Levítico 20 - Bible in Tzeltal de Oxchuc y Tenejapa

Castigo yu'un c'axin-c'op

¹ Te Cajwaltic la sc'opon te Moisés, jich la yalbey:

² —Albeya te israeletic te bila ya calbate: “Mach'auc israelil, o jyanlumil te nainem ta Israel, teme ya yac'bey snich'an te dios Moloc, ac'a me yich' milel ta ch'ojel ta ton yu'un te slumale.

³ Ya me jcontroin te winique, ya me jloq'ues ta yolil te slumale, melel la yac' te ma ba lec c'ot te ch'ul awilal cu'une, soc la yac' jinuc sc'oplal jch'ul-biil yu'un te la yac'bey jtul snich'an te Moloc.

⁴ Teme ma'yuc sc'oplal ta yo'tanic te slumal te bila yac ta spasel ta stojol Moloc te winique, teme ma ba la smilic te winique,

⁵ jo'on me ya jcontroin, soc te mach'atic ay yu'un, ya me jloq'ues ta yolil slumal soc te mach'atic pajal bolob soque, te pajal bajt'ic ta stojol Moloc.

⁶ Teme ay mach'a bajt' ta stojol te mach'atic ya sc'oponic ch'ulelal soc te mach'atic ay bila ya sna'ic syoljoltayel, te ya xbolob ta scaj st'unele, ya me jcontroin te mach'a jich ya spase, ya me jloq'ues ta yolil te slumale.

⁷ “Ch'ultesa me abaic ta jtojol, ch'ultesbiluquex me, melel jo'on Ajwalilon te Dioson awu'unique.

⁸ Pasaic me te mandaliletic cu'une, t'unaic ta pasel. Jo'on Ajwalilon te ya jch'ultesexe.

⁹ “Mach'auc a te ya sbolc'optay te sme'-stat, ya me yich' aq'uel ta lajel. Melel la sbolc'optay te state o te sme'e, ja' yu'un ja' nix ta swenta smul te ya xlaje.

¹⁰ “Teme ay winic la spas mulwej soc yinam te spat-xujq'ue, ya me yich' milel te winic soc te ants te la spasic mulweje.

¹¹ “Teme ay winic ya xway soc te yinam stat, ya me sboltesbey sc'oplal te state. Ja' yu'un ya me yich'ic milel xchebalic ya xlaj te winique soc te antse, ja' nix me ta swenta smulic te ya xlajique.

¹² “Teme ay winic ya xway soc yalib, ya me yich'ic milel xchebalic. Ja' ni me ta swenta smulic te ya xlajique, melel mero ilaybil sba te bila la spasique.

¹³ “Teme ay mach'a ya xway soc te sjoy ta winiquile, jich te bit'il ya xway soc te antse, ya me yich'ic milel xchebalic, ja' nix me ta swenta smulic te ya xlajique, melel mero ilaybil sba te bila la spasique.

¹⁴ “Teme ay winic ya yic' yinamin jtul ants, teme ya yic' xchebal soc te sme'e, mero mulil, ja' yu'un ta yoxebalic cuxajtic a ac'a yich'ic chiq'uel. Jich ma'yuc mach'a ya spas ta awolilic a te bila ma lecuc ya spasique.

¹⁵ “Teme ay winic te ya sta sba soc yantsilel chambalam, ya me yich' milel. Ja' nix jich te chambalame, ya me yich' milel uuc.

¹⁶ “Teme ay ants te ya sta sba soc stat chambalam, ya me yich' milel xchebal soc te chambalame. Ja' nix me ta swenta smulic te ya xlajique.

¹⁷ “Teme ay winic ya yic' yinamin xwix o yijts'in-ach'ix, manchuc me yijts'in ta swenta stat o ta swenta sme', teme la sta sba soque, ya me yich'ic loq'uesel ta stojol te slumalique. Melel te bit'il ya sta sba soc te jun sme' o jun stat soque, mero q'uexlaltic sba ta pasel. Ja' yu'un te mach'a ya spase, ya xcuch te smul yoloj la slee.

¹⁸ “Teme ay winic ya xway soc te ants yorail yac ta yilel xchamel swenta jujun u, te ya sta sba soque, ya me yac' chicnajuc te banti ya xtal xchamel te antse, soc ja' nix ya yac' chicnajuc te antse, ja' yu'un ya me yich'ic loq'uesel ta stojol te slumalique.

¹⁹ “Ma me xwayat soc te xwix o yijts'in te ame'e, soc ma me xwayat soc te xwix o yijts'in-ach'ix te atate, melel teme jich ya apas te bit'il ma yanuc parte awu'une, ta achebalic me ya acuchic te amulique.

²⁰ “Teme ay winic ya xway soc yinam stajun, ya me sboltesbey sc'oplal te stajune, ta xchebalic me ya xcuch te smulique; ma me ayuc yal-snich'anic a ya xlajic.

²¹ “Teme ay mach'a ya spojbey te yinam sbanquil o yijts'in, ya me sboltesbey sc'oplal te yermanoe. Mero ilaybil me sba ta pasel, ma me ayuc yal-snich'nab a te ya xlajique.

²² “Ch'uunaic me spasel te mandaliletic cu'un soc te bitic chapale; t'unaic me ta pasel spisil. Jich me ma xch'ojex loq'uel a te q'uinal te banti ya quiq'uex bael ta nainele.

²³ Ma me xanopbeyic yat'el te mach'atic ya jloq'uesbeyex bael ta atojolique; ja'ic stuquelic la spasic spisil, ja' yu'un ma ba cujch'ix cu'un te smulique.

²⁴ Jo'on ya calbeyex ta jamal, te ja'ex awu'unic ya xc'ot te slum-sq'uinalique. Jo'on nix me ya cac'beyex awu'uninic te lumq'uinal te banti ya x'oquin leche soc chab c'oeme. “Jo'on Ajwalilon Dioson awu'unic, yan me awilelic cu'un te bit'il yantic lumetique.

²⁵ Ja' yu'un te ja'exe, ya me atsajtayic te banti ay te chambalametic te lec sc'oplale soc te ma lecuc sc'oplale, te mutetic te lec sc'oplale soc te ma lecuc sc'oplale. Ma me xawac' abaic ta ilayel ta scaj chambalametic, mutetic soc te chambalametic staslajan ya xbeenic ta lume, te calojix banti ay te chambalametic te ma lecuc sc'oplale.

²⁶ Te ja'ex ya me sc'an te ch'ultesbilex ta jtojole, melel jo'on Ajwalilon ch'ul Dioson, yan me awilelic cu'un te bit'il yantic lumetique, swenta yu'un jo'on cu'unex.

²⁷ “Teme ay winic, o ants, te ya xc'opoj ta swenta xch'ulel te mach'atic lajemique, o te ya yac' sbaic ta yoljoltayel, ya me yich'ic milel ta ch'ojel ta ton, soc ja' ni me ta swenta smulic te ya xlajique.” Jich me ya xc'o awal ta stojolic —xi' te Cajwaltique.