Levítico 22 - Bible in Tzeltal de Oxchuc y Tenejapa

Mach'atic ya xju' ya swe' majt'aniletic

¹ Te Cajwaltic la sc'opon te Moisés, jich la yalbey:

² —Albeya te Aarón soc snich'nab, te ya me sc'an ya stsajtay sba ta lec yu'un te bitic ch'ultesbil ya yac'bonic te israeletic, swenta yu'un ma me sboltesbonic sc'oplal te jch'ul-biile. Jo'on Ajwalilon.

³ “Albeya yaiyic, yo'tic soc ta patil bael, ya me yich' loq'uesel ta jtojol mach'auc a te patil alnich'an yu'un Aarón, teme ma ba lec sc'oplal a te ya xtal yac'bon ta jtojol te bila ch'ultesbil ya yac'bonic ta jtojol te israeletique. Jo'on Ajwalilon.

⁴ “Te patil alnich'anetic yu'un Aarón ma me xju' ya swe'ic te bila ch'ultesbil teme ay ta c'a'el-chamel, soc teme ay bila ya xmal loq'uel ta sjol sbaq'uetale. Ja' to teme la yich'ix lecubtesel sc'oplale, ja' to me ya xju' ya swe' a. “Te mach'a ya spic te bila ma lecuc sc'oplal ta scaj te animae, teme ya spic te mach'a ay bila mal loq'uel ta sjol sbaq'uetal,

⁵ teme ta swenta bit'il la spic chambalam te staset ya xbeen, o teme yu'un la spic te mach'a ma lecuc sc'oplale,

⁶ ma lecuc sc'oplal ya xjil c'alal ta yijc'ubel q'uinal, ma me xju' ya swe' te bila ch'ultesbil ja' to teme ya spoc sba ta ja'e.

⁷ Lecubtesbil sc'oplal me ya xjil te c'alal ya xmal bael te c'aale, ta patil ya me xju' ya swe'ix te bila ch'ultesbile, melel ja' nix me swe'el a.

⁸ Ma me xju' ya sti'bey sbaq'uetal lajem chambalam, o chambalam te yich'oj milel yu'un jti'awal ja'mal chambalame, ma me lecuc sc'oplal ya xc'ot yu'un. Jo'on Ajwalilon.

⁹ “Albeya, ac'a xch'uunic spasel te bila caloj, melel ja' me xcuchoj smul ya xc'otic yu'un teme ma ba ya xch'uunbonic, soc jich me ma ba ya xlajic teme ya xch'uunique. Jo'on Ajwalilon te ch'ultesbilic cu'une.

¹⁰ “Ma me xju' ya swe' te bila ch'ultesbil te mach'a ma ochemuc ta sacerdoteile. Ni ja'uc te yula' te sacerdote, soc ni ja'uc te mach'a yac ta at'el yu'un, ma me xju' ya swe' te bila ch'ultesbile.

¹¹ “Teme ay ya sman ta staq'uin yabat te sacerdote, ya me xju' ya swe' stuquel te bila ch'ultesbil te abate. Ja' nix jichic te mach'atic tey ayinix ta q'uinal ta sna te sacerdote, ya me xju' ya swe'bey swe'el te sacerdote.

¹² “Teme ma ochemuc ta sacerdoteil te mach'a nujbinem soc te yantsil-nich'an sacerdote, ma me xju' ya swe' stuquel te smajt'an Dios ya yich'ic aq'uel te sacerdoteetique.

¹³ Pero teme me'ba ants, o sujt'esbil yu'un smamlal, soc teme ma'yuc yalataque, teme ya sujt' xan bael ta sna stat, jich nix te bit'il ma to baemuc ta ich'el a, ya me xju' ya swe'bey te we'elil yu'un te state. Pero ma xju' ya swe' te mach'a ma ochemuc ta sacerdoteile.

¹⁴ “Te mach'a ch'ayal yo'tan a te ya swe' te bitic ch'ultesbile, ya me sujt'esbey te sacerdote sjelol te bila la swe', soc jun xan ta yo'ebal ya sujt'esbey.

¹⁵ Pero te sacerdoteetic ya me sc'an te ma sboltesbey sc'oplal te bitic ch'ultesbil ya yac'bonic te israeletique.

¹⁶ Te mach'a ya swe' te bitic ch'ultesbil, ay smul ya xc'ot. Jo'on Ajwalilon te la jch'ultese —xi' te Cajwaltique.

Te bi yilel ya sc'an chambalametic ya yich' aq'uel

¹⁷ Te Cajwaltic la sc'opon te Moisés, jich la yalbey:

¹⁸ —C'opona te Aarón soc snich'nab soc ta spisil te israeletic, jich me xawalbey: “Teme ay israel o jyanlum te nainem ta awolilic te ya yac'bon ta jtojol jcojt' chambalam swenta jmajt'an te scojt'ol ya yich' chiq'uel, teme yu'un jich ya xc'ot ta pasel a te bila xchapoj, o teme yu'un swenta nax spasemal yo'tan ya yac'bon jmajt'an,

¹⁹ ya me sc'an te ja' ya yac' te stat chambalam te ma'yuc bila boloben ta sbaq'uetal, swenta yu'un jich me ya stsacbot a te majt'anile. Ya xju' teme toro, chij, o tentsun,

²⁰ pero ma me ja'uc te chambalam te ay bila boloben ta sbaq'uetal, melel ma me stsacbot stuquel.

²¹ “Mach'auc a teme ya yac'bon milbil majt'anil swenta lamal-o'tanil, o teme yu'un jich ya yac' c'otuc ta pasel te bila chapal yu'un, o teme majt'anil swenta nax spasemal yo'tan, ya me sc'an te toro ya yac', o chij, pero ja' me te ma'yuc bila boloben ta sbaq'uetal, melel teme ay bila boloben ta sbaq'uetal te chambalame, ma me stsacbot stuquel.

²² Ma me xawac'bonic jmajt'anin te chambalametic te ma'sit, te ay yejch'en, coxo, ay xch'ojquil, ay salul, o te ay xchinule, ma me xawac'bon ta chic'bil jmajt'an ta scajtijib.

²³ Swenta majt'anil yu'un spasemal awo'tan, ya xju' ya awac' toro o chij te stalel ma ts'acaluc a tojc' te sbaq'uetale, pero teme ja' majt'anil yu'un te bila achapoj ta jtojol, ma xju' ya jtsacbat stuquel.

²⁴ Soc ma me xju' ya awac'bonic jmajt'anin chambalametic te ejch'enajem te stonil sbaq'uetal, teme yich'oj majel, teme yich'oj nitel, o teme yich'oj set'ele. Ma me jichuc xapasulayic ta alum-aq'uinalic.

²⁵ Soc ma me xatsacbeyic teme ay jyanlum tal yac'beyex chambalam, te jich ay te bit'il la calixe. Teme ya xtal yac' chambalam te ja' jwe'el jo'on te Diosone, pero teme ay bila boloben ta sbaq'uetal te chambalame, ma me stsacbot stuquel”, uta me xi'.

Bit'il ya sc'an milel chambalametic ya yich'ic aq'uel

²⁶ Te Cajwaltic la sc'opon te Moisés, jich la yalbey:

²⁷ “Te c'alal ya xtojc' jcojt' wacax, chij, o tentsun, juqueb me c'aal ya sjoin sme', pero ta swaxaquebal c'aal stojq'uel, ya me xju' ya yich'ix chiq'uel swenta milbil jmajt'an.

²⁸ “Ma me junuc nax sc'aalelal xamil soc yal te wacax o chij.

²⁹ “Te bi ora ya awac'bon jmajt'an ta swenta yalel wocol, swentail me xapas, jich me tsacbil ya xc'ot te majt'anile.

³⁰ Soc we'an me ta yorail nix, ma me ayuc xawijq'uitay yu'un yan c'aal. Jo'on Ajwalilon.

³¹ “Ac'aic c'otuc ta pasel te mandaliletic cu'un, ch'uunaic me spasel. Jo'on Ajwalilon.

³² “Ma me xaboltesbon sc'oplal te jch'ul-biile, jich me ch'ul Dioson ta yolilic te israeletique. Jo'on Ajwalilon te la jch'ultesex te ja'exe,

³³ soc te la jloq'uesex tel ta Egipto swenta yu'un Dios ya xc'oon awu'unic. Jo'on Ajwalilon”, uta me —xi' te Cajwaltique.