Levítico 25 - Bible in Tzeltal de Oxchuc y Tenejapa

Ja'wil yu'un cux-o'tan, soc ainel ta libre

¹ Te Cajwaltic la sc'opon Moisés ta wits Sinaí, jich la yalbey:

² —C'opona te israeletic, jich xawalbey: “Te c'alal ochemexix tey ta lumq'uinal ya cac'beyexe, te lumq'uinal ay me yorail cux-o'tan yu'un swenta quich'jibal ta muc' jo'on te Ajwalilone.

³ Ya me xju' ya sts'unbajex waqueb ja'wil ta aq'uinalic, soc waqueb ja'wil ya xju' ya aloq'uesbey staquin c'ab te ts'usubiletic awu'unic, soc ya atulbeyic te site,

⁴ pero ta sjuquebal ja'wil, mero ts'acal me ya awac'beyic xcux yo'tan te lumq'uinal, swenta quich'jibal ta muc' jo'on te Ajwalilone. Ja' yu'un ma me ayuc bila xats'unic ta aq'uinalic te ja'wil in to, soc ma me xaloq'uesbey staquin c'ab te ats'usubilique.

⁵ Soc ma me xju' ya aset'ic te trigo ya xch'i ta stuquel te c'alal la aset'ix swenta slajibal buelta te atrigoe, ma me jichuc ya aset'ic te bit'il stalel ya aset'ic ta jujun ja'wile. Soc ma me xatulbeyic sit ats'usubilic te ma ba yich'ojix loq'uesel staquin c'abe. Te lumq'uinal ts'acal me ya yich' aq'uel xcux yo'tan.

⁶ Te bila ya yac' sit ta stuquel ta lumq'uinal te c'alal yac ta cux-o'tan ae, tic' me ya xwe'ex a te ja'exe, soc te amanbil abatetic, acriadaic, te j'at'eletic awu'unic, soc te jyanlumetic te ajoinejic ta nainele,

⁷ soc nix te chambalametic awu'unic, soc te ja'mal jti'awal chambalametic ayic ta aq'uinalique. Ta spisil te bitic ya yac' te lumq'uinal, ya me xtuun yu'un awe'elic.

⁸ “Ac'a yich' ajtayel juqueb buelta ta juqueb ja'wil, jich ya xloc' baluneb yoxwinic (49) ja'wil ta spisil.

⁹ Ta slajunebal c'aal sjajch'el te sjuquebal u, te ja' te Sc'aalelal Perdón, ya me yich' oq'uesinel oq'ues ta spamal te lumq'uinale.

¹⁰ Ta slajunebal yoxwinic (50) ja'wil ya me awalic ta jamal te ja' te ch'ul ja'wil swenta ainel ta libre. Ya me apuquic ta alel ta stojol spisil te yajwal lumq'uinal te ja' yorail ainel ta libre. Spisil winiquetic ya me xcha'sujt' xan bael ta yolil mach'atic ay yu'un, soc ya me sujt' xan bael ta yich'el te sq'uinalique.

¹¹ Te ja'wil lajuneb yoxwinique (50) ja' me te ja'wil ya xjilex ta libre. Ma me xju' ya awaiyic ts'unbajel, ma xju' ya aset'ic trigo te stuquel nix ya xch'ie, ma xju' ya aloq'uesbeyic staquin c'ab te ats'usubil soc ma xju' ya atulbeyic sit,

¹² melel ch'ul ja'wil me, yorail ainel ta libre awu'unic. Ja' nax me ya awe'ic te bila ya yac' ta stuquel te lumq'uinale.

¹³ “Te ja'wil swenta ainel ta libre, ta apisilic ya me acha'ich'ic xan ta awentaic te aq'uinalique.

¹⁴ Teme ay mach'a ya amanbey o ya achonbey q'uinal, ma me xalo'lay yu'un.

¹⁵ Te mach'a ya smane, ja' me ya yich' ajtayel te jayebix ja'wil xc'axel te ja'wil swenta ainel ta libre. Jich nix te mach'a ya xchone, ja' me ya sc'anbey stojol te jayeb xan ja'wil te bila ya xloc' tey a te q'uinale:

¹⁶ chican te jayeb xan ja'wil ya xloc' sit te bila ya xch'i ta q'uinal; teme bayal to, bayal me stojol ya xloc', teme ma'yuquix bayal ja'wil, ja' nix jich ma'yuc bayal stojol, melel te bila ya yich' chonel, ja' te jich yipal te sit ya yac' ta jujun ja'wile.

¹⁷ “Ma me ayuc mach'a ya slo'lay yan. Ac'aic me ta ilel te awich'ojonic ta muq'ue, melel jo'on Ajwalilon te Dioson awu'unique.

