' cu'un.

²⁷ Teme ja' te chambalam te ma lecuc sc'oplal ta ti'ele, ya xju' ya xcha'manot xan sujt'el, chican te bit'il te stojol chapbil soc c'axem ta jun xan ta yo'ebal te stojol chapale. Pero teme ma ba manot xan sujt'ele, ya xju' ta chonel, jich ya yich' aq'uel te bit'il stojol chapbilixe.

²⁸ “Teme ay mach'a jc'axel ya yac'bon jtebuc te bila ay yu'une: winic, ants, chambalam, q'uinal te ac'bot yu'unin yu'un te state; te bila jc'axel ya yich' aq'uel ta jtojole, ma xju' ya yich' chonel, soc ma xju' ya xcha'manot xan sujt'el. Spisil te jc'axel ac'bil ta jtojol, mero ch'ultesbil me, ja' me cu'un.

²⁹ Soc ja' nix jich ma xju' ya xcha'manot xan sujt'el te mach'a chapalix yu'un te ya xlaje, puersa me jich ya xlaj a.

³⁰ “Te jun ta slajunebal te bila ya xloc' ta lumq'uinal awu'unique, chican teme trigo, o cebada, o sit te'etic, ja' me cu'un, jo'on te Awajwalone, melel ch'ultesbil cu'un stuquel.

³¹ Teme ay mach'a ya sc'an ya sujt' xan ta stojol jtebuc te jun ta slajunebale, ya xju' ya stoj te bit'il stojole, soc xan te jun ta yo'ebale.

³² “Jujun ta slajunebal te chambalametic, chican teme wacaxetic, chijetic, o tentsunetic, ya me yich' aq'uel ta jtojol swenta jun ta slajunebal.

³³ Ma'yuc ta stsael te banti mero leque, soc teme ma lecuque, soc ma xju' ta jelel. Teme ay la yich' jelele, te chambalam la yich' jelel soc te yane, pajal me cu'un ya xc'ot xchebalic; ja' yu'un ma xju' ya xcha'sujt' xan ta stojol te yajwale”, uta me —xi' te Cajwaltique.

³⁴ Ja' in to, ja' te mandaliletic ac'bot yu'un Cajwaltic ta wits Sinaí te Moisés, te ja' smandalteselic ta spisil te israeletique.