Levítico 21 - Bible in Tzeltal de Oxchuc y Tenejapa

Bi yilel ya sc'an te sacerdoteetique

¹ Te Cajwaltic jich la yalbey te Moisés: —Albeya te sacerdoteetic te patil alnich'anetic yu'un Aarón, te ma me xyac' te ma ba lec sc'oplal ya xc'otic ta scaj spiquel te anima spat-xujq'ue.

² Ja' nax me ya xju' ya spic teme jun snaic soque, jich bit'il teme sme' o teme stat, squerem-nich'an, o yantsil-nich'an,

³ sbanquil, yijts'in, xwix o yijts'in-ach'ix te ma to baemuc ta ich'el te sjoinej to ta nainele. Ay permiso te ma ba lec sc'oplal ya xc'ot yu'unic stuquel.

⁴ Pero ma xju' ya spas te ma lecuc sc'oplal ya xc'ot yu'un spiquel anima teme xwix o yijts'in te ayix smamlale.

⁵ “Ma me xju' ya st'axan sjolic, ma me xjox yisimic, soc ma me xyejch'entes sbaq'uetalic,

⁶ ac'a me xch'ultes sbaic ta mero melel ta jtojol te Dioson yu'unique, ma me xyaq'uic bolobuc sc'oplal te jbiil, melel ja'ic te ya yaq'uic ta jtojol te majt'anil ya yich' chiq'uel, ja' te we'elil cu'un. Ja' yu'un ya me sc'an te spisil ora ch'ultesbil ya x'ainique.

⁷ “Soc ma me xju' ya xnujbinic soc jmulawil ants, o te mach'a yich'oj tsaquel, o te mach'a ijq'uitaybilix ta winique; ma me xju' ya yic' yinaminic, melel te sacerdote ch'ultesbilic ta jtojol te Dioson yu'unique.

⁸ Ma me xawac' scap sbaic soc yantic, melel ja'ic me te ya yaq'uic waj ta jtojol. Ch'ultesbilic me ta atojol, melel jo'on Ajwalilon, ch'ul Dioson, soc jo'on te ya jch'ultesexe.

⁹ “Teme ya sboltes sba, teme ya sc'atp'un sba ta jmulawil ants te yantsil-nich'an sacerdote, ya sboltesbey sc'oplal te state, ja' yu'un cuxul me a ac'a yich' chiq'uel.

¹⁰ “Te muc'ul sacerdote la yich'ix tulan yat'el te ya xju' ya slap te ch'ul c'u'ile, ta swenta te ch'ulteswanej aceite la yich' aq'uel ta sjole. Ja' yu'un tesbiluc me te sjole, soc ma me xch'i' sc'u' swenta seña mel-o'tan yu'un ay mach'a lajeme.

¹¹ Soc xan ma me xju' ya x'och ta banti ay anima; ma me xyac' te ma lecuc sc'oplal ya xc'ot, manchuc me ja' sbaq'uetal te anima stat o sme'.

¹² Ma me xju' ya xloc' ta ch'ul awilal cu'un, soc ma me xyac' pejc'ajuc yutsil sc'oplal te ch'ul awilal, melel ja' c'oem ta sjol te aceite swenta ch'ultesel cu'un. Jo'on Ajwalilon.

¹³ “Ja' me ya sc'an te ja' ya yic' yinamin te ach'ix ma'yuc tabil ta winique.

¹⁴ Ma me xju' ya xnujbin soc me'ba ants, te ijq'uitaybil yu'un winic, te yich'oj tsaquel, o te jmulawil antse. Te yinam ya me sc'an te mero ach'ix to te ja' nix te slumale,

¹⁵ swenta yu'un ma xbolob te sts'umbale, melel jo'on Ajwalilon te ch'ultesbil cu'une —xi' te Cajwaltique.

Mach'a ma xju' ya x'och ta sacerdoteil

¹⁶ Te Cajwaltic la sc'opon Moisés, jich la yalbey:

¹⁷ —Albeya te Aarón te yo'tic soc ta patil bael, ma me xju' ya yac'bey te majt'anil waj ta jtojol ni jtuluc te patil alnich'an yu'un teme ay banti ma lecuc te sbaq'uetale,

¹⁸ ja' teme ma'sit, coxo, amen sni', amen xchiquin,

¹⁹ c'asem yocsc'ab,

²⁰ c'ujul spat, mero ch'in, ay tocal ta sit, ay sac'al chin, ay spintoil ta snujc'ulel, o teme boloben stonil sbaq'uetal.

²¹ Ma me ayuc jtuluc te patil alnich'an yu'un sacerdote Aarón te ya xju' ya yac'bon ta jtojol te majt'aniletic yu'un ya yich'ic chiq'uel teme ay banti ma lecuc te sbaq'uetale. Ja' yu'un, ma xju' ya yac'bon majt'anil waj ta jtojol te Dioson yu'une.

²² Ya xju' ya swe' te waj cu'une, pajal sc'oplal te ch'ultesbil, soc te mero ch'ultesbile,

²³ pero ma xju' ya x'och bael ta spat te pac' t'imile, soc ma xju' ya xnoptsaj bael ta stojol te scajtijib ta chiq'uel majt'anil, melel ay banti ma lecuc sbaq'uetal; swenta yu'un jich ma sboltesbon sc'oplal a te ch'ul awilal cu'une. Melel jo'on te Ajwalilon te ch'ultesbilic cu'une —xi'.

²⁴ Te Moisés spisil la sc'asesbey yaiyic te Aarón soc te snich'nabe, soc nix ta spisil te israeletique.