¹⁸ Ch'uunaic spasel te mandaliletic cu'un, jich me xapasic te bit'il chapal cu'une. O'tantayaic me spasel, jich me bin nax awo'tanic ya x'ainex ta lumq'uinal;

¹⁹ te lumq'uinal ay me bitic ya yac' sit tey a, te ja'ex bin nax me awo'tanic ya x'ainex tey a, ya me awe'ic te bitic ya xloq'ue, buen me ya xnoj ach'ujt'ic yu'un.

²⁰ “Teme ya ajojc'obey abaique: “¿Pero bila ya jwe'tic te c'alal yac ta c'axel a te sjuquebal ja'wile, melel ma ba ya caiytic ts'unbajel, soc ni yacuc xju' ya jtsobeytic te site?” teme xaexe.

²¹ Melel jo'on me ya cac'beyex bendición te ya xc'ax te swaquebal ja'wile, te bila ya xloc' awu'unic, tic' ya xc'ax oxeb ja'wil awu'unic a.

²² Ja' me ya awe'ic te jayeb bitic ay ta snail awu'unic, jich me ya x'ochex xan ta ts'unbajel te c'alal ya sta swaxaquebal ja'wile, soc asta ya xju' ya awe'ic ta sbalunebal ja'wil te bitic ay ta snail awu'unique, ja' to teme la sta yorail te ya atulbeyic sit te bitic la ats'unique.

²³ “Te q'uinal ma me xju' ta chonel ta jc'axel. Melel te q'uinal jo'on cu'un; te ja'exe c'axel nax ayex, jich nax c'oemex te bit'il ula'il cu'une.

²⁴ Ja' yu'un, biluc q'uinalil te awu'uninejic ta ora in to, ya me xju' ya achonbeyic sujt'el te sq'uinal te mach'a la xchonbate.

²⁵ “Teme ay jil ta me'bail jtuluc te alumale, teme ta scaj sme'bail ay ya xchonbat sq'uinal, ya me xju' ya xtal te mach'a ma yanuc parte yu'une, ya me xju' ya sman sujt'el te bila la xchon te mach'a jilem ta me'baile.

²⁶ “Teme ay mach'a ma'yuc te jun sts'umbal soc te ya xju' ya xmanbot xan sujt'el te sq'uinal te ja' yu'un ta neelal toe, pero teme ju' yu'un stsobel te bay c'alal ya xtuun swenta yu'un ya sman xan sujt'ele,

²⁷ ya me yajtay yil te jayebix c'aal te la xchone, ya me sujt'esbey te mach'a la sman te jayeb xan te taq'uin ya xloc' ta ajtayel te stojole. Jich me ya xju' ya xcha'sujt' xan ta stojol te sq'uinale.

²⁸ Pero teme ma ba ju' yu'un stsobel jich yipal ya xtuun yu'un, te ya xcha'man xan sujt'el ta stojol te bila ja' yu'un ta neelal toe, ya me xjil ta stojol te mach'a la smane, ja' to teme la sta yorail te ja'wil swenta ainel ta libre, ja' me ta yorail a te ya xjil ta libre te bila chonbile. Te mach'a la xchon, ya xcha'sujt' xan ta stojol.

²⁹ “Teme ay mach'a ya xchon sna te ay ta jpam lum te joybil ta ts'ajq'ue, ya me xju' ya xcha'man xan sujt'el. Teme ya xju' yu'un smanel, chican bi ora ya xju' yu'un ta sjunal ja'wil.

³⁰ Pero teme ma ba ju' yu'un xcha'manel xan ta sjunal ja'wil, jc'axel me ya xjilix ta stojol a te mach'a la smane, soc yu'un me yal-snich'an ya xjilix. Ma xju' ya xjilix ta libre c'alal ya xc'ot yajtalul te ja'wil swenta ainel ta libre.

³¹ Pero te naetic ayic ta lumetic te ma joybiluc ta ts'ajq'ue, ja' nix me jich sc'oplal ya xjil te bit'il te q'uinaletique. Ya me xju' ya yich' xan manel sujt'el yu'un te yajwale. Ya me xjil ta libre ta yorail te ja'wil swenta ainel ta libre.

³² “Yan te levitaetic biluc ora ya xju' ya xcha'manic xan te nanatic ayic ta yutil te lumetic yu'unique.

³³ Teme la xchon sna te levita, ya me sc'an te ya xcha'yich' xan ta swenta te sna ta yorail te ja'wil swenta ainel ta libre. Ya me sujt' bael ta slumal te banti ay te bila ay yu'une. Melel te bila ay yu'un te levitaetic te ayic ta yolil te israeletic, ja' nax te sna te ay ta slumale.

³⁴ Te lumq'uinal yu'un yawil chambalametic te yu'uninejic te lumetic yu'un levitaetic, ma me xju' ta chonel, melel stalel ja' yu'unic stuquelic.

³⁵ “Teme ay ya x'och ta me'bail te alumal, teme tal ta atojole, ya me sc'an ya ana'bey yo'bolil sba, jich te bit'il ya ana'bey yo'bolil sba te jyanlum c'axel nax aye, soc ya me alebey te banti ya x'aine.

³⁶ Ma me x'ac'anbey jtebuc sjol teme la awac'bey smajanbat ataq'uine, ma me jichuc xapas. Xiwuc me awo'tan ta stojol te Dios awu'une, lebeya me te banti ya x'ain te mach'a jun alumal soque.

³⁷ Ma me x'ac'anbey sjol te ataq'uin ya awac'bey smajane, soc ma me xatoybey stojol te swe'el ya awac'beye.

³⁸ Jo'on te Ajwalilon, Dioson awu'unic te la jloq'uesex tel ta Egipto swenta yu'un ya cac'beyex te slum-sq'uinal Canaán, soc swenta yu'un jo'on Dioson awu'unic.

³⁹ “Teme ay och ta me'bail te mach'a jun alumal soque, soc teme ya xchon sba ta atojol, ma me jichuc xawac' ta at'el te bit'il manbil abat.

⁴⁰ Jichuc nax me ta awo'tan te bit'il jle-at'el, o jmajan-na. Ya me x'at'ej bael ta atojol, ja' to c'alal ta yorail te ja'wil swenta ainel ta libre.

⁴¹ Ta patil ya me xju' ya yijq'uitaybat te ana, ya me xbajt' spisil soc yal-snich'nab, ya me sujt' bael ta stojol te sts'umbal soc ta banti ay te biluc yu'un.

⁴² Melel jo'on abatetic cu'un te la jloq'ues tel ta Egipto, ja' yu'un ma xju' teme ya yich'ic chonel ta abatil.

⁴³ Ma me tulanuc ya awac' aba ta stojolic, ya me sc'an te ja' ya awac' ta ilel te awich'ojon ta muc' jo'on te Dioson awu'une.

⁴⁴ “Teme ya ac'an te ay amanbil abat, soc amanbil criada, mana ta yantic nacionetic te ayic ta sjoyobal te alumale.

⁴⁵ Soc ya xju' ya aman te jyanlum ants-winiquetic ayic ta nainel ta awolilique. Te yal-snich'anic ya x'ayinic te c'alal ay ta alum-aq'uinalique, ya me xju' ya amanic yu'un ya awu'uninic.

⁴⁶ Ya xju' ya awijq'uitaybeyic yu'unin awal-anich'nabic te c'alal ya xlajexe, spisil ora ya xju' ya yabatinic. Pero te ja'ex te israelex, ma me ayuc jtuluc alumal te ya apejc'anic soc te tulan ya awac' abaic ta stojolique, melel awermano abaic, jun ats'umbalic soc stuquelic.

⁴⁷ “Teme ay jtul jyanlum te nainem ta alumal te ya sta sc'ulejale, pero teme ay alumal te nopol ay sna soc, te ya x'och ta me'bail, teme ta scaj sme'bail ya xchon sba ta stojol te jc'uleje, o ta stojol yan jc'ulej jyanlum winic,

⁴⁸ ya me xju' te ya yich' xan manel te ya xcol ta libre manchuc me xchonoj sba stuquel. Ya me xju' ya xmanot bael yu'un jtuluc yermano,

⁴⁹ stajun, snich'an stajun o yan spat-xujc'. Soc ya xju' te ja' nix ya sman loq'uel sba teme ya xju' yu'un te jich ya spase.

⁵⁰ Te jayeb stojol te ya xjil ta libre, ja' chican jayebix ja'wil te la yich' manel ja' to ta yorail te ja'wil ainel ta libre. Te jayeb ja'wil te at'ejeme, ya yich' ajtayel te jayeb stojol ya yaq'ue, ja' chican te jayeb yac ta tojel a te winiquetique.

⁵¹ Pero teme ay to bayal ja'wil ya sc'an ma ba ya sta yorail te ja'wil swenta ainel ta libre, ac'a yajtayic te jayeb ya xloc' jujun ja'wile, ya me yac' swenta scolel ta libre oliluc te taq'uin la yich' te c'alal la xchon sbae;

⁵² pero teme nopolix te ja'wil swenta ainel ta libre, ya me yac' te jayeb xan stojol ya xloc' te ja'wiletic ya spas xan faltae.

⁵³ Jich me ya yich' pasel ta stojol te bit'il jtul jle-at'el te spasoj contrato ta ja'wile, ma me xawac' ta uts'inel.

⁵⁴ “Teme ma ba jil ta libre, ya me xjil ta libre soc yal-snich'nab ta yorail te ja'wil swenta ainel ta libre.

⁵⁵ Melel te israeletic abatetic cu'un, mero abatetic cu'un; jo'on la jloq'ues tel ta Egipto. Jo'on Ajwalilon soc Dioson yu'unic jtuquel